Ho hlokomela phoofolo tsa malahleha
1“E se ke eare ha u bona pholo ea motho e mong, kapa nku ea hae e lahleha, eaba u iphapanyetsa eona. Ruri eka khona u e khutlisetse ho eena. 2Empa haeba motho eo a se haufi le uena, kapa u sa tsebe hore na ke mang, u tla e isa sakeng la hao, e be moo ho uena ho fihlela motho eo a e batla, 'me ebe u e khutlisetsa ho eena. 3U tla etsa joalo le ka tonki ea hae, u etse joalo le ka seaparo sa hae, 'me u tla etsa joalo le ka lintho tsohle tse lahlehetseng motho e mong, tseo u li fumanang. U se ke ua iphapanyetsa tsona.
4“E se ke eare ha u bona tonki ea motho e mong, kapa pholo ea hae e bothisitse pel'a tsela, eaba u iphapanyetsa eona. Ruri eka khona u mo thuse ho e tsosa.”
Le se ke la aparelana
5“Mosali a se ke a apara seaparo sa banna, le monna a se ke a apara seaparo sa basali, hobane e mong le e mong ea etsang lintho tsena ke manyala ho Morena Molimo oa hao.”
Paballo ea linonyana
6“Haekare u ntse u tsamaea tseleng ua tholla nonyana holim'a sefate sefe kapa sefe, kapa fatše, e e-na le malinyane kapa mahe, 'me nonyana eo e fuame malinyane kapa e alame mahe, u se ke ua ntšetsa nonyana eo le malinyane a eona. 7Ruri eka khona u tlohele nonyana e fofe, empa malinyane 'ona u ka a ntšetsa, e le hore u tle u atlehe, 'me u phele halelele.”
Melao ea mefuta-futa
8“Ha u haha ntlo e ncha, lintšing tsa marulelo a eona a sepapetloa u hahe motero o a pota-potang, e le hore ntlo ea hao e se ke ea ba le molato oa ho tšoloha ha mali, haeba motho a ka oa a le holim'a eona.
9“U se ke ua jala mefuta e 'meli ea lipeō tšimong ea hao ea morara, esere kotulo eohle ea seo u se jetseng, le litholoana tsohle tsa morara, tsa u phonyoha.
10“U se ke ua lema ka pholo u e panne le tonki.
11“U se ke ua apara seaparo se lōhiloeng ka boea le sa lesela la lene.
12“U iketsetse litjellane liqoleng tse 'ne tsa seaparo sa hao, seo u itšophang ka sona.”
Kahlōlo ea ba etsang bohlola
13“Ha monna a nyala mosali, 'me ere hoba a robale le eena a utloe a se a mo tenne; 14ebe o mo qosa ka tseo e seng 'nete, o 'mua hampe, o re: ‘Ke ile ka nyala mosali enoa, empa ha ke qala ho robala le eena ke ile ka fumana e se e se moroetsana;’ 15ntat'ae le 'm'ae ba tla hlahisa kapele ho baholo bopaki ba hore ke moroetsana, ba le khorong ea motse. 16Ntat'a moroetsana o tla re ho baholo: ‘Ke ile ka nea monna enoa morali oa ka hore a mo nyale, empa o se a mo tenne. 17Joale o mo qosa ka seo e seng 'nete, o re: Ke fumane morali oa hao e se e se moroetsana. Empa bopaki ba hore morali oa ka ke moroetsana ke bona!’ Ba tla ala lesela kapele ho baholo ba motse. 18Joale baholo ba motse ba tla tšoara monna eo, ba mo shape; 19ba be ba mo lefise silefera e ka etsang boima ba kilo e le 'ngoe, ba e nee ntat'a moroetsana, hobane monna eo o sentse moroetsana oa Iseraele lebitso. Leha ho le joalo, e tla 'ne e be mosali oa hae, 'me ha monna eo a ntse a phela a ke ke a hlala mosali eo.
20“Empa haeba qoso ena e le ea 'nete, ho sa fumanoe bopaki ba hore ngoanana eo ke moroetsana, 21ngoanana eo o tla isoa monyakong oa ntlo eabo, ebe banna ba motse oa habo ba mo tlepeletsa teng ka majoe, a be a shoe, hobane o sitetsoe Iseraele ka ho etsa bohlola a ntse a le lapeng labo. Ka mokhoa ona, u tla felisa bokhopo kahar'a lōna.
22“Haeba monna a fumanoa a feba le mosali oa monna e mong, monna eo le mosali eo ea neng a feba le eena, ba tla bolaoa bobeli ba bona. Ka mokhoa ona, u tla felisa bokhopo kahar'a lōna.
23“Haeba moroetsana ea seng a lebelelitsoe a teana le monna har'a motse, 'me monna eo a feba le eena, 24bobeli ba bona u tla ba ntšetsa kantle ho khoro ea motse, ba tlepeletsoe teng ka majoe, ba be ba shoe. Ngoanana a bolaoe hobane ha aa ka a hlaba mokhosi le hoja a ne a le kahar'a motse, monna le eena a bolaoe hobane a tlontlolotse mosali oa monna e mong. Ka mokhoa ona, u tla felisa bokhopo kahar'a lōna.
25“Empa haeba monna eo a teana le moroetsana eo ea lebelelitsoeng ba le har'a naha, eba oa 'meta, 'me o robala le eena, ho tla bolaoa monna eo a le mong. 26Moroetsana eena ha u na ho mo etsa letho, kaha a sa etsa letho le lokeloang ke lefu. Ketso ena e tšoana le ea monna ea tsohelang motho e mong matla, eba oa 'molaea. 27Monna enoa o fumane moroetsana har'a naha, 'me leha eba moroetsana enoa ea lebelelitsoeng a ne a ile a hlaba mokhosi, ho ne ho se ea ka mo thusang.
28“Haeba monna a fumana moroetsana ea sa lebeletsoang, eba oa 'meta, o robala le eena, 'me ketso eo ea bona ea hlahela; 29monna eo ea robetseng le moroetsana eo o tla lefa ntat'a moroetsana silefera e ka etsang boima ba halofo ea kilo e le 'ngoe, a be a mo nyale, hobane o mo lihile letsoele. Ha monna eo a ntse a phela a ke ke a hlala mosali eo.
30“Monna a se ke a nyala mohats'a ntat'ae kapa a tlontlolla ntat'ae.”
