Khosi Hesekiea o kōpa keletso ho moporofeta Esaea
1Ha khosi Hesekiea a utloa litaba tsena a hahola liaparo tsa hae, a apara lesela le mahoashe, a kena ka Tempeleng ea Morena. 2Eaba o rōma Eliakime, eo e neng e le mookameli oa lelapa la hae, le Shebena, eo e neng e le mongoli, le baprista ba baholo, ba apere tse mahoashe. A ba rōma ho moporofeta Esaea, mora oa Amose. 3Ba fihla ba re ho Esaea: “Hesekiea o bua tjena: ‘Letsatsi lena ke la tsietsi, le la ho khalemeloa, le la ho nyefoloa. Ke nako ea ho bèlèha bana, empa matla a ho ba beleha ha a eo. 4Mohlomong Morena Molimo oa hao, o tla utloa mantsoe a molaoli oa ntoa, eo mong'a hae, khosi ea Asiria, a mo rōmmeng ho nyelisa Molimo ea phelang, 'me a mo otle. Ka baka leo, rapella ba ntseng ba phela.’ ”
5Ha bahlanka ba khosi Hesekiea ba fihla ho Esaea, 6eena a re ho bona: “Bolellang mong'a lōna, le re: ‘Morena o bua tjena: U se ke ua tšosoa ke mantsoe ao u a utloileng, ao balaoli ba mabōtho a khosi ea Asiria ba 'nyefotseng ka 'ona. 7Khosi eo e tla utloa taba tsa bo-fuufu, e ferekane, ebe e khutlela naheng ea eona, moo e tla bolaeloa teng ka sabole.’ ”
Baasiria ba sokela baahi ba Jerusalema hape
8Ha molaoli oa ntoa a utloela hore khosi ea Asiria e tlohile Lakishe, eaba oa khutla, 'me a fumana khosi e futuhetse Lebena.
9Eitse ha khosi ea Asiria e utloa hore Tirehaka, khosi ea Kushe, oa e futuhela, ea boela ea rōmela maqosa ho Hesekiea, ea re: 10“Le bolelle Hesekiea, khosi ea Juda, le re: ‘U se ke ua thetsoa ke Molimo oa hao, eo u mo tšepileng, ha a re Jerusalema e ke ke ea hapuoa ke khosi ea Asiria. 11U utloile seo likhosi tsa Asiria li se entseng linaheng tsohle, ka ho li timetsa ho hang; joale uena u tla phonyoha joang? 12Na melimo ea lichaba tseo bo-ntat'ao-moholo ba li timelitseng e ile ea li pholosa, e leng melimo ea Gosane, le Harane, le Resefe, le melimo ea sechaba sa Edene, se neng se le Telasara? 13E kae khosi ea Hamate, le khosi ea Arepade, le khosi ea motse oa Sefarafaime, le ea Hena, le ea Ifa?’ ”
14Hesekiea a amohela lengolo leo a le neiloeng ke maqosa ao, a le bala. Eaba o nyolohela ka Tempeleng ea Morena, o fihla a phutholla lengolo leo kapele ho Morena. 15A rapela Morena, a re: “Oho, Morena Molimo oa Iseraele, uena eo terone ea hao e leng pakeng tsa likerubime, ke uena u le mong feela u leng Molimo oa mebuso eohle ea lefatše; ke uena ea entseng leholimo le lefatše. 16Morena, ak'u sèkèhe tsebe ea hao, u mamele; Morena, ak'u talime, u bone, 'me u utloe mantsoe ao Saneheribe a a rōmetseng ho nyelisa Molimo ea phelang.
17“Ke 'nete, Morena, likhosi tsa Asiria li timelitse lichaba le linaha tsa tsona; 18li chesitse melimo ea lichaba tseo, hobane e ne e se melimo; e ne e le melimo eo batho ba iketselitseng eona ka lehong le ka majoe, 'me ke kahoo e timelitsoeng. 19Ka baka leo he, Morena Molimo oa rōna, kea u kōpa: Ak'u re namolele matsohong a khosi ea Asiria, hore mebuso eohle ea lefatše e tle e tsebe hore ke uena Morena, Molimo o le mong feela.”
Esaea o rōmela molaetsa ho khosi Hesekiea
20Eaba Esaea, mora oa Amose, o rōmela molaetsa ho Hesekiea, o re: “Morena Molimo oa Iseraele o bua tjena: ‘Ke utloile thapelo ea hao malebana le Saneheribe, khosi ea Asiria.’ 21Morena o buile mantsoe ana, malebana le Saneheribe:
“ ‘Morali oa Sione, oa moroetsana,
o u nyelisitse, a u ja tlepane;
morali oa Jerusalema
o u thukuthela hlooho.
22U omantse mang, ua mo ja tlepane?
Ke mang
eo u ntseng u mo kharuma?
Ke mang
eo u mo tlōlisang mahlo holimo?
Ke eena Ea Halalelang, oa Iseraele!
23Ka maqósa a hao
u omantse Morena, ua re:
“Ka tšoele la kariki tsa ka tsa ntoa,
ke hloele meqasa,
ka ea fihla qhooeng tsa Lebanone;
ka rèma metsukutsuku
ea kedare tsa teng,
ka rèma lifate
tse khethehileng tsa moo;
ka kenella hare-hare
khutlong tsa teng,
ka kenella hare-hare mefilibithing.
24Ka cheka liliba,
ka noa metsi a balichaba,
maoto a ka a pshesa
melatsoana eohle ea Egepeta.”
25“ ‘Ha u e-s'o utloe
hore li entsoe ke 'na khale-khale?
Ka li bōpa mehleng ea boholo-holo?
Joale, ke 'na ea entseng
hore u be teng,
u tl'o timetsa metse
e hahelelitsoeng,
u e timetse, e be masupi.
26Baahi ba tsona ba felloa ke matla,
ba tsieleha, ba tšerehana;
ba ba joaloka joang ba naha,
ba ba joaloka semela se setalana,
joaloka sehlethele
sa joang holim'a ntlo,
joaloka koro e phutsang
e e-s'o tsoale.
27“ ‘Feela ke tseba leaho la hao,
ke tseba mesebetsi ea hao
le ho mpurumela ha hao.
28Ke utloile ho mpurumela ha hao,
le lerata la hao,
kahoo ke tla kenya khoathatha,
ke e kenye nkong ea hao,
ke kenye le tōmo ka hanong la hao,
ke be ke u khutlise
le mehlala ea hao.’
29“ ‘Sena e tla ba pontšo ho uena:
Monongoaha le tla ja matšoaboli,
isao le je tse tsoaloang ke lirite;
ka sa boraro le tla jala le kotule,
le hlome morara,
le je tholoana tsa oona.
30Masalla a ntlo ea Juda a tla tsoha,
ho hlahe tlōbō le lecha, a anafale,
31Jerusalema ho tla ba le masalla,
thabeng ea Sione
ho be le ba phonyohileng,
hona ho phethahatsoa ke Morena,
ka cheseho.’
32“Ka baka lena, Morena ha a bua
ka khosi ea Asiria o re:
‘Khosi eo e ke ke
ea kena ho ona motse,
e ke ke ea o fula ka motsu,
kapa ea o futuhela e tšoere thèbè,
kapa ea o hahela marako a thibella.
33E tla khutla le mehlala ea eona,
e ke ke ea kena ho ona motse,’
ho rialo Morena.
34‘Motse ona ke tla o sireletsa,
ke o pholose,
ke o pholosetse 'na
le mohlanka oa ka Davida.’ ”
35Ka bona bosiu boo, lengeloi la Morena la tsoa, la ea liahelong tsa Baasiria, la bolaea Baasiria ba likete tse lekholo le mashome a robeli a metso e mehlano. Ha bosiu bo oela fatše, kaofela ha bona ea be e se e le litōpō. 36Eaba Saneheribe, khosi ea Asiria, oa kokotōlōha, o khutla le mehlala, o ea lula Ninife.
37Ka tsatsi le leng, ha a ntse a rapela, a le ka tempeleng ea Niseroke, molimo oa hae, bo-Adarameleke le Saresere, bara ba hae, ba 'molaea ka sabole. Ba balehela naheng ea Ararate, 'me Asare-Hadone, mora oa hae, a mo hlahlama.
