1Re tseba hore, mohla lephephe leo re phelang ho lona mona lefatšeng le qhaqholloang, leholimong re na le lehae leo re le lokiselitsoeng ke Molimo, ntlo e sa hahoang ke batho. 2Bophelong bona rea feheloa, ka baka la ho labalabela ho kena lehaeng la rōna la bobeli, la leholimo, 3hobane mohla re keneng ho lona, re ke ke ra fumanoa re hloka lehae. 4Ruri, rōna ba ahileng lephepheng lena, re feheloa ke ho imeloa, hobane ha re batle ho lahleheloa ke lehae lena, empa re lakatsa ho fumana le leng la bobeli, holim'a lona; e le hore se shoang se metsoe ke bophelo. 5Ea re bōpetseng hona, ke Molimo ea re fileng Moea oa hae, e le ho tiisa hore tse tlang li tla tla.
6Ha ho le joalo, re khothetse kamehla, leha re ntse re tseba hore ho phela 'meleng ona ke ho phela hōle le Morena. 7Re phela ka tumelo, e seng ka ho 'mona. 8Ka hona re khothetse, 'me se ka re khahlang ke ho falla 'meleng ona, re tle re e'o aha le Morena. 9Ka baka leo, leha re ntse re le 'meleng ona kapa re faletse ho oona, re ikitlaeletsa ho mo khahlisa, 10hobane eka khona liketso tsa rōna bohle li pepesoe pel'a setulo sa Kreste sa kahlōlo, e le hore motho ka mong a amohele se mo lokelang, ka ho ea ka tse ntle kapa tse mpe tseo a li entseng, ha a sa ntsane a phela 'meleng.
Mosebetsi oa ho boelanya batho le Molimo ka Kreste
11Ka ho tseba hore na ho tšaba Morena ke eng, re leka ho kholisa batho. Molimo o re tseba ka ho tlala; le teng ke tšepile hore le lōna, ka lipelo tsa lōna, le ntseba ka ho tlala. 12Ha re sa tla ikemela pel'a lōna, re mpa re le fa sebaka sa ho ithorisa ka rōna, e le hore le tle le tsebe ho fetola ba ithorisang ka se bonahalang, e seng ka se ka pelong. 13Haeba re sa nke hantle ke ka baka la Molimo; haeba re nka hantle, ke ka baka la lōna. 14Lerato la Kreste lea re susumetsa, rōna ba khotsoeng hore ha a le mong a shoetse bohle, eba bohle ba shoele le eena. 15Joale Kreste o shoetse bohle, e le hore ba phelang ba se hlole ba iphelela, ba mpe ba phelele ea ba shoetseng, a ba a tsoha ka baka la bona.
16Ha ho le joalo, ha re sa tseba mang kapa mang ka mokhoa oa botho. Le haeba re ile ra tseba Kreste ka mokhoa oa botho, kajeno ha re sa mo tseba joalo. 17Ka tsela ena, ha motho a le ho Kreste, ke 'mōpuoa e mocha; tsa khale li fetile, tse ncha li hlahile. 18Tsena tsohle li tsoa ho Molimo, ea ileng a re boelanya le eena ka Kreste, a ba a re nea mosebetsi oa ho boelanya batho ba bang le eena. 19Seo ke se bolelang ke hore Molimo o ile a boelanya batho bohle ba lefatše le eena ka Kreste, ka ho ba leballa libe tsa bona, le ka ho re nea mosebetsi oa ho ba boelanya le eena. 20Kahoo re maqosa a Kreste, kaha Molimo a khothatsa ka rōna. Rea le kōpa lebitsong la Kreste: Boelanang le Molimo. 21Kreste ea neng a se na sebe, Molimo o ile a mo nka e le moetsalibe ka baka la rōna, e le hore ka eena Molimo a re etse ba lokileng.
