2 LIKETSAHALO 29

₁Hesekiea o ne a e-na le lilemo tse mashome a mabeli a metso e mehlano ha a qala ho busa. A busa ka lilemo tse mashome a mabeli a metso e robong, a le Jerusalema. Lebitso la 'm'ae e ne e le Abiea, morali oa Sakariea. ₂Hesekiea a khahlisa Morena, joalokaha Davida, ntat'ae-moholo, a ne a ile a etsa.

₃Ka khoeli ea pele selemong sa pele sa puso ea hae, Hesekiea a bula mamati a Tempele ea Morena, a a lokisa. ₄A bitsa baprista le Balevi, a ba khōbōkanyetsa lebaleng le ka bochabela. ₅A re ho bona: “Lōna Balevi, 'mameleng! Itlhoekiseng hona joale, 'me le hloekise le Tempele ea Morena Molimo oa bo-ntat'a lōna, le hleke litšila tsohle sebakeng sena se halalelang. ₆Bo-ntat'a rōna ba ile ba sitoa, ba etsa bobe mahlong a Morena Molimo oa bo-ntat'a rōna. Ba mo furaletse, 'me mahlo a bona ha a sa talimile Leaho la Morena, ba le furaletse. ₇Ba bile ba koetse menyako ea lethule, ba tima le mabone, 'me ha ba sa chesa le mokubetso, kapa ho etsetsa Molimo oa Iseraele linyehelo tsa secheso sebakeng sena se halalelang.

₈“Ka baka lena, Morena o halefetse sechaba sa Juda, le baahi ba Jerusalema, o ba kentse tsietsing, o ba entse setsoto, ba fetohile sekhobo, joalokaha le lōna le bona. ₉Bo-ntat'a rōna ba bolailoe ka sabole; bara ba rōna, le barali ba rōna, le basali ba rōna, ke bathōpuoa. ₁₀Joale ke rerile ho etsa selekane le Morena Molimo oa Iseraele, e le hore khalefo ea hae e tšabehang e tle e fele. ₁₁Bara ba ka, se beng mahlasoa, hobane Morena o le khethile hore le eme kapele ho eena, le mo sebeletse, le be basebeletsi ba hae ba mo chesetsang mokubetso.”

₁₂Joale Balevi bana ba qalella ho sebetsa: Mahate, mora oa Amasai, le Joele, mora oa Asariea, e leng ba morabe oa Kohate, le Kishe, mora oa Abade, le Asariea, mora oa Jehaleele, e leng ba morabe oa Merari, le Jōoa, mora oa Simma, le Edene, mora oa Jōoa, e leng ba morabe oa Gereshone, ₁₃le Shimeri, le Jeiele, e leng bara ba Elesafane, le Sekariea le Mataneea, e leng bara ba Asafo, ₁₄le Jehiele, le Shimei, e leng bara ba Hemane, le Shemaea, le Usiele, e leng bara ba Jedutune.

₁₅Banna bana ba bōkella bana babo bona, ba itlhoekisa, 'me ba hloekisa le Tempele ea Morena, ho ea ka taelo ea khosi, ho latela lipolelo tsa Morena. ₁₆Baprista ba kena ka Tempeleng ea Morena ho ea e hloekisa. Litšila tsohle tseo ba li fumaneng ka Tempeleng ea Morena ba li hlekela ka seotloaneng sa Tempele ea Morena. Balevi ba nka litšila tsena ba li lahlela ka molatsoaneng oa Kiderone. ₁₇Ka letsatsi la pele la khoeli ea pele, ba qala ho hloekisa Tempele, 'me ka letsatsi la borobeli la khoeli eona eo, ba fihla lethuleng la Morena. Ba hloekisa Tempele ea Morena ka matsatsi a robeli, 'me ka letsatsi la leshome le metso e tšeletseng la khoeli eona eo ba qeta mosebetsi oo.

₁₈Joale Balevi ba ea ho khosi Hesekiea, ba re: “Re hloekisitse Tempele ea Morena kahohle, le aletare ea nyehelo ea secheso, le thepa eohle ea eona, le tafole ea bohobe bo halalelang, le thepa eohle ea eona. ₁₉Le thepa eohle eo khosi Akase a ileng a e silafatsa, ha a ne a siteloa Morena mehleng ea puso ea hae, re e beile hantle, ra e hloekisa, 'me joale re e beile kapele ho aletare ea Morena.”

