Ho tla ha Moea o Halalelang
1Ha letsatsi la Pentekonta le fihla, bohle ba ne ba phuthehetse sebakeng se le seng. 2Hang-hang ha e-ba le molumo o tsoang leholimong, o kang oa moea o matla, 'me oa tlala ntlo eohle eo ba neng ba lutse ka ho eona. 3Ba bona ho hlaha maleme a kang malakabe; a arohana, a lula ka bonngoe holim'a e mong le e mong oa bona. 4Bohle ba tlala Moea o Halalelang, 'me ba qala ho bua ka lipuo lisele, kamoo Moea o neng o ba buisa kateng.
5Moo Jerusalema, ho ne ho ahile Bajuda, banna ba tšabang Molimo, ba tsoang lichabeng tsohle tse teng tlas'a letsatsi. 6Ha molumo ona o utloahala, batho ba bangata ba phutheha, 'me ba ferekana, hobane e mong le e mong o ne a utloa ba bua ka puo ea habo. 7Ba hlolloa, 'me ba tsota, ba re: “Helang! Na baa bohle ba buang hase Bagalelea? 8Ho tla joang hore re ba utloe ba bua puo eo e mong le e mong oa rōna a tsoaletsoeng ho eona? 9Re le Baparathia, le Bamedia, le Baelame, le baahi ba Mesopotamia, le ba Judea, le ba Kapadokia, le ba Pontose, le ba Asia; 10re le le ba Firigia, le ba Pamfilea, le ba Egepeta, le libaka tsa Lebia tse haufi le Sirene, le baeti ba tsoang Roma; 11re le Bajuda le basokolohi, Bakerete le Maarabia, re ba utloa ba bolela mesebetsi e meholo ea Molimo ka lipuo tsa habo rōna!” 12Bohle ba hlolloa, ba tsieleha, 'me ba botsana, ba re: “Hoo ho bolela'ng?”
13Empa ba bang ba ba soma, ba re: “Ba tahiloe ke veine.”
Puo ea Petrose mohl'a letsatsi la Pentekonta
14Eaba Petrose, a e-na le ba leshome le motso o mong, oa ema, o phahamisa lentsoe, o re ho bona: “Banna ba Judea, le lōna baahi bohle ba Jerusalema, tsebang sena, 'me le mamele mantsoe a ka ka tsebe e lethoethoe. 15Banna bana ha baa tahoa joalokaha le hopola, hobane e sa le hora ea borobong, hoseng. 16Empa sena ke se boletsoeng ke moporofeta Joele, ha a re:
17“ ‘Ha matsatsi a bofelo a fihla,
ho rialo Molimo,
ke tla theolela Moea oa ka
holim'a batho bohle;
bara le barali ba lōna
ba tla porofeta,
bahlankana ba lōna
ba tla bona lipono,
le banna-baholo ba lōna
ba tla lora litoro.
18Le holim'a bahlanka ba ka
le makhabunyane a ka
ke tla theolela Moea oa ka
matsatsing ao,
'me ba tla porofeta.
19Ke tla etsa limakatso
holimo, leholimong,
le mehlolo tlase, lefatšeng:
mali, le mollo,
le mouoane oa mosi.
20Letsatsi le tla fifala,
le khoeli e tla ba khubelu
joaloka mali,
pele letsatsi le leholo la Morena,
le khethehileng, le fihla;
21'me mang le mang
ea tla rapela Morena
o tla pholosoa!’
22“Lōna banna ba Iseraele, utloang mantsoe ana: Joalokaha le lōna le tseba, Jesu oa Nasaretha e ne e le monna ea neng a pakoe ke Molimo ho lōna, ka liketso tse matla, le ka limakatso le ka mehlolo eo Molimo a e entseng ka eena har'a lōna. 23Ke eena ea neetsoeng lefu ka thato le tsebo ea Molimo, 'me lōna le mo thakhisitse ka matsoho a banna ba khopo, la 'molaea. 24Empa ke eo Molimo a mo tsositseng, a mo lokolla mahlōkōng a lefu, hobane ho ne ho ke ke ha etsahala hore lefu le mo tlamele ruri. 25Davida o ne a bue ka eena, a re:
“ ‘Kamehla
ke ntse ke hopotse Morena,
kahobane
o ka tsohong la ka le letona,
nke ke ka sisinyeha.
