Letlotlo le ka lipitseng tsa letsopa
1Ka baka leo, erekaha re neiloe tšebeletso ena ka mohau, ha re tepelle. 2Empa re ile ra tela tsa sekhukhu, tse lihlong, ra se ke ra tsamaea ka mano, leha e le ho sotha lentsoe la Molimo. Re mpa re phatlalatsa 'nete, re leka ho hapa maikutlo a batho bohle, 'me le Molimo oa tseba. 3Haeba molaetsa oa rōna o molemo o siretse, o siretse ba eang timelong, 4e leng ba sa lumelang, bao molimo oa lefatše lena o foufalitseng likelello tsa bona hore ba se ke ba bona leseli la molaetsa o molemo oa tlōtla ea Kreste, eo e leng setšoantšo sa Molimo. 5Ha re ipolelise, re mpa re bolela hore Jesu Kreste ke Morena, le hore rōna re basebeletsi ba lōna ka baka la Jesu. 6Molimo ea itseng: “Leseli le khanye lefifing,” ke eena ea khantšelitseng lipelo tsa rōna, hore li be le leseli la tsebo ea tlōtla ea Molimo, e khanyang sefahlehong sa Kreste.
7Empa rōna re ka lipitsa tsa letsopa tse tšetseng letlotlo lena, hore matla ao a fetisisang e be a Molimo, e seng a rōna. 8Re patisoa ka nqa tsohle, empa ha re bjaratsehe; rea tsieleha, empa ha re nyahame pelo; 9rea hlorisoa, empa ha re furalloe ke bohle; re ratlanngoa fatše, empa ha re shoe. 10Re jere mahlōkō a lefu la Jesu 'meleng ea rōna kamehla, hore le bophelo ba hae bo tle bo bonahatsoe 'meleng ea rōna. 11Rōna ba phelang, kamehla re kotsing ea ho bolaoa ka baka la Jesu, hore le bophelo ba hae bo tle bo bonahatsoe 'meleng ea rōna e shoang. 12Ka mokhoa o joalo lefu le sebetsa ho rōna, athe bophelo bo sebetsa ho lōna.
13Empa Mangolo a re: “Ke lumetse, ka hona kea bua.” Ka oona moea o joalo oa tumelo le rōna rea lumela, ka hona rea bua, 14hobane rea tseba hore ea tsositseng Morena Jesu bafung, le rōna o tla re tsosa le Jesu, a re hlahise le lōna pel'a hae. 15Tsohle li entsoe ka baka la lōna, hore ha mohau o atela ba bangata, ho be le teboho e fetisisang tlotlisong ea Molimo.
Ho phela ka tumelo
16Ka baka leo, ha re tepelle. Leha botho ba rōna ba nama bo senyeha, botho ba moea bona bo nchafala ka letsatsi le letsatsi. 17Matšoenyeho a rōna a bobebe, ke a motsotsoana, a re tlisetsa tlōtla e kholohali, e sa feleng. 18Re habile tse sa bonoeng, e seng tse bonoang, hobane tse bonoang ke tsa mehla ea joale, empa tse sa bonoeng ke tsa mehla e sa feleng.