₂₀Khosi Hesekiea a tsoha e sa le ka malungoalungoana, a bitsa babusi bohle ba motse, 'me ba nyolohela Tempeleng ea Morena. ₂₁Ba tlisa lipohoana tse supileng, le lipheleu tse supileng, le likonyana tse supileng, le liphooko tse supileng, e le nyehelo e tlosang sebe bakeng sa lelapa la khosi, le bakeng sa Sehalalelo, le bakeng sa sechaba sa Juda. A laela baprista, e leng bara ba Arone, hore ba etse nyehelo ka tsona holim'a aletare ea Morena. ₂₂Eaba ba hlaba lipohoana, baprista ba nka mali a tsona, 'me ba fōka ka 'ona holim'a aletare. Ka mokhoa o joalo, ha ba se ba hlabile lipheleu, ba fōka holim'a aletare ka mali a tsona; ba hlaba le likonyana, 'me ba fōka holim'a aletare ka mali a tsona. ₂₃Joale ba tlisa liphooko ho khosi le ho sechaba bakeng sa nyehelo e tlosang sebe, ba li bea matsoho holimo.

₂₄Baprista ba li hlaba, 'me ba isa mali a tsona aletareng, e le nyehelo e etsetsang Baiseraele bohle tefelo ea sebe, hobane khosi e ne e ile ea laela hore nyehelo ea secheso, le nyehelo e tlosang sebe, li etsetsoe sechaba sohle sa Iseraele.

₂₅Ho latela taelo ea Davida, le ea Gade, senohe sa khosi, le ea moporofeta Nathane, khosi Hesekiea a bea Balevi litulong tsa bona, ka Tempeleng ea Morena, ba nkile matlheretlhere, le likatara, le liharepa, hobane hona e ne e le taelo ea Morena, eo a e entseng ka baporofeta ba hae. ₂₆Balevi ba ema ba nkile liletsa tsa Davida, baprista bona ba nkile literompeta.

₂₇Hesekiea a laela hore ho etsetsoe nyehelo ea secheso holim'a aletare. Ha ba qala ho etsa nyehelo ea secheso, ha bineloa Morena lipina, ha letsoa le literompeta, le liletsa tse ileng tsa khethoa ke Davida, khosi ea Iseraele. ₂₈Sechaba sohle sa khumama, sa rapela, libini tsa bina, le literompeta tsa letsoa; hona ha tsoela pele ho fihlela nyehelo ea secheso e phethoa.

₂₉Ha ba qetile ho etsa nyehelo, khosi le bohle ba neng ba e-na le eona, ba khumama, 'me ba rapela. ₃₀Ho feta mona, khosi Hesekiea le mahosana ba laela Balevi hore ba rorise Morena ka lithoko tsa Davida, le tsa Asafo oa moporofeta. Ba binela Morena lithoko ba thabile; ba khumama, 'me ba rapela.

₃₁Eaba Hesekiea o re: “Joale le ineetse Morena. Atamelang le tlise mahlabelo, le linyehelo tsa teboho ka Tempeleng ea Morena.” Sechaba sa tlisa mahlabelo le linyehelo tsa teboho, 'me bohle ba tlisa linyehelo tsa secheso, tsa boithaopo.

₃₂Palo ea linyehelo tsa secheso tseo sechaba se ileng sa li tlisa e ne e le mashome a supileng a lipohoana, le lipheleu tse lekholo, le likonyana tse makholo a mabeli. Tsena tsohle e ne e le tsa ho etsetsa Morena nyehelo ea secheso. ₃₃Tse neng li abetsoe Morena e ne e le lipohoana tse makholo a tšeletseng, le likhutšoane tse likete tse tharo. ₃₄Empa baprista ba ne ba se bakae, hoo ba neng ba sitoa ho buha liphoofolo tsohle tsa nyehelo ea secheso; ka baka leo, bana babo bona, e leng Balevi, ba ba thusa ho fihlela mosebetsi o phethoa, le ho fihlela baprista ba bang ba itlhoekisitse, hobane Balevi ba ne ba chesehela ho itlhoekisa ho feta baprista. ₃₅Le liphoofolo tsa linyehelo tsa secheso li ne li le ngata, le mafura a linyehelo tsa teboho. Nyehelo e 'ngoe le e 'ngoe ea secheso e ne e tsamaea le nyehelo ea lino.

Eaba mosebetsi oa Tempele ea Morena o busetsoa malulong. ₃₆Hesekiea a nyakalla, le sechaba sohle sa nyakalla, ka baka la seo Molimo a ileng a se etsetsa sechaba sa hae, le hona ka potlako.