Nyeoe ea Paulosi
1Kamora' matsatsi a mahlano Moprista e Moholo, Ananiase, a theoha le baholo ba bang, le 'muelli e mong ea bitsoang Teretulose, ba qōsa Paulosi kapele ho 'musisi. 2Hoba Paulosi a bitsoe, Teretulose a qala nyeoe, a re: “Mohlomphehi Felekise ea khabane, ke ka uena re fumaneng khotso e tiileng. Linchafatso li bile teng sechabeng sena ka ho ba seli ha hao. 3Kamehla, le kahohle, re li amohela ka teboho e kholo. 4Empa, hore ke se u senyetse nako, ke rapela hore u k'u be le mamello ho re utloa ho se hokae.
5“Re fumana monna enoa a le kotsi-kotsi, a fehla moferefere har'a Bajuda lefatšeng lohle, e bile e le moetapele oa mokha oa Banasaretha. 6O lekile le ho tlontlolla Tempele, ra ba ra rata ho mo ahlōla ka Molao oa rōna. 7Empa Lōsiase, molaoli oa ba sekete, o fihlile a mo nka matsohong a rōna ka likhōka. 8O bile o laetse baqōsi ba hae ho tla kapele ho uena. Ha u se u mo hlahlobisisitse, u tla tseba ka ho tlala tsohle tseo re mo qōsang ka tsona.”
9Bajuda le bona ba mo tlatsa, ba re tseo li joalo.
Paulosi o ikarabella kapele ho Felekise
10Hoba 'musisi a mo hoèhlè hore a bue, Paulosi a araba, a re: “Ka ho tseba hore u bile moahlōli oa sechaba sena ka lilemo tse ngata, ke thabela haholo ho ikarabella holim'a tseo ke qōsoang ka tsona. 11Joalokaha u ka tseba, ha ho e-s'o fete matsatsi a leshome le metso e 'meli ho tloha ha ke nyolohela Jerusalema, ho ea khumamela Molimo. 12Ha ba ea ka ba mphumana ka Tempeleng ke buisana le motho, kapa ke tsosa moferefere har'a letšoele, leha e le ka tlung ea thapelo kapa har'a motse. 13Le tseo ba nqosang ka tsona ha ba ka ke ba tseba ho li pakahatsa. 14Ke ipolela ho uena hore Tsela ena eo ba reng ke ea mokha osele, ke eo ke rapelang Molimo ka eona. Empa ke ntse ke lumela tsohle tse lumellanang le Molao le tse ngotsoeng libukeng tsa Baporofeta. 15Hape ke na le tšepo eo le bona ba nang le eona ho Molimo, ea hore ba lokileng le ba khopo ba tla tsoha bafung. 16Ka hona ke leka hore kamehla ke be le letsoalo le khutsitseng pel'a Molimo le batho.
17“Joale kamora' lilemo tse ngata, ke tlisitse lithuso ho sechaba sa heso le ho tla etsa mahlabelo. 18Ba mphumane ke le ka Tempeleng, ke itlhoekisitse, ho se na letšoele kapa moferefere. 19Empa ho ne ho e-na le Bajuda ba bang ba tsoang Asia, bao haeba ba ne ba e-na le qōso ho 'na, ba ka beng ba le teng kapel'a hao ho nqōsa. 20Kapa bona bana ba bolele molato oo ba o fumaneng ha ke ne ke eme kapele ho lekhotla; 21haese haeba ke ka baka la polelo ena e le 'ngoe, eo ke e buileng ke eme har'a bona, ka re: ‘Kajeno ke ahlōloa kapele ho lōna ka taba ea tsoho ea bafu.’ ”
22Joale Felekise ka ho tsebisisa tse ngata tsa Tsela ena a thisisa nyeoe, a re: “Ke tla etsa qeto tabeng ea lōna ha molaoli oa ba sekete, Lōsiase, a se a fihlile.” 23A laela molaoli oa ba lekholo hore a lise Paulosi, feela a be le bolokolohi bo itseng, 'me a se thibele motho ofe kapa ofe oa ba habo ho mo thusa.
Paulosi o bōlōkoa chankaneng
24Kamora' matsatsi a seng makae, Felekise a tla le mohats'a hae, Derusilla, oa Mojuda, 'me a bitsa Paulosi, a mo mamela ha a bolela tsa tumelo ho Jesu Kreste. 25Eare ha a ntse a bua ka ho loka, le boitšoaro, le kahlōlo e tlang, Felekise a tšoha, a re: “Hajoale u ka tsamaea; ke tla u bitsa hamorao, ha ke e-na le nako.” 26Ebile o ne a tšepile hore Paulosi o tla mo ntšetsa tjotjo, 'me ka baka leo a 'na a 'mitsa khafetsa, a buisana le eena.
27Kamora' lilemo tse peli Felekise a hlahlangoa ke Porokiose Fesetore, 'me ka ho rata ho khahlisa Bajuda, Felekise a siea Paulosi litlamong.
