2 LIKETSAHALO 36

₁Eaba sechaba sa naha eo se nka Jehōoakase, mora oa Josiea, se 'mea hore e be khosi Jerusalema, hore a hlahlame ntat'ae.

₂Jehōoakase o ne a e-na le lilemo tse mashome a mabeli a metso e meraro ha a qala ho busa. A busa ka khoeli tse tharo, a le Jerusalema. ₃Khosi ea Egepeta ea mo tlosa setulong sa bokhosi Jerusalema; ea lefisa baahi ba naha eo silefera e etsang boima ba likilo tse likete tse tharo le makholo a mane, le khauta e etsang boima ba likilo tse mashome a mararo a metso e mene. ₄Khosi ea Egepeta ea bea Eliakime, ngoan'abo Jehōoakase, hore e be khosi ea Juda le ea Jerusalema. Ea mo rea lebitso la Jehoeakime. Neko a nka Jehōoakase, ngoan'abo Jehoeakime, a mo isa Egepeta.

₅Jehoeakime o ne a e-na le lilemo tse mashome a mabeli a metso e mehlano, ha a qala ho busa. A busa ka lilemo tse leshome le motso o mong, a le Jerusalema. A etsa bobe mahlong a Morena Molimo oa hae. ₆Nebukadenesare, khosi ea Babilona, a mo futuhela, a mo tlama ka mahlaahlela a lethose, a mo isa Babilona. ₇Nebukadenesare a nka le thepa ea Tempele ea Morena, a e bea ka tempeleng ea hae Babilona.

₈Joale liketso tse ling tsa Jehoeakime, le manyala ao a ileng a a etsa, le tseo a neng a nyatsuoa ka tsona, li ngotsoe Bukeng ea Likhosi tsa Iseraele le tsa Juda. Jehoeakine, mora oa hae, a mo hlahlama.

₉Jehoeakine o ne a e-na le lilemo tse robeli ha a qala ho busa. A busa ka khoeli tse tharo le matsatsi a leshome, a le Jerusalema. A etsa bobe mahlong a Morena. ₁₀Ha selemo se thoasa, khosi Nebukadenesare a mo rōmela maqosa, a mo isa Babilona le thepa ea bohlokoa ea Tempele ea Morena, 'me a bea Sedekiea, ngoan'abo, hore e be khosi ea Juda le Jerusalema.

₁₁Sedekiea o ne a e-na le lilemo tse mashome a mabeli a motso o mong ha a qala ho busa. A busa ka lilemo tse leshome le motso o mong, a le Jerusalema. ₁₂A etsa bobe mahlong a Morena Molimo oa hae. A se ke a ikokobeletsa moporofeta Jeremia, eo e neng e le molomo oa Morena.

₁₃Sedekiea a fetohela khosi Nebukadenesare, ea neng a ile a mo hlapantša ka Molimo. Empa Sedekiea a satalatsa molala, a thatafatsa pelo ea hae, a se ke a khutlela ho Morena Molimo oa Iseraele. ₁₄Le baprista bohle ba ka sehloohong, 'moho le sechaba, ba sitoa haholo, ba latela manyala 'ohle a balichaba, ba silafatsa Tempele ea Morena, eo a neng a e halalelitse Jerusalema.

₁₅Kamehla Morena Molimo oa bo-ntat'a bona, o ne a rōmela maqosa ho bona, hobane o ne a utloela sechaba sa hae, le Tempele ea hae, bohlōkō. ₁₆Empa ba soma maqosa ao a Molimo, ba nyelisa lipolelo tsa hae, ba bapala ka baporofeta ba hae, ho fihlela khalefo ea Morena e ba tlōkōmela hoo ho neng ho se ho se pheko.

₁₇Morena a etsa hore khosi ea Bakalatiea e ba futuhele; ea bolaea bahlankana ka sabole, ea ba bolaela ka Sehalalelong sa Tempele. Ea se ke ea hauhela bahlankana, kapa baroetsana, kapa maqheku, kapa ba seng ba khokhoba ke botsofali; Morena a neelana ka bona bohle matsohong a khosi eo. ₁₈Thepa eohle ea Tempele ea Morena, e kholo le e nyenyane, le matlotlo a Tempele ea Morena, le matlotlo a khosi, le a mahosana a eona, tsena tsohle a li isa Babilona. ₁₉Ba chesa Tempele ea Morena, ba heletsa marako a Jerusalema, ba chesa matlo 'ohle a matle a khosi ka mollo, ba senya le thepa eohle ea bohlokoa.

₂₀Ba ileng ba phonyoha saboleng a ba thōpa, a ba isa Babilona, moo e ileng ea e-ba bahlanka ba hae, le ba bara ba hae, ho fihlela puso e nkoa ke Peresiea. ₂₁E ne e le hore ho phethahale lipolelo tsa Morena tse neng li boleloe ke Jeremia, ha a ne a re: “Ho fihlela lilemo tse mashome a supileng li fela, naha e tla lala ka nako eohle eo e ntseng e hloka baahi ka eona.”

₂₂Ka selemo sa pele sa puso ea Siruse, khosi ea Peresiea, Morena a susumetsa khosi eo hore e etse phatlalatso 'musong oohle oa eona, ho tle ho phethahale polelo ea Morena eo a neng a e bolele ka Jeremia. Khosi ea e ngola, ea re: ₂₃“Siruse, khosi ea Peresiea, o bua tjena: ‘Morena Molimo oa maholimo, o 'neile mebuso eohle ea lefatše, 'me o ntaetse hore ke mo hahele Tempele Jerusalema, naheng ea Juda. E mong le e mong oa sechaba sa hae, ea teng mona har'a lōna, ke re Morena Molimo oa hae, a ke a be le eena, 'me eo a nyolohele hona teng.’ ”