Litšepiso tsa ho hlohonolofatsoa le ho buseletsoa naha
1“Ha lintho tsena li se li etsahetse ho lōna, e leng litlhohonolofatso le lithōhako tseo ke le baletseng tsona, 'me le li nahana ha le le lichabeng tsohle tseo Morena Molimo oa lōna, a le leleketseng ho tsona, 2lōna le bana ba lōna, le tla khutlela ho Morena Molimo oa lōna, 'me le tla mamela lentsoe la hae ka lipelo tsa lōna tsohle, le ka maikutlo a lōna 'ohle, ho latela tsohle tseo ke le laetseng tsona kajeno. 3Morena Molimo oa lōna, o tla le khutlisa bothōpuoeng, a le hauhele, 'me a boele a le phuthe lichabeng tsohle tseo Morena Molimo oa lōna, a le qhalanyelitseng har'a tsona. 4Leha eba ba bang ba lōna ba ka lelekeloa libakeng tse hōle-hōle tsa lefatše, Morena Molimo oa lōna, o tla ba phutha hona moo, 'me a ba late hona teng. 5Morena Molimo oa lōna o tla le khutlisetsa naheng eo e neng e le ea bo-ntat'a lōna, e be ea lōna. Morena o tla le atlehisa, a le ngatafatse ho feta bo-ntat'a lōna. 6Morena Molimo oa lōna, o tla bōlōtsa lipelo tsa lōna, le lipelo tsa bana ba lōna, hore le rate Morena Molimo oa lōna, ka lipelo tsa lōna tsohle, le ka maikutlo a lōna 'ohle, e le hore le tle le phele. 7Morena Molimo oa lōna, o tla otla lira tsa lōna, le ba le hloileng, le ba le hlorisang, ka lithōhako tsena tsohle. 8Le tla khutla, le mamele lentsoe la Morena, 'me le phethe melao eohle ea hae, eo ke le laelang eona kajeno. 9Morena o tla le atlehisa mesebetsing eohle eo le e etsang, a atise bana ba lōna, le tsoala ea liphoofolo tsa lōna, le litholoana tsa masimo a lōna haholo. Morena o tla boela a thabela ho le atlehisa haholo, joalokaha a ile a thabela ho atlehisa bo-ntat'a lōna. 10Feela le mamele lentsoe la Morena Molimo oa lōna, le bōlōke melao le litaelo tsa hae, tse ngotsoeng Bukeng ena ea Molao, 'me le khutlele ho Morena Molimo oa lōna, ka lipelo tsa lōna tsohle, le ka maikutlo a lōna 'ohle.
11“Molao ona oo ke le laelang oona kajeno, ha oa pateha, 'me ha o hōle le lōna. 12Ha o leholimong, hoo le ka reng: ‘Ke mang ea tla re ela leholimong, a re tlisetse oona, 'me a re rute oona, re tle re o phethe?’ 13Ha o ka nq'ane ho leoatle, hoo le ka reng: ‘Ke mang ea tla re tšelela leoatle, a re tlisetse oona, 'me a re rute oona, re tle re o phethe?’ 14Molao ona o haufi haholo le lōna, o malemeng a lōna, o ka lipelong tsa lōna; ho salang feela ke hore le o phethe.
15“Bonang, kajeno ke beile kapele ho lōna bophelo, le lehlohonolo, le lefu, le bomalimabe. 16Kajeno ke le laetse hore le rate Morena Molimo oa lōna, le tsamaee litseleng tsa hae, le bōlōke melao ea hae, le litaelo tsa hae, le litemoso tsa hae, e le hore le tle le phele, 'me le ate. Morena Molimo oa lōna, o tla le hlohonolofatsa naheng eo le eang ho eona, hore e tle e be ea lōna.
17“Empa haeba lipelo tsa lōna li mphuralla, le sa mamele, le khumamela melimo e meng, le e sebeletsa; 18kajeno ke le bolella hore ruri le tla timela. Le ke ke la phela halelele naheng eo le tšelang Jorodane le e-ea ho eona, hore e be ea lōna.
19“Kajeno leholimo le lefatše ke lipaki tsa ka tsa hore ke beile kapele ho lōna bophelo le lefu, tlhohonolofatso le thōhako; ka baka leo, ikhetheleng bophelo, e le hore lōna, le bana ba lōna, le tle le phele. 20Le rate Morena Molimo oa lōna, le mamele lentsoe la hae, le mo khomarele, hobane ke eena ea le phelisang, ea lelefatsang matsatsi a ho phela ha lōna, e le hore le tle le ahe naheng eo Morena a hlapanyelitseng bo-ntat'a lōna Aborahama, Isaka, le Jakobo, hore o tla le nea eona.”
