3 JOHANNE 1

₁'Na, moholo oa Kereke, ke lumelisa Gaiose, motsoalle oa ka, eo ke mo ratang kannete.

₂Motsoalle, ke rapela hore u phele hantle, 'me u atlehe linthong tsohle, joalokaha u atlehile ho tsa moea. ₃Ke ile ka itumela haholo ha balumeli ba bang ba e-tla, 'me ba paka kamoo u tsamaeang 'neteng kateng. ₄Ha ho ntho e nthabisang ho feta ho utloa hore bana ba ka ba tsamaea 'neteng.

₅Motsoalle, seo u se etsetsang balumeli, le hoja e le balichaba, u se etsa ka botšepehi. ₆Ba pakile lerato la hao pontšeng ea phutheho e mona, 'me e tla ba u entse hantle ha u ka ba thusa leetong la bona, ka mokhoa o tla khahlisa Molimo. ₇Ba kene leetong lena ka baka la lebitso la Kreste, ba sa amohele thuso efe kapa efe ho bahedene. ₈Rōna re tšoanetse ho thusa batho ba joalo, e le hore re tle re sebeletse 'nete 'moho le bona.

₉Ke se ke ngoletse phutheho lengolo, empa Dioterefese, ea ratang litulo tse kapele, ha a re amohele. ₁₀Ka baka lena, mohla ke tlang, ke tla hlahatsa mesebetsi ea hae eohle. O re etseletsa ka lipuo tse mpe. Ha tsena li sa mo khotsofatse, o hana ho amohela balumeli, ebile o thibela le ba ratang ho ba amohela, 'me o ba leleka phuthehong.

₁₁Motsoalle, u se ke ua latela mehlala e mebe, u mpe u latele e metle. Ea etsang tse ntle ke oa Molimo; ea etsang tse mpe ha a e-s'o ka a tseba Molimo. ₁₂Bohle ba paka Demetriose; le 'nete ea mo paka. Le rōna re paka joalo, 'me ua tseba hore bopaki ba rōna ke ba 'nete.

₁₃Ke ne ke sa na le tse ngata tseo nka u bolellang tsona, empa ha ke rate ho u ngolla tsona; ₁₄feela ke tšepa ho u bona haufinyane, 'me ke tla bua le uena re shebane.

₁₅Khotso e ke e be le uena. Metsoalle ea rōna ea u lumelisa. Le uena lumelisa metsoalle ka mabitso.