2 LIKETSAHALO 27

₁Jotame o ne a e-na le lilemo tse mashome a mabeli a metso e mehlano ha a qala ho busa. A busa ka lilemo tse leshome le metso e tšeletseng, a le Jerusalema. Lebitso la 'm'ae e ne e le Jerusha, morali oa Sadoke. ₂Jotame a khahlisa Morena, a etsa joalokaha Usiea, ntat'ae, a ile a etsa. Feela ha aa ka a kena ka Tempeleng ea Morena. Sechaba sona sa 'na sa etsa bokhopo.

₃Jotame a haha Monyako a Kaholimo oa Tempele ea Morena; le lerako la Ofele a le sebetsa haholo. ₄Le lithabeng tsa naha ea Juda a haha metse, 'me merung a haha liqhobosheane le litora.

₅A futuhela le khosi ea Baamone, a e hlōla. Ka sona selemo seo Baamone ba mo thèlla ka silefera e etsang boima ba likilo tse likete tse tharo le makholo a mane, le ka koro e etsang boima ba lithane tse sekete, le ka harese e etsang boima ba lithane tse sekete. Ka selemo sa bobeli, le ka selemo sa boraro, Baamone ba 'na ba mo thèlla hakaalo.

₆Jotame a matlafala, hobane o ne a tšepahala ho Morena Molimo oa hae.

₇Liketso tse ling tsa Jotame, le lintoa tsohle tsa hae, le mesebetsi ea hae, tsena li ngotsoe Bukeng ea Likhosi tsa Iseraele le tsa Juda. ₈O ne a e-na le lilemo tse mashome a mabeli a metso e mehlano ha a qala ho busa. A busa ka lilemo tse leshome le metso e tšeletseng, a le Jerusalema.

₉Jotame a shoa, 'me a epeloa le bo-ntat'ae, Motseng oa Davida. Akase, mora oa hae, a mo hlahlama.