Sebete ntoeng
1“Ha le futuha, le e-ea ntoeng ho ea loantša sera sa lōna, 'me le bona lipere le likariki tsa ntoa, le batho ba le fetang ka bongata, le se ke la ba tšaba, hobane 'na Morena Molimo oa lōna, ea le nyolotseng naheng ea Egepeta, ke na le lōna.
2“Ha le le lekhatheng la ho loana, moprista o tla atamela, a bue le bahlabani, 3a re ho bona: ‘Mamelang, lōna Baiseraele! Kajeno le thulana le lira tsa lōna ntoeng. Le se ke la nyahama lipelo; le se ke la tšaba, kapa la ferekana, kapa la tšosoa ke lira. 4Morena Molimo oa lōna, ke eena ea tsamaeang le lōna ho ea le loanela, le ho le hlōlela lira tsa lōna, le ho le pholosa.’
5“Joale baokameli ba tla bua le bahlabani, ba re: ‘Na ho na le monna ea hahileng ntlo e ncha, eo a e-s'o e khakōle? Ha a khutlele tlung ea hae, esere a bolaoa ntoeng, 'me ea khakōloa ke monna e mong. 6Na ho na le monna ea lemileng tšimo ea morara, ea e-s'o je litholoana tsa eona? Ha a khutlele tlung ea hae, esere a bolaoa ntoeng, 'me litholoana tsa eona tsa jeoa ke monna e mong. 7Na ho na le monna ea lebelelitseng moroetsana, ea e-s'o mo nyale? Ha a khutlele tlung ea hae, esere a bolaoa ntoeng, 'me moroetsana eo a nyaloa ke monna e mong.’ 8Baokameli ba tla bua le bahlabani hape, ba re: ‘Na ho na le monna ea tšohileng, ea boi? Ha a khutlele tlung ea hae, esere a nyahamisa bana babo lipelo, joalokaha ea hae e nyahame.’
9“Ha baokameli ba qetile ho bua le bahlabani, ba tla khetha balaoli ba mabōtho ho a etella pele.”
Metse ea ba lireng
10“Ha le atamela motse oo le o futuhelang, le o tsebise lipallo tseo ho ka etsoang khotso ka tsona. 11Haeba motse oo o amohela lipallo tseo tsa khotso, 'me o le lumella hore le kene ho oona, batho bohle ba fumanoang ka ho oona e tla ba makhoba a lōna, 'me ba tla le sebeletsa. 12Empa haeba motse oo o sa amohele lipallo tseo tsa khotso, o le loantša, le tla o etsetsa thibella. 13Ha Morena Molimo oa lōna, a le neela motse oo matsohong, le bolaee e mong le e mong e motona ka sabole. 14Empa ha e le basali, le bana, le likhomo, le tsohle tse kahar'a motse, esita le khapo eohle, le tla inkela tsona e le tse hapiloeng, 'me le tla ja khapo ea lira tsa lōna, eo Morena Molimo oa lōna, a le neileng eona.
15“Le tla etsa joalo ho metse eohle e hōle le lōna, eo e seng ea lichaba tsena. 16Empa ha e le metse ea lichaba tsena tseo Morena Molimo oa lōna, a le neang tsona hore e be lefa la lōna, teng le se ke la siea letho le phelang. 17Ha e le Bahete le Baamore, Bakanana le Baperise, Bahife le Bajebuse, bona le ba timetse ho hang, joalokaha Morena a le laetse; 18esere ba le ruta ho etsa manyala 'ohle a bona, ao ba a etselitseng melimo ea bona, 'me eaba le siteloa Morena Molimo oa lōna.”
Lifate tsa motse o thibeletsoeng
19“Ha le etselitse motse thibella ka nako e telele, le o loantša hore le o hape, le se ke la senya lifate tsa oona ka ho li rema ka selepe. Le ka 'na la ja litholoana tsa tsona, empa le se ke la li rema, hobane na sefate sa naha ke motho, hoo le ka se etsetsang thibella le sona? 20Ke lifate feela tseo le tsebang hore hase lifate tse ka jeoang, tseo le ka li senyang, 'me la li rema; ebe le haha metero ea ho thibella motse oo le loanang le oona, ho fihlela o ineela.”
