1 TIMOTHEA 4

₁Moea o bolela ka ho tōtōbala hore mehleng ea morao ba bang ba tla koenehela tumelo, ba khomarele meea e khelosang, le lithuto tsa bademona, ₂ka baka la boikaketsi ba batho ba buang leshano, bao matsoalo a bona a nang le letšoao la libe tsa bona. ₃Ba tla thibela batho ho nyalana, ba re ho iloe lijo tse itseng, athe Molimo o li etselitse hore li jeoe ka teboho ke ba lumelang, ba tsebang 'nete ka ho tlala. ₄Tsohle tseo Molimo a li hlolileng li ntle, 'me ha ho letho la tsona le tšoanetseng ho lahloa, empa eka khona tsohle li amoheloe ka teboho, ₅hobane li halaletsoa ka lentsoe la Molimo le ka thapelo.

₆Ha u hlalosetsa bana babo rōna tsena, u tla ba mosebeletsi oa sebele oa Kreste Jesu, ea ōtloang ka lipolelo tsa tumelo le tsa thuto e ntle eo u e latetseng ka hloko. ₇Hana litšōmo tse se nang hlompho, tse loketseng litsohatsana. Ikoetlisetse borapeli. ₈Koetliso ea 'mele ha e na thuso e kholo, athe borapeli bo na le thuso linthong tsohle, bo re tšepisa bophelo ba hona joale, esita le ba nako e tlang.

₉Ke lentsoe la 'nete, le lokelang ho amoheloa ke bohle ka ho tlala. ₁₀Ha e le mona re sebetsa ka thata, re bile re loana, ke hobane re tšepile Molimo ea phelang, eo e leng Mopholosi oa batho bohle, haholo-holo ba lumelang.

₁₁U ba laele, 'me u ba rute tsena. ₁₂Ho se be ea u nyelisang ka baka la bocha ba hao, u mpe u iketse mohlala ho balumeli ka lipolelo, ka metsamao, ka lerato, ka tumelo le ka bohloeki. ₁₃Ho fihlela ke e-tla, u 'ne u bale Mangolo a halalelang, u khothatse, u rute. ₁₄U se ke ua lebala ho sebelisa nèo ea moea, eo u e filoeng ka boporofeta, mohla lekhotlana la baholo le neng le u bea matsoho.

₁₅Thahasella lintho tsena, ikakhele ho tsona ka setōtsoana, hore katleho ea hao e tle e bonahale ho bohle. ₁₆Itlhokomele, u hlokomele le thuto ea hao. Tiisetsa ho tsena, hobane ka ho etsa joalo u tla ipholosa, u be u pholose le ba u mamelang.