Daniele o akheloa ka mokoting o moholo
1Dariuse a rera ho khetha mahosana a lekholo le mashome a mabeli ho okamela 'muso oa hae. 2Kaholimo ho mahosana ana a bea baokameli ba bararo, 'me Daniele e ne e le e mong oa bona. Mahosana a ne a ikarabella ho bona, e le hore khosi e se ke ea senyeheloa ke letho. 3Daniele a ikhetha har'a baokameli le mahosana, hobane moea oa bohlale o ne o le ka ho eena. Kahoo khosi ea rera ho mo etsa mookameli oa puso eohle.
4Eaba baokameli le mahosana ba batla leqheka leo ba ka qōsang Daniele ka lona, malebana le kamoo a busang kateng, empa ba sitoa ho fumana leqheka kapa oona molato. Kaha a ne a tšepahala, ha baa ka ba fumana phoso kapa molato ho eena.
5Banna bana ba re: “Re ke ke ra fumana lebaka leo re ka qōsang Daniele ka lona, haese haeba e le taba e amanang le molao oa Molimo oa hae.”
6Eaba baokameli le mahosana ana ba phuthehela ho khosi, ba bua le eona, ba re: “Uena khosi Dariuse, ak'u re phelele! 7Baokameli bohle ba puso, le babusisi, le mahosana, le baeletsi, le balaoli, ba lumellane kaofela hore khosi e etse molao, e be e laele ka thata hore ka matsatsi a mashome a mararo a tlang, mang kapa mang ea tla etsa thapeli ho molimo osele kapa ho motho e mong, haese ho uena feela, khosi, a akheloe ka mokoting o moholo oa litau. 8Joale, uena khosi, etsa taelo eo, e be e ngoloe, e le hore e tle e se ke ea fetoha, joaloka melao ea Bamede le Maperesiea e ke keng ea fetoloa.”
9Eaba khosi Dariuse o re taelo eo e ngoloe.
10Hoba Daniele a utloe hore taelo e joalo e entsoe, a ea lapeng ha hae. Lifesetere tsa kamore ea hae e kaholimo li ne li bulehile, li shebile nq'a Jerusalema. A khumama fatše hararo ka letsatsi, a rapela, a leboha Molimo oa hae, joalokaha a ne a 'nile a etsa pele ho moo.
11Banna bao ba phutheha, 'me ba fumana Daniele a ntse a rapela, a etsa thapeli ho Molimo oa hae. 12Ba ea ho khosi, ba bua le eona ka taelo eo e e entseng, ba re: “Na ha ua ka ua etsa taelo e reng ka matsatsi a mashome a mararo a tlang, mang kapa mang ea rapelang molimo osele kapa motho e mong, haese uena feela, khosi, motho eo o tla akheloa ka mokoting o moholo oa litau?”
Khosi ea ba araba, ea re: “Ke 'nete, ho joalo, ho ea ka molao oa Bamede le Maperesiea o ke keng oa fetoloa.”
13Eaba ba re ho khosi: “Daniele, e mong oa bathōpuoa ba tsoang naheng ea Juda, ha a re letho ka uena, khosi, leha e le ho natsa taelo eo u e entseng; o ntse a rapela Molimo oa hae hararo ka letsatsi.”
14Ha khosi e utloa taba ena ea hlabeha haholo, 'me ea nahana kamoo e ka pholosang Daniele kateng; letsatsi la ba la likela e ntse e nahana kamoo e ka mo pholosang kateng.
15Joale banna bao ba phuthehela ho khosi, ba fihla ba re ho eona: “Ua tseba, uena khosi, hore molao oa Bamede le Maperesiea o re ha ho taelo kapa molao o entsoeng ke khosi o ka fetoloang.”
16Eaba khosi e laela hore ba tlise Daniele, 'me ba mo akhela ka mokoting o moholo oa litau. Joale khosi ea re ho Daniele: “Molimo oa hao, eo u mo sebeletsang ka botšepehi, o tla u pholosa!”
17Ba phikolosetsa lejoe monyako oa mokoti o moholo, ba o koala, 'me khosi ea tiisa lejoe ka lesale la eona la tiiso, le ka masale a tiiso a mahosana a eona, e le hore morero o entsoeng ka Daniele o tle o se ke oa fetoloa. 18Khosi ea ikhutlella tlung ea eona ea bokhosi, ea qeta bosiu e sa je letho, ho se le liletsa tseo e li letsetsoang, 'me ea hlobaela.
19Khosi ea tsoha ka malungoalungoana, ea potlakela mokoting o moholo oa litau. 20Ha e fihla mokoting o moholo oa litau ea hōoeletsa Daniele e tšoenyehile, ea re: “Daniele oee! mohlanka oa Molimo ea phelang, na Molimo oa hao eo u mo sebeletsang ka botšepehi o u pholositse litaung?”
21Eaba Daniele o re ho khosi: “Uena khosi, ak'u re phelele! 22Molimo oa ka o ile a rōmela lengeloi la hae hore le thibe melomo ea litau, li se ke tsa nketsa letho, hobane o fumane ke se na molato, 'me le uena khosi, ha ke e-s'o u etsetse bobe ba letho.”
23Khosi ea thaba haholo, 'me ea laela hore Daniele a ntšoe ka mokoting o moholo oa litau. Eaba Daniele oa ntšoa, 'me a fumanoa a se na le mongoaponyana feela, hobane o ne a tšepa Molimo oa hae.
24Khosi ea laela hore ho tlisoe banna ba ileng ba qōsa Daniele, 'me banna bao, le bana ba bona, le basali ba bona ba akheloa ka mokoting o moholo oa litau. Hang feela ba e-s'o ka ba re qi! fatše, kahar'a litau, litau tseo tsa ba qhautsa, tsa ba robokela kaofela ha bona.
25Eaba khosi Dariuse o ngolla ba lichaba tsohle, le ba merabe eohle, le ba lipuo tsohle, ba lefatšeng lohle, o re:
“Khotso e ke e le atele!
26“Ke etsa taelo ea hore linaheng tsohle tse pusong ea ka, batho ba tšabe, 'me ba hlomphe Molimo oa Daniele.
“Ke Molimo ea phelang,
ea phelang kamehla eohle,
'muso oa hae o ke ke oa timetsoa,
matla a hae a ke ke a felisoa.
27Oa pholosa o bile oa lopolla,
o etsa mehlolo le limakatso,
a li etse leholimong,
a li etse le lefatšeng;
o namoletse Daniele,
a mo namolela tleneng tsa litau!”
28Daniele a atleha haholo pusong ea Dariuse le ea Siruse oa Peresiea.
