Sechaba se fetohela Ataleea
1Ka selemo sa bosupa Jehoeada a imatlafatsa. A etsa tumellano le balaoli ba bahlabani ba lekholo, e leng Asariea, mora oa Jehorame, le Ishemaele, mora oa Jehohanane, le Asariea, mora oa Obede, le Maasiea mora oa Adaea, le Eleshafade, mora oa Sikeri. 2Ba potoloha le naha ea Juda, ba phutha Balevi ba tsoang metseng eohle ea Juda, le lihlooho tsa malapa a Iseraele, ba nt'o khutlela Jerusalema. 3Sechaba sohle sa etsa tumellano le khosi ka Tempeleng ea Molimo.
Jehoeada a re ho sechaba: “Mora oa khosi o tla busa joalokaha Morena a ile a tšepisa litlōhōlō tsa Davida. 4Seo le tla se etsa ke sena: Sehlopha sa pele, sa lihlopha tse tharo, se kenang mosebetsing ka Sabatha, e leng sa baprista le Balevi, se tla lebela menyako. 5Sehlopha sa bobeli se tla lebela ntlo ea khosi, sa boraro sona se lebele khoro e bitsoang Khoro ea Mothèo. Sechaba sohle se tla ba ba lebaleng la Tempele ea Morena. 6Ho se be ea kenang ka Tempeleng ea Morena, haese baprista feela, le Balevi ba sebeletsang. Ke bona feela ba tla kena, hobane baa halalela. Empa sechaba sohle sona se tla ela hloko litaelo tsa Morena. 7Balevi bohle ba tla teela khosi hare, motho le motho a tšoere lihlomo tsa hae. Mang kapa mang ea tla kena ka Tempeleng a bolaoe. Le be le khosi hohle moo e eang teng.”
8Balevi, le sechaba sohle sa Juda, ba phetha kahohle kamoo moprista Jehoeada a neng a ba laetse kateng. Molaoli ka mong a tla le balebeli ba hae ba kenang mosebetsing ka Sabatha; a ba kopanya le ba neng ba tšoanela ho phomola ka Sabatha, ka ha moprista Jehoeada a ne a sa ba lokolla mosebetsing ka Sabatha. 9Moprista Jehoeada a nea balaoli ba bahlabani ba lekholo marumo a khosi Davida, le lithèbè tsa hae, le lithejana tsa hae, tse neng li le ka Tempeleng ea Molimo. 10A hlophisa sechaba sohle, monna ka mong a tšoere lihlomo tsa hae. Thekō ea bona ea tloha ntlheng e ka letsohong le letona la Tempele, ho isa ntlheng e ka letsohong le letšehali, ho pota-pota Tempele, le aletare, ba teetse khosi hare. 11Joale Jehoeada a hlahisa mora oa khosi, ba mo roesa mofapahlooho, ba mo nea le Buka ea Molao, 'me ba mo etsa khosi. Jehoeada le bara ba hae ba mo tlotsa, 'me ba re: “Khosi e ke e re phelele!”
Lefu la Ataleea
12Ha Ataleea a utloa litlatse tsa sechaba, ha se ntse se matha, 'me se phafa khosi, a tla ho sona ka Tempeleng ea Morena. 13A talima, 'me a bona khosi e eme pel'a tšiea e pel'a monyako, mahosana le baletsi ba literompeta ba le pel'a khosi. Sechaba sohle sa nyakalla, sa letsa literompeta, le libini, ka liletsa tsa tsona tsa etella 'mino pele. Ataleea a hahōla liaparo tsa hae, a re: “Bohlabaphieo! Bohlabaphieo!”
14Moprista Jehoeada a laela balaoli ba bahlabani ba lekholo, e leng baokameli ba mabōtho, a re ho bona: “Mo ntšeng kahar'a mokhopi! Motho ea tla mo sala morao a bolaoe ka sabole!” Moprista Jehoeada o ne a ile a re: “Ha a tšoanele ho bolaeloa ka Tempeleng ea Morena.” 15Ba mo tšoara, 'me ea re ha a fihla Monyakong oa Lipere, pel'a ntlo ea khosi, ba 'molaea.
Jehoeada o etsa liphetoho
16Joale Jehoeada a etsa selekane pakeng tsa hae le sechaba, le khosi, hore e be sechaba sa Morena. 17Sechaba sohle sa kena ka tempeleng ea Baale, sa e heletsa, sa thuakanya lialetare le litšoantšo tsa Baale, sa bolaela Matane, moprista oa Baale, kapele ho lialetare tseo.
18Jehoeada a bea baprista, e leng Balevi, hore ba hlokomele Tempele ea Morena. Ke bao Davida a neng a ba abetse hore ba sebeletse ka Tempeleng ea Morena, ba etsetse Morena linyehelo tsa secheso, joalokaha ho ngotsoe Bukeng ea Molao oa Moshe. Ba etsa hona ba nyakaletse, ba bina joalokaha Davida a ile a ba laela. 19A bea balebeli menyakong ea Tempele ea Morena, e le hore mang kapa mang ea sesila a se ke a kena ka ho eona.
20Jehoeada, a e-na le balaoli ba bahlabani ba lekholo, le mahosana, le babusi ba sechaba, le sechaba sohle, ba ntša khosi ka Tempeleng ea Morena. Ba kena ka tlung ea khosi ka Monyako o Kaholimo, 'me ba e bea holim'a terone ea puso. 21Sechaba sohle sa naha eo sa nyakalla, motse oa e-ba le khotso, kamora' hoba Ataleea a bolaoe ka sabole.
