Sebōpeho sa batho ba mehleng ea bofelo
1Tseba hona: Mehleng ea bofelo ho tla ba le linako tsa bothata. 2Batho e tla ba baithati, ba ratang chelete, baithorisi, baikhantši, banyefoli, ba sa utloeng batsoali, ba hlokang teboho, ba sa halaleleng. 3E tla ba batho ba se nang lerato, ba hanang ho boelanngoa le ba bang, ba buang batho hampe, ba hlokang boitšoaro, ba hlaha, ba hloileng tsohle tse lokileng, 4mahlabaphieo, ba sōrō, baikhōhōmōsi. Ba tla rata menate ea lefatše, ho e-na le Molimo; 5ba tla bonahala eka ba na le bolumeli, athe ba lahlile matla a bolumeli. Ba joalo u ba furalle.
6Ba bang ba bona ba khukhunela malapa a batho, ba ikhapela basatsana ba sesang har'a libe, ba khannoang ke litakatso tsa mefuta-futa, 7ba batlang ho ithuta kamehla, empa ba ke keng ba tseba 'nete le khale. 8Joalokaha Jannese le Jamberese ba ile ba hanyetsa Moshe, le batho bao ba hanyetsa 'nete. Ke bao likelello tsa bona li sa sebetseng, bao tumelo ea bona e seng ea sebele. 9Empa ba ke ke ba atleha ho-ea-ho-ile, hobane bothoto ba bona bo tla pepeseha ho bohle, joaloka bothoto ba bao ba babeli.
Litaelo tsa ho qetela ho Timothea
10Ha e le uena, u ntatetse ka hloko thutong, metsamaong, mererong, tumelong, mamellong, leratong, tiisetsong, 11litlhorisong le litlhōkōfatsong tse ileng tsa ntlhahela Antiokia, Ikonione le Lesitera. Litlhoriso tseo ke ileng ka li mamella ke tse kaakang! Empa Morena o ile a ntopolla ho tsona kaofela. 12Efela bohle ba ratang ho phela ho Kreste Jesu ka borapeli, ba tla hlorisoa. 13Ha e le batho bao ba khopo, ba mamenemene, bobe ba bona bo tla 'ne bo tōte, ba thetse ba bang, le bona ba thetsehe. 14Empa uena, khomarela tseo u li rutiloeng ka mokhoa o kholisang, u ntse u tseba hore na u li rutiloe ke mang. 15Ho tloha bonyenyaneng ba hao u tsebile Mangolo a halalelang, a nang le matla a ho u hlalefisa, u tle u pholosoe ka ho lumela ho Kreste Jesu. 16Mangolo 'ohle a ngotsoe ka tšusumetso ea Moea oa Molimo, 'me a na le thuso ea ho ruta, ea ho nyatsa, ea ho busetsa batho tseleng ea ho loka le ho ba tsamaisa ho eona, 17hore motho oa Molimo a tle a phethehe, a koetlisetsoe mesebetsi eohle e lokileng.
