Daniele o bona pheleu le phooko
1Ke selemo sa boraro sa puso ea khosi Beleshasare, 'na Daniele, ke ile ka bona pono e 'ngoe hape, ntle ho lipono tseo ke neng ke ile ka li bona pele. 2Ponong ena ka iphumana ke le Shushane, ka tlung ea bokhosi, naheng ea Elame. Ke ne ke eme lebōpong la nōka ea Ulai. 3Ha ke lelatsa mahlo a ka, ke talima, ka bona pheleu e eme lebōpong la nōka. Pheleu ena e ne e metse manaka a mabeli, a malelele. Empa le leng, le neng le ile la mela morao ho le leng, le ne le feta le leng ka bolelele. 4Ka bona pheleu ena e khorohela bophirimela, le lebōea, le boroa. Ho ne ho se sebatana se ka e emang kapele, kapa motho ea ka pholosang e mong ho eona. E ne e iketsetsa seo e se ratang, e bile e ikhōhōmōsa.
5Ha ke ntse ke talimile, ka bona phooko e e-tsoa bophirimela, e haola lefatše lohle, empa e sa hate fatše. Phooko ena e ne e e-na le lenaka la mophekapheka phatleng. 6Phooko ena ea fihla ho pheleu eane e naka li peli, eo ke boneng e eme lebōpong la nōka, 'me ea e khorohela ka sekhahla se seholo. 7Ka e bona e atamela pel'a pheleu, e e halefetse haholo. Ea fihla ea thula pheleu, ea roba manaka a eona a mabeli. Kaha pheleu e ne e se na matla a ho thula, phooko ea e lihela fatše, ea e hatakela, 'me ho ne ho se motho ea ka namolelang pheleu eo.
8Ka baka leo, phooko ea ikhōhōmōsa haholo, empa ha matla a eona a ntse a eketseha, lenaka la eona le mophekapheka la robeha, eaba bakeng sa lona ho mela manaka a mang a mane, a mephekapheka, a shebileng liqoleng tse 'ne tsa lefatše. 9Lenakeng le leng ha mela lenaka le lenyenyane, le ileng la hōla haholo, matla a lona a tsejoa boroa, le bochabela, le naheng e khahlehang. 10Lenaka lena la matlafala haholo, hoo le bileng la futuhela le mabōtho a leholimo, la lihela fatše karolo e 'ngoe ea mabōtho ana e leng linaleli tse ling, 'me la e hatakela. 11La ba la nyelisa le eona khosana ea mabōtho ana, la felisa sehlabelo se etsoang ka letsatsi le letsatsi, la silafatsa le Sehalalelo. 12Ka baka lena, batho ba etsa sebe bakeng sa ho etsa linyehelo tsa letsatsi ka leng. 'Nete ea lahleloa fatše, 'me lenaka la atleha ho tsohle tseo le li etsang.
13Joale ka utloa mohalaleli e mong a bua, 'me e mong hape a botsa eo ea buang, a re: “Lintho tsee tse bonoeng ponong li tla ba teng ho fihlela neng? E tla ba nako e kae ho ntse ho etsoa manyala bakeng sa ho etsa linyehelo tsa letsatsi ka leng, ho hatakeloa mabōtho a leholimo le Sehalalelo?”
14Ea botsoang a araba, a re: “E tla ba matsatsi a likete tse peli le makholo a mararo. Kamora' moo, Sehalalelo se tla hloekisoa.”
Lengeloi Gabariele le hlalosa pono
15Eare moo 'na Daniele, ke ntseng ke leka ho utloisisa seo pono eo ke e boneng e se bolelang, hang-hang ka bona e mong ea kang motho, a eme pel'a ka. 16Ka utloa lentsoe la ea hōoeletsang a le kahar'a nōka ea Ulai, le re: “Gabariele! Hlalosetsa monna eo pono ena!”
17Eaba o atamela moo ke emeng teng. Ha a fihla ka tšoha haholo, ka itihela fatše ka sefahleho. Empa eena a re ho 'na: “Utloisisa, uena ngoan'a motho, hore pono ena e supa mehla ea bofelo.”
18Ha a ntse a bua le 'na ke ne ke akhehile, sefahleho sa ka se ntse se le fatše, empa a ntšisinya, a nkemisa ka maoto.
19Eaba o re: “Ke tla u bolella tse tla etsahala mohl'a khalefo e felang, hobane li amana le mehla ea bofelo.
20“Pheleu e naka li peli, eo u e boneng, e emetse likhosi tsa Media le Peresiea. 21Phooko e makhisa ke khosi ea Gerige, 'me lenaka le mophekapheka, le phatleng ea eona, ke khosi ea pele. 22Manaka a mane a ileng a mela ha leo la pele le robeha, a tšoantša mebuso e tla theoa har'a sechaba seo, empa mebuso eo e ke ke ea e-ba matla joaloka 'muso oa pele.
23“Mehleng ea qetelo ea mebuso eo,
ha sebe se atile ka ho fetisisa,
khosi e lōnya, e sōrō, e tla hlaha,
khosi e hlalefetseng tsohle,
tsohle tsa bolotsana.
24Bonatla ba eona bo tla ba boholo,
feela ha e tl'o ba ba eona,
ba eona ka seqō;
ho timetsa ha eona
e tla ba limakatso,
e atlehe ho tsohle tseo e li etsang,
e timetse linatla le bahalaleli.
25Ka maqiti a eona
bolotsana bo tla atleha,
ka pelong ea eona
boikhōhōmōso bo tōte,
ba bangata e ba timetse
hoja ba iketlile.
E tla futuhela
le Khosana ea mahosana,
qetellong e ripitloe
e se ka letsoho la motho.
26“Pono ea mahlabelo
a mantsiboea le a hoseng,
pono eo e senotsoeng
ho uena ke ea 'nete;
feela uena u e etse bofihla ba hao,
hobane tsa eona
ke tsa mehla e tlang.”
27Eaba 'na Daniele, kea akheha, 'me ka qeta matsatsi a mangata ke kula. Hamorao ke ile ka tsoha, ka 'na ka phetha mesebetsi eo ke neng ke e abetsoe ke khosi. Pono ena e ile ea 'makatsa, empa ha ho motho ea neng a ka e utloisisa.
