2 LIKETSAHALO 31

₁Ha tsena tsohle li se li phethiloe, Baiseraele bohle ba neng ba le teng ba ea metseng ea Juda. Ba fihla ba thua lifika tseo ba li khumamelang, ba senya le litšoantšo tsa Ashera, ba heletsa libaka tseo ho neng ho rapelloa melimo ea bohata ho tsona, ba heletsa le lialetare naheng eohle ea ba morabe oa Juda, le naheng ea ba morabe oa Benjamine, le ea ba morabe oa Efraime, le ea ba morabe oa Manase, ho fihlela tsohle li sentsoe. Joale bana bohle ba Iseraele ba khutla, e mong le e mong a ea ha habo, motseng oa habo.

₂Hesekiea a khetha lihlopha tsa baprista le tsa Balevi, e mong le e mong a e-na le mosebetsi oa hae. Baprista le Balevi ba khetheloa ho etsa linyehelo tsa secheso, le linyehelo tsa teboho, le ho boka, le ho sebeletsa, le ho rorisa ba le khorong ea liahelo tsa Morena. ₃Khosi ea fana ka seabo sa eona, se tsoang mehlapeng ea eona, bakeng sa ho etsa linyehelo; e leng nyehelo ea secheso ea hoseng le ea mantsiboea, le bakeng sa ho etsa nyehelo ea secheso ea Sabatha, le ea ho thoasa ha khoeli, le ea mekete e khethehileng, joalokaha ho ngotsoe Molaong oa Morena.

₄Hesekiea a laela sechaba se neng se ahile Jerusalema hore se ntše seabo se neoang baprista le Balevi, e le hore ba thahaselle ho phetha Molao oa Morena. ₅Hoba taelo ena e anele hohle, bana ba Iseraele ba tlisa lilopotsiea tsa koro, le tsa veine, le tsa ole, le tsa mahe a linotši, le lilopotsiea tsa tsohle tse tsoang masimong. Ba tlisa le karolo e le 'ngoe holim'a tse leshome tsa lintho tsa bona, 'me ba li tlisa ka bongata. ₆Bana ba Iseraele le sechaba sa Juda ba neng ba ahile metseng ea Juda le bona ba tlisa karolo e le 'ngoe holim'a tse leshome tsa likhomo tsa bona le likhutšoane tsa bona. Ba tlisa le karolo e le 'ngoe holim'a tse leshome tsa lintho tse halalelang, tseo ba li abetseng Morena, ba li etsa liqubu-qubu. ₇Ka khoeli ea boraro ba qala ho bōkella lintho tsena, 'me ka khoeli ea bosupa ba qeta ho li bōkella. ₈Bo-khosi Hesekiea le mahosana ba fihla, 'me ha ba bona liqubu-qubu tsena ba rorisa Morena, ba hlohonolofatsa sechaba.

₉Hesekiea a botsa baprista le Balevi ka liqubu tsena. ₁₀Eaba Asariea, Moprista e Moholo, oa lelapa la Sadoke, oa mo araba, o re: “Haesale ho tloha mohla sechaba se tlisang linyehelo ka Tempeleng ea Morena, re ile ra ja, ra ba ra li sheba feela, 'me re sa saletsoe ke tse ngata, hobane Morena o hlohonolofalitse sechaba sa hae, 'me lijo tse setseng ke qubuhali ena.”

₁₁Joale Hesekiea a laela hore ho lokisoe matlo a pōlōkelo ka Tempeleng ea Morena, 'me ba a lokisa. ₁₂Ba tlisa linyehelo, le karolo e le 'ngoe holim'a tse leshome tsa lintho tse abetsoeng Morena, le limpho tse halalelang. Tsena ba li tlisa ka botšepehi. Konaniea oa Molevi e ne e le eena molisa oa lintho tsena, mothusi oa hae e le Shimei, ngoan'abo. ₁₃Baokameli bana: Jehiele, le Asasiea, le Nahate, le Asaele, le Jerimote, le Josabada, le Eleele, le Jisemakiea, le Mahate, le Benaea, ba ne ba ikarabella ho Konaniea, le ho Shimei, ngoan'abo, e le ka taelo ea khosi Hesekiea le ea Asariea, mookameli oa Tempele ea Morena.

₁₄Kore, mora oa Jimena oa Molevi, e ne e le molebeli oa monyako o ka bochabela. O ne a hlokomela linyehelo tsa boithaopo tse nyehelloang Molimo, e le eena ea abang linyehelo tsa Morena le lintho tse halalelang ka ho fetisisa. ₁₅Metseng ea baprista, e leng moo a neng a sebeletsa teng ka botšepehi, a fepa ba baholo le ba banyenyane ho ea ka lihlopha tsa bona ka ho tšoana; o ne a thusoa ke Edene, le Mineeamine, le Jeshua, le Shemaea, le Amariea, le Shekaniea.

₁₆Bohle ba batona ba neng ba kena ka Tempeleng ea Morena, ho ea etsa mesebetsi ea bona ea letsatsi le letsatsi, ho tloha ka ba lilemo tse tharo le ho feta, ba neng ba ngotsoe bukeng ea lenane la lelōko, le bona ba ne ba ba abela lijo ho ea ka lihlopha tsa bona. ₁₇Lenane la lelōko la baprista le ne le hlophisitsoe ho ea kamoo malapa abo bona a ngolisitsoeng kateng bukeng ea lenane la lelōko. Balevi bona, ho tloha ka ba lilemo tse mashome a mabeli, ho ea holimo, ba ne ba hlophisitsoe ho ea ka mesebetsi ea bona le lihlopha tsa bona. ₁₈Ha hlophisoa le lenane la masea a bona, le la basali ba bona, le la bara ba bona, le la barali ba bona sechabeng sohle, ho ea ka buka ea lelōko la bona. Ka baka la boemo ba bona, baprista ba ne ba itlhoekisa ka botšepehi, ha ba il'o sebetsa ka lintho tse halalelang.

₁₉Le bara ba Arone, bao e neng e le baprista, ba neng ba phela makhulong a haufi le metse ea bona, le metseng eohle, ba abeloa lijo ke banna ba neng ba thontsoe ka mabitso ho abela bohle ba batona har'a baprista, le bohle ba Balevi ba neng ba ngotsoe bukeng ea lelōko.

₂₀Hesekiea o ile a etsa joalo naheng eohle ea Juda, a etsa se molemo, le se lokileng, le seo e leng 'nete kapele ho Morena Molimo oa hae. ₂₁Mosebetsing o mong le o mong oo a ileng a o qala, a amanang le tšebeletso ea Tempele Molimo, le molao, le litaelo, a batla Molimo oa hae, a sebetsa ka pelo eohle ea hae, 'me kahoo a atleha.