LIKETSO 15

₁Batho ba bang ba neng ba theoha Judea ba ne ba ruta balumeli, ba re: “Ha le sa bōlōtsoe ka moetlo oa Moshe, le ke ke la pholosoa.” ₂Hoba Paulosi le Baranabase ba be le phapang le khang e kholo le bona, ha reroa hore Paulosi le Baranabase le ba bang ba bona ba nyolohele Jerusalema ho baapostola le baholo ka taba ena. ₃Ba neng ba rōmiloe ke kereke ba feta Fenisia le Samaria, ba ntse ba bolela tsa tšokoloho ea balichaba, 'me ba thabisa balumeli bohle haholo. ₄Ha ba fihlile Jerusalema, ba amoheloa ke kereke le baapostola le baholo, 'me ba bèha tsohle tseo Molimo a ileng a li etsa ka bona.

₅Empa ba bang ba mokha oa Bafarisi, ba lumetseng, ba ema, ba re: “Eka khona ba bōlōtsoe, 'me ba laeloe ho bōlōka Molao oa Moshe.”

₆Joale baapostola le baholo ba kopana ho hlahlobisana taba ena. ₇Kamora' khang e kholo, Petrose a ema, a re ho bona: “Bana beso, lea tseba hore e se e le nako Molimo a nkhethile har'a lōna hore ka molomo oa ka balichaba ba utloe lentsoe la molaetsa o molemo, 'me ba lumele. ₈Molimo ea tsebang lipelo tsa batho o ile a ba ananela ka ho ba nea Moea o Halalelang joaloka rōna. ₉Ha aa ka a khetholla pakeng tsa rōna le bona, o hloekisitse lipelo tsa bona hobane ba ile ba lumela. ₁₀Joale ekaba le lekela'ng Molimo ka ho jarisa barutuoa joko eo rōna le bo-ntat'a rōna re sitiloeng ho e jara? ₁₁Empa re lumela hore ke ka mohau oa Morena Jesu re pholosoang joaloka bona.”

₁₂Joale phutheho eohle ea khutsa, 'me ea mamela Baranabase le Paulosi ha ba bolela mehlolo le limakatso tsohle tseo Molimo a ileng a li etsa ka bona har'a balichaba. ₁₃Eare hoba ba khutse, Jakobo a bua, a re: “Bana beso, 'mameleng! ₁₄Simone o boletse kamoo Molimo a qalileng kateng ho bontša paballo ea hae ho balichaba ka ho ikhethela sechaba har'a bona. ₁₅Mantsoe a baporofeta a bile a lumellana le taba ena, joalokaha ho ngotsoe, ho thoe:

₁₉“Ka baka leo, 'na ke hopola hore eka khona ho se ke ha khathatsoa ba sokolohelang ho Molimo ba e-tsoa ho balichaba. ₂₀Ba mpa ba ngolloe hore ba ile tse silafalitsoeng ke melimo ea bohata, le bohlola, le lintho tse fenethiloeng, le mali, ₂₁hobane ho tloha melōkong ea khale-khale, ho bile le ba rutang tsa Moshe motseng o mong le o mong, li baloa matlung a thapelo ka Sabatha se seng le se seng.”

₂₂Eaba baapostola le baholo le kereke eohle ba rera ho rōma banna ba khethiloeng har'a bona ho ea Antiokia le Paulosi le Baranabase: e leng Juda ea bitsoang Baranabase le Silase, banna ba baetapele har'a balumeli. ₂₃Ba ba neeletsa lengolo le reng: “Baapostola le baholo, e leng bana babo lōna, ba lumelisa balumeli ba leng Antiokia le Siria le Silesia, ba tsoang ho balichaba. ₂₄Re utloile hore ba bang ba rōna, ba neng ba sa laeloa ke rōna, ba ile ba le tšoenya ka lipolelo, ba ferekanya maikutlo a lōna. ₂₅Ka hona re rerile ka moea o le mong ho rōma ho lōna banna ba khethiloeng, ba e-na le baratuoa ba rōna Baranabase le Paulosi, ₂₆e leng banna ba tetseng bophelo ba bona ka baka la Morena oa rōna Jesu Kreste. ₂₇Ka baka leo, re rōmile Juda le Silase, 'me ba tla le tsebisa litaba tseo ka molomo. ₂₈Ho rerile Moea o Halalelang le rōna hore re se ke ra le jarisa boima bo bong hape, haese tsena tse hlokahalang: ₂₉ho ila tse hlabetsoeng melimo ea bohata, le mali, le lintho tse fenethiloeng, le bohlola. Ha le ila tsena, e tla ba le etsa hantle. Salang ka khotso.”

₃₀Eare hoba ba lokolloe, ba theohela Antiokia, ba bōkella balumeli bohle, 'me ba ba nea lengolo. ₃₁Hoba ba le bale, ba thabela khothatso ea lona. ₃₂Juda le Silase, bao le bona e neng e le baporofeta, ba khothatsa balumeli ka puo e telele, ba ba matlafatsa. ₃₃Hoba ba hlole teng nakoana, balumeli ba ba lokolla ka khotso, ho boela ho ba ba rōmileng. ₃₄Leha ho le joalo, Silase a itherela ho sala moo. ₃₅Paulosi le Baranabase ba hlola Antiokia. Bona, le ba bang ba bangata, ba 'na ba ruta, 'me ba bolela molaetsa o molemo oa lentsoe la Morena.

₃₆Joale, kamora' matsatsinyana, Paulosi a re ho Baranabase: “A re boele re chakele balumeli motseng o mong le o mong oo re ileng ra phatlalatsa lentsoe la Morena ho oona, re bone hore na ba phela joang.” ₃₇Joale Baranabase o ne a lakatsa hore ba ee le Johanne ea bitsoang Mareka, ₃₈empa Paulosi a fumana ho sa lokele hore ba ee le enoa ea ileng a ikhula ho bona ha ba ne ba le Pamfilea, a se ke a ea le bona mosebetsing. ₃₉Ha e-ba le phapang e kholo hoo ba ileng ba arohana; Baranabase a nka Mareka, ba kena ka sekepeng ho tšelela Sipera. ₄₀Eare hoba Paulosi a khethe Silase, a tloha a beiloe kalosong ea mohau oa Morena ke balumeli. ₄₁A feta le Siria le Silesia, a ntse a matlafatsa likereke.