Iseraele o hlōla khosi Oge
1“Joale ra thinya, ra nyoloha ka tsela e eang Bashane. Oge, khosi ea Bashane, a tsoa a e-na le sechaba sa hae sohle, a re futuhela, a re loantšetsa pel'a Ederei. 2Morena a re ho 'na: ‘Le se ke la tšaba, hobane Oge, 'moho le sechaba sa hae sohle, le naha ea hae, ke neelane ka eena matsohong a lōna. U tla mo etsa seo u neng u se etse Sihone, khosi ea Baamore, ea neng a ahile Heshebone.’
3“Le eena Oge, khosi ea Bashane, le sechaba sa hae sohle, Morena Molimo oa rōna, a neelana ka eena matsohong a rōna, ra mo hlōla ho fihlela ho se le ea mong ea setseng. 4Ka eona nako eo, ra hapa metse ea hae eohle, 'me ha ho motse le o mong oo re sa kang ra o hapa ho bona. E ne e le metse e mashome a tšeletseng, seterekeng sohle sa Aregobe, 'musong oa Oge, naheng ea Bashane. 5Metse ena eohle e ne e sirelelitsoe ka marako a phahameng; e e-na le likhoro, le mekoallo, ntle ho metse e meng e mengata e neng e hloka marako. 6Ra e ripitla ho hang, joalokaha re ile ra etsa ho Sihone, khosi ea Heshebone, moo re ileng ra ripitla metse e nang le baahi, ra bolaea banna, le basali, le bana. 7Empa liphoofolo tsohle, le khapo ea motse, ra ikhapela tsona.
8“Ka eona nako eo ra hapa naha ea likhosi tse peli tsa Baamore, tse neng le le ka koano ho Jorodane, ho tloha khohlong ea Arenone, ho ea fihla thabeng ea Heremone. 9Basidone ba reile Heremone lebitso la Sireone, athe Baamore bona ba e reile lebitso la Senire. 10Ra hapa metse eohle e phuleng, le Gileade eohle, le Bashane eohle, ho ea fihla Saleka, le Ederei, e leng metse ea 'muso oa Oge, e naheng ea Bashane.”
11Ke Oge feela, khosi ea Bashane, eo e leng lesalla la Barefaime. Lekese la hae la bafu e ne e le la tšepe, bolelele ba lona e le limethara tse 'ne, bophara e le limethara tse peli, ho latela ho lekanya ho tloaelehileng ha mehla eo. Lekese leo le sa le teng le kajeno motseng oa Baamone, oa Raba.
Merabe e ileng ea aha ka bochabela ho Jorodane
12“Ka nako eo re neng re hapa naha eo ka eona, ke ile ka abela ba morabe oa Rubene le oa Gade naha, ho tloha Arōoere e pel'a khohlo ea Arenone, le karolo ea thaba ea Gileade, le metse ea eona. 13Karolo e 'ngoe ea Morabe oa Manase ka e abela karolo e setseng ea Gileade, le Bashane eohle, e leng 'muso oa Oge, setereke sohle sa Aregobe, 'moho le Bashane eohle, e leng naha e bitsoang Refaime. 14Jaire, mora oa Manase, a nka setereke sohle sa Aregobe, ho ea fihla moeling oa Bageshure, le oa Bamaaka. Sebaka sena, esita le sa Bashane, a se reella ka eena, a re ke Metse ea Jaire, 'me le kajeno-ea-bokajeno se sa ntse se bitsoa joalo.
15“Makiri eena ka mo abela Gileade. 16Ba morabe oa Rubene le oa Gade ka ba abela ho tloha Gileade, ho ea fihla khohlong ea Arenone; ke hore bohareng ba khohlo le moeli oa eona; le ho ea fihla nōkaneng ea Jaboko, moeling oa bana ba Amone. 17Ka ba abela le phula, le Jorodane, 'moho le naha e mathōkong a eona, ho tloha Kinerete, ho ea fihla leoatleng le phuleng, e leng Leoatle la Letsoai, tlas'a mosiko oa Pisega, ka bochabela.”
Litaelo tsa Moshe tsa ho qetela
18“Ka eona nako eo, ke ile ka le laela, ka re: ‘Morena Molimo oa lōna, o le neile naha ena hore e be ea lōna. Bahlabani bohle ba lōna ba tla tšelela mose ba hlometse, ba eteletse bana babo lōna, bana ba Iseraele, pele. 19Empa ha e le basali ba lōna, le bana ba lōna, le liphoofolo tsa lōna, kea tseba hore le na le liphoofolo tse ngata, tsena li tla sala metseng eo ke le neileng eona. 20Ha Morena a se a ahisitse bana babo lōna, joaloka lōna, 'me le bona ba e-na le naha eo Morena Molimo oa lōna, a ba neileng eona kamose oane ho Jorodane, ke hona he, e mong le e mong a ka khutlelang naheng eo ke le neileng eona.’
21“Joale ke ile ka laela Joshua ka eona nako eo, ka re: ‘Ka mahlo a hao u ile ua bona tsohle tseo Morena Molimo oa hao, a li entseng ho likhosi tsena tse peli; Morena o tla etsa joalo ho mebuso eohle eo le tla feta ho eona. 22Le se ke la e tšaba, hobane Morena Molimo oa lōna, ke eena ea le loanelang.’ ”
Moshe o haneloa ho kena Kanana
23“Eaba ke rapela Morena ka eona nako eo, ke re: 24‘Oho, Morena Molimo, u qalile ho bontša mohlanka oa hao boholo ba hao, le matla a hao. Ke molimo ofe leholimong kapa lefatšeng, ea ka etsang mesebetsi e tšoanang le ea hao, le liketso tse matla, tse tšoanang le tsa hao?
25“ ‘Ak'u ntumelle ke tšelele mose, ke bone naha e ntle, e kamose oane ho Jorodane, le naha ena e ntle ea maralla, le Lebanone.’
26“Empa Morena o ile a nkhalefela ka baka la lōna, 'me ha aa ka a 'mamela. Eaba Morena o re ho 'na: ‘Ho lekane! U se hlole u bua ho 'na ka taba ena! 27Hloella tlhōrōng ea Pisega, u akhele mahlo a hao ka bophirimela, le ka leboea, le ka boroa, le ka bochabela, 'me u bone ka mahlo a hao, hobane ha u ka ke ua tšela Jorodane ena. 28Empa laela Joshua, u mo matlafatse, u be u mo khothatse, hobane eena o tla tšela a eteletse sechaba sena pele, 'me a etse hore naha eo u tla e bona e be ea sona.’
29“Ra lula khohlong e mabapa le Bete-Peore.”
