1Lōna Baiseraele, mamelang seo Morena a le bolellang sona, lōna sechaba sohle seo a se ntšitseng naheng ea Egepeta:
2“Har-a lichaba tsohle tsa lefatše,
ke lōna feela ke ileng ka le khetha;
ka baka leo, ke tla le otla,
ke le otlele makhopo a lōna,
makhopo a lōna kaofela.”
Thōmo ea moporofeta
3Na ba babeli
ba ka tsamaisana tsela
ba sa ka ba lumellana ho etsa joalo?
4Na tau e ka puruma har'a moru,
ea puruma e sa bolaea nyamatsane?
Na taoana e ka rora
ka selaong sa eona,
ea rora ho se seo e se tšoereng?
5Na nonyana e ka tšoasoa ke leraba,
la e tšoasa le sa chehoa ke motho?
Na sefi se ka raha mokhoephetsane,
ho se letho
le thetsitseng mokhoephetsane?
6Ha lenaka le palaola har'a motse,
na sechaba ha se ke se thōthōmela?
Ha koluoa e oela motse holimo,
na hase Morena
ea tlisitseng koluoa eo?
7Ruri Morena Molimo
ha a ke a etsa letho
a e-s'o senole morero oa hae,
a o senolela bahlanka ba hae,
bahlanka ba hae, baporofeta.
8Joale tau e se e purumile;
ea ke keng a tšoha ke mang?
Morena Molimo o s'a buile;
ea ke keng a porofeta ke mang?
Ho timetsoa ha Samaria
9Hlabang mokhosi,
le o hlabele likoele,
likoele tsa Ashedode,
le o hlabele lea Egepeta, le re:
“Phuthehelang lithabeng,
thabeng tsa Samaria,
le bone meferefere e kahar'a motse,
le bone khatello
e har'a baahi ba oona.
10“Ba bokellang qhoqha,
ba bokelle khapo,
ba e bokelle ka matlung
a likoele tsa bona,
ha ba tsebe
ho etsa ho nepahetseng,”
rialo Morena.
11Ka baka leo, Morena Molimo o re:
“Sera se tla futuhela naha,
se e futuhele kahohle,
marako a lōna a tšireletso
se a heletse,
matlotlo a matlo
a likoele tsa lōna se a hahare.”
12Morena o bua tjena:
“Joalokaha molisa
a hlōtha hanong la tau
meomo e 'meli feela
kapa ntlhana ea tsèbè,
Baiseraele le bona
ba tla pholosoa joalo,
bona ba phelang naheng ea Samaria,
motho a nkile
tsekana sa moalo oa hae,
kapa a nkile
otoana la setulo sa hae.
13“Mamelang, 'me bopaki ba lōna bo qōse ntlo ea Jakobo,” ho rialo Morena, Morena Molimo oa mabōtho.
14“Mohla ke otlang Baiseraele,
ke ba otlela libe tsa bona,
ke tla heletsa lialetare,
aletare tsa Bethele;
manakana a aletare a tla khaoloa,
a khaoloe, a be a oele fatše.
15Ntlo e luloang mariha
ke tla e heletsa,
ke heletse le e luloang hlabula;
matlo a khabisitsoeng,
a khabisoa ka manaka a tlou,
a tla heletsoa,
mehohoma ea matlo
e fetohe masupi,”
ho rialo Morena.
