2 BATHESALONIKA 1

₁'Na Paulosi, le Silefanose, le Timothea, re lumelisa kereke ea Bathesalonika, eo e leng ea Molimo Ntat'a rōna le ea Morena Jesu Kreste, re re: ₂Mohau le khotso ea Molimo Ntate le ea Morena Jesu Kreste li ke li be le lōna.

₃Bana beso, re tšoanetse ho leboha Molimo kamehla ka baka la lōna, joalokaha ho lokela, hobane tumelo ea lōna e hōla ka matla, le lerato leo le ratanang ka lona le eketseha ho e mong le e mong oa lōna. ₄Ke kahoo re ithorisang ka lōna likerekeng tsa Molimo, ka baka la tiisetso le tumelo ea lōna har'a litlhoriso tsohle tsa lōna, le matšoenyeho ao le a mamellang.

₅Tsena ke bopaki ba kahlōlo e lokileng ea Molimo, e le hore le tle le be ba lokelang 'Muso oa Molimo, oo le hlōkōfatsoang ka baka la oona. ₆Ke ntho e nepahetseng hore Molimo a le pheteletse ka ho hlōkōfatsa ba le hlōkōfatsang. ₇Lōna ba hlōkōfatsoang o tla le imolla hammoho le rōna, mohla Morena Jesu a bonahatsoang, a e-tsoa leholimong le mangeloi a hae a matla, ₈a le har'a malakabe a mollo, ho ahlōla ba sa tsebeng Molimo le ba sa mameleng molaetsa o molemo oa Morena oa rōna Jesu. ₉Ba tla ahlōleloa timelo e sa feleng, ba be hōle-hōle le sefahleho sa Morena le khanya ea botlōtlehi ba hae, ₁₀ka Letsatsi leo a tla tla ka lona ho tlotlisoa ke bahalaleli ba hae, le ho babatsoa ke bohle ba lumetseng. Le lōna le tla ba har'a bona hobane le lumetse bopaki ba rōna.

₁₁Ke ka baka leo re le rapellang kamehla, hore Molimo oa rōna a le fumane le le ba lokelang pitso ea hae, 'me ka matla a hae a phethahatse merero eohle ea lōna e lokileng le mesebetsi ea tumelo. ₁₂Ka tsela ena le tla tlotlisa Morena oa rōna Jesu, le eena a le tlotlise ka mohau oa Molimo oa rōna le oa Morena Jesu Kreste.