26Kahoo pelo ea ka e nyakaletse,
leleme la ka le bina lithoko,
le 'mele oa ka
o tla phomola ka tšepo,
27U ke ke ua ntlohela
Qalong ea Bafu,
u ke ke ua lesella
Motšepuoa oa hao,
ua mo lesella
ho bulla lebitleng.
28U mpontšitse litsela tsa bophelo.
Ha u e-na le 'na ke tla nyakalla.’
29“Banna ba heso, hoa lokela hore ke bue le lōna phatlalatsa ka moholo-holo oa rōna Davida: O ile a shoa, a epeloa, 'me lebitla la hae le sa le teng har'a rōna le kajeno-ea-bokajeno. 30Empa kaha e ne e le moporofeta, 'me a tseba hore Molimo o mo hlapanyelitse, hore ka peō ea letheka la hae, o tla hlahisa ea tla lula setulo sa hae sa borena, 31o ile a bona hona e sa le pele, 'me a bua ka tsōho ea Kreste, a re:
“ ‘Ha aa ka a tloheloa
Qalong ea Bafu,
le 'mele oa hae
ha oa ka oa bola.’
32“Jesu eo, Molimo o mo tsositse, 'me bohle re lipaki. 33O phahamisitsoe ka letsoho le letona la Molimo, a amohela Moea o Halalelang joalokaha Ntat'ae a ne a tšepisitse. A o theola kamoo le bonang, 'me le utloang kateng. 34Davida ka boeena ha aa ka a nyolohela leholimong, empa o re:
“ ‘Morena o itse ho Morena oa ka:
Lula ka letsohong la ka le letona,
35ho fihlela ke bea lira tsa hao
katlas'a maoto a hao.’
36“Ka baka leo, ntlo eohle ea Iseraele e ke e tsebisise hore Jesu enoa, eo lōna le mo thakhisitseng, Molimo o mo entse Morena le Mesia.”
37Eare ha ba utloa ba ameha maikutlo, ba re ho Petrose le ho baapostola ba bang: “Re etse joang, banna ba heso?”
38Petrose a re ho bona: “Bakang, 'me e mong le e mong oa lōna a kolobetsoe ka lebitso la Jesu Kreste, le tle le tšoareloe libe tsa lōna, 'me le tla amohela mpho ea Moea o Halalelang. 39Tšepiso ena e etselitsoe lōna, le bana ba lōna, le bohle ba hōle, ho ea kamoo Morena Molimo oa rōna a ka ba bitsang kateng.”
40A paka le ka mantsoe a mang a mangata, a ba khothatsa, a re: “Ipholoseng molōkong ona o khopo!” 41Ba ileng ba lumela molaetsa oa hae, ba kolobetsoa, 'me ka lona letsatsi leo balumeli ba eketseha ka ba ka bang likete tse tharo.
42Ba 'na ba tiisetsa thutong ea baapostola, le kopanong ea bolumeli, le ho ngoathoeng ha bohobe, le lithapelong.
Bophelo har'a balumeli
43Bohle ba tšoha, hobane baapostola ba ne ba etsa limakatso le mehlolo e mengata. 44Bohle ba lumetseng ba ba 'moho, 'me ba kopanela maruo a bona. 45Ba rekisa maruo a bona le lintho tseo ba neng ba e-na le tsona, ba arolelana bohle kamoo e mong le e mong a hlokang kateng. 46Ka letsatsi le leng le le leng ba ba 'moho ka Tempeleng ba le maikutlo a le mang, ba kena ntlo ka 'ngoe ba ntse ba ngoatha bohobe; ba ja lijo ka thabo le ka pelo tse tšoeu. 47Ba rorisa Molimo, ba ratoa ke batho bohle, 'me ka letsatsi le letsatsi Morena a eketsa phutheho ka ba pholosoang.
