LIPOLELO 23

₁“Monna eo makoalata a hae a pshatlehileng, kapa ea khaotsoeng botona, a se ke a lumelloa ho kena phuthehong ea Morena.

₂“Ho ea fihla molōkong oa leshome, ngoana ea tsoetsoeng ke batho ba mofuta o sa tšoaneng, a se ke a lumelloa phuthehong ea Morena.

₃“Moamone kapa Momoabe, kapa litlōhōlō tsa bona, ho ea fihla molōkong oa leshome, ba se ke ba lumelloa ho kena ka phuthehong ea Morena kamehla eohle, ₄hobane ha baa ka ba le thusa ka lijo le ka metsi leetong la lōna ha le e-tsoa Egepeta. Hape ba ile ba le neella ka Bileame, mora oa Beore, ha le le Petore e Mesopotamia, hore a le rōhake. ₅Empa Morena Molimo oa lōna, ha aa ka a mamela Bileame, 'me Morena Molimo oa lōna, o ile a fetola thōhako eo hore e be tlhohonolofatso ho lōna, hobane Morena Molimo oa lōna, a ne a le rata., ₆U se ke ua sebeletsa khotso ea bona kapa boiketlo ba bona ka matsatsi 'ohle a bophelo ba hao.

₇“U se ke ua nyonya Moedomo, hobane ke ngoan'eno. U se ke ua nyonya Moegepeta, hobane u ne u le mojaki naheng ea habo. ₈Bana ba molōko oa boraro, ba tsoetsoeng ke bona, ba ka amoheloa phuthehong ea Morena.”

₉“Ha le le liahelong, ka nako eo le futuhetseng lira tsa lōna ka eona, le khese tsohle tse silafatsang. ₁₀Haeba e mong oa lōna a ka silafala bosiu, ka baka la ho ntšetsa metsi a bonna liphateng, o tla tsoela kantle ho liahelo, a se ke a khutlela ka ho tsona hape. ₁₁Ha letsatsi le sekama o tla tola ka metsi, 'me ha le se le liketse a ka khutlela ka liahelong.

₁₂“Kantle ho liahelo ho tla ba le sebaka se khethetsoeng hore ebe sa mohlabana. ₁₃Har'a thepa ea hao u be le kharashoana, 'me ha u tsoela kantle ho ea ithōma, u qale ka ho cheka mokoti oa ho ithōmela, 'me ha u qetile ho ithōma u koahelle mantle a hao ka mokoting oo. ₁₄Morena Molimo oa hao o tsamaea le uena har'a liahelo ho u sireletsa, le ho neelana ka lira tsa hao matsohong a hao. Liahelo tsa hao eka khona li halalele, esere Morena a bona ho hong har'a lōna ho silafetseng, 'me a le furalla.”

₁₅“Lekhoba le tšabetseng ho uena u se ke ua le khutlisetsa ho mong'a lona eo le balehileng ho eena. ₁₆U le tlohele le phele le uena ha hao, kapa le phele motseng ofe kapa ofe oo le ratang ho lula ho oona. U se ke ua le hatella.”

₁₇“Ho se be moroetsana oa Moiseraele kapa monna oa Moiseraele, ea ka etsang bootsoa ka tempeleng. ₁₈U se ke ua lumella hore chelete e lefang seotsoa, kapa e lefang monna ea khethetsoeng ho etsetsa bohlola ka tempeleng, e tlisoe ka tlung ea Morena Molimo oa hao, ho lefella kano efe kapa efe. Bobeli ba lintho tsena ke manyala ho Morena Molimo oa hao.

₁₉“U se ke ua lefisa ngoan'eno tsoala holim'a seo u mo alimileng sona; e ka ba tsoala ea chelete, kapa tsoala ea lijo, kapa tsoala ea eng le eng eo ho eeng ho lefisoe motho tsoala ha e alimiloe. ₂₀U ka lefisa molichaba tsoala, empa ho ngoan'eno u se ke ua batla tsoala, e le hore Morena Molimo oa hao, a tle a u hlohonolofatse mesebetsing eohle eo u e etsang naheng eo u tla fihla ho eona, hore e be ea hao.

₂₁“Ha u etsetsa Morena Molimo oa hao kano, u se ke ua lieha ho e phethahatsa, hobane ruri Morena Molimo oa hao, o batla hore u e phethahatse; ho seng joalo, e tla ba u entse sebe. ₂₂Empa haeba u sa etsa kano, ha e tl'o ba u entse sebe. ₂₃Seo u se buileng ka molomo oa hao, u tla hlokomela hore u se etse. U se etse ho ea kamoo u ikanetseng Morena Molimo oa hao kateng; u fane ka nyehelo ea boithaopo joalokaha u buile.

₂₄“Ha u kena tšimong ea morara ea oa heno, u ka ja morara oa eona kamoo u ratang kateng, ua khora, empa u se ke ua o tšèla ka serōtōng sa hao. ₂₅Ha u kena tšimong ea koro ea oa heno, u ka ja matšohlo, empa u se ke ua hèla koro ea mohaeno.”