1Ha ho le joalo, baratuoa, kaha re etselitsoe litšepiso tse joalo, a re itlhoekiseng litšileng tsohle tsa nama le tsa moea, ka ho phethahatsa khalaletso ea rōna, re ntse re tšaba Molimo.
Thabo ea Paulosi ha Kereke e bakile
2Re buleleng lipelo tsa lōna. Ha ho eo re mo entseng hampe, ha ho eo re mo senyelitseng, ha ho eo re mo qhekanyelitseng. 3Ha ke bue joalo ho le ahlōla. Joalokaha ke boletse pele, lōna le pelong tsa rōna ho pheleng le ho shoeng. 4Ke le tšepile haholo, ke motlōtlō ka lōna; matšoenyehong a rōna 'ohle ke ntse ke tletse tšepo, thabo ea ka ea khaphatseha.
5Eare hoba re fihle Masedonia, ra se ke ra phomola, empa ra tšoenyeha ka mekhoa eohle, ra ba har'a liqabang, 'me tšabo ea e-ba teng lipelong tsa rōna. 6Empa Molimo ea khothatsang ba eisehang o ile a re khothatsa ka ho tla ha Tite; 7e seng ka ho tla ha hae feela, empa le ka khothatso eo a e fumaneng ho lōna. O re boleletse kamoo le re hlolohetsoeng kateng, kamoo le soabileng kateng, le kamoo le re chesehelang kateng.
Kahoo ke thabile ka ho fetisisa, 8hobane le haeba lengolo la ka le ile la le soabisa, ha ke ikoahlaee ha ke le ngotse. Ke ne nka ikoahlaea ka ho bona hore lengolo leo le ile la le soabisa nakoana. 9Empa joale ke thabile, e seng kahobane ke ile ka le soabisa, empa e le hobane masoabi a lōna a ile a etsa hore le bake. Le ile la soaba ka mokhoa oo Molimo a o ratang; ka baka leo, seo re se entseng ha sea le senyetsa letho. 10Ho soaba ka mokhoa oo Molimo a o ratang ho hlahisa pako e se nang boikoahlaeo, e isang pholohong; athe ho soaba ka mokhoa oo lefatše le o ratang ho tlisa lefu. 11Bonang, ho soaba hona ho eang kamoo Molimo a ratang kateng, ho le hlahiselitse thahasello e kaakang, le boitšireletso, le khalefo, le tšabo, le tlhōlōhelo, le cheseho, le ho ahlōla ea molato! Ka mekhoa eohle le bontšitse kamoo le hlokang molato kateng tabeng ena. 12Ka baka leo, leha ke le ngoletse hase ka lebaka la ea entseng hampe, kapa ea entsoeng hampe, empa e le hore ho bonahale ho lōna, mahlong a Molimo, kamoo le re thahasellang kateng. 13Ka baka leo, re tšelisehile.
Kantle ho ho tšeliseha hoo ha rōna, re ile ra thaba haholo ha re bona kamoo Tite a thabileng kateng. Moea oa hae o ile oa khatholloa ke lōna bohle. 14Haeba ke ile ka ithorisa ka ho hong ho eena ka lōna, ha ke hlajoe ke lihlong. Kamehla re buile 'nete ho lōna; ka mokhoa o joalo, le boithoriso ba rōna ho Tite e bile ba 'nete. 15Lerato la hae ho lōna le ntse le matlafala, ha a hopola kamoo le ileng la mo mamela kateng, le kamoo le ileng la mo amohela ka tšabo le ka thōthōmelo kateng. 16Joale ke thabile, hobane nka le tšepa linthong tsohle.
