1 SAMUELE 30

₁Ka letsatsi la boraro, ha Davida le banna ba hae ba fihla Sikelage, ba fumana Baamaleke ba futuhetse naha e ka boroa, le motse oa Sikelage. Ba ne ba ripitlile motse oo oa Sikelage, ba o chesitse ka mollo, ₂ba hapile basali ba moo, empa ba sa bolaea motho, ebang ke e moholo kapa ke e monyenyane. Ba ne ba ba hapile, ba ile ka bona.

₃Ha Davida le banna ba hae ba fihla motseng, ba fumana o chesitsoe ka mollo. Basali ba bona, le bara ba bona, le barali ba bona, ba ba nkile, e le bathōpuoa. ₄Davida le banna bao a neng a e-na le bona, ha ba bona hona, ba lla haholo, ho fihlela ba bile ba khathala ke ho lla. ₅Basali ba Davida ba babeli, e leng Ahinoame oa Mojesereele, le Abikaele eo e neng e le mohat'sa mofu Nabale oa Mokaramele, le bona e ne e le bathōpuoa.

₆Davida o ne a tšoenyehile haholo; banna ba ne ba re ba mo tlepetsa ka majoe, hobane lipelo tsa bona li ne li utloile bohlōkō, monna ka mong a llela bara ba hae le barali ba hae. Empa Davida a ikhothatsa ka ho tšepa Morena Molimo oa hae.

₇Eaba Davida o re ho moprista Abiatare, mora oa Ahimeleke: “Ak'u ntlisetse setipe!” Kahoo Abiatare a tlisetsa Davida setipe. ₈Joale Davida a botsa Morena, a re: “Na nka phallela bahlaseli bale? Ebe ke tla ba fumana?”

Morena a mo araba, a re: “Ba phallele, hobane u tla fela u ba fumane, u be u ba hlatsise tsohle.”

₉Kahoo Davida a ea, a e-na le banna ba makholo a tšeletseng, 'me ba fihla molatsoaneng oa Besore, moo ba khathetseng ba ileng ba sala teng. ₁₀Empa Davida a tsoela pele ho ba phallela, a e-na le banna ba makholo a mane, hobane ba makholo a mabeli ba neng ba khathetse hoo ba ileng ba sitoa ho tšela molatsoana oa Besore, ba ile ba sala.

₁₁Ba fumana monna oa Moegepeta a le har'a naha, ba mo isa ho Davida, ba mo fa bohobe, a ja; ba mo fa le metsi, a noa. ₁₂Ba mo fa leqebekoane la mangangajane a feiee, le masihla a mabeli a morara oa mangangajane. Ha a se a jele a boela a matlafala, hobane o ne a qetile matsatsi a mararo le masiu a 'ona a sa je bohobe, a sa noe metsi.

₁₃Joale Davida a re ho eena: “U oa bafe? U tsoa kae?”

Eena a re: “Ke mohlankana oa Moegepeta, 'me ke lekhoba la Moamaleke. Mong'a ka o ile a ntšiea maoba, hobane ke ne ke kula. ₁₄Re ne re hlasetse naha ea Bakerete e ka boroa ho Juda, le naha e ka boroa ea morabe oa Kalebe, 'me ra chesa Sikelage ka mollo.”

₁₅Eaba Davida o re ho eena: “Na u ka nkisa moo sehlopha seo sa bahlaseli se leng teng?”

Mohlankana a re: “Ntlhapanyetse ka lebitso la Molimo, hore ha u na ho mpolaea, kapa ua neelana ka 'na matsohong a mong'a ka, 'me ke tla u isa moo sehlopha sena sa bahlaseli se leng hona teng.”

₁₆Mohlankana a mo isa ho sona, 'me a fumana Baamaleke ba hasahasane har'a naha, ba e-ja, ba e-noa, ba hobela, ba thabetse khapo e ngata eo ba neng ba e nkile naheng ea Bafilesita le naheng ea Juda.

₁₇Davida a ba bolaea ho tloha ka shoalane, ho ea fihla phirimaneng ea letsatsi le hlahlamang. Ha se ke ha phonyoha le ea mong oa bona, haese bahlankana ba makholo a mane, ba ileng ba loabela likamele, ba baleha. ₁₈Davida a khutlisa tsohle tse neng li hapiloe ke Baamaleke, a ba a lopolla le basali ba hae ba babeli. ₁₉Ba fumana tsohle li ntse li le kaofela: Bara le barali, le khapo, le eng kapa eng eo Baameleke ba neng ba e hapile. Davida a ba hlatsisa tsena tsohle. ₂₀Bo-Davida ba sheshena mehlape eohle ea likhutšoane le ea likhomo tsa Baameleke, ba e eteletsa kapele ho e neng e hapiloe, eaba ba ntse ba hōoa, ba re: “Ena ke khapo ea Davida!”

₂₁Joale Davida a fihla ho banna ba makholo a mabeli, ba neng ba khathetse hoo ba ileng ba sitoa ho mo latela, 'me ba sala molatsoaneng oa Besore. Banna bao ba ea khahlanyetsa Davida le batho bao a neng a e-na le bona. Ha Davida a atamela pel'a banna bao a ba lumelisa. ₂₂Joale banna bohle ba khopo, ba lekhonatha har'a bao Davida a neng a ile le bona, ba re: “Kaha ba sa ka ba ea le rōna, re ke ke ra ba hapisa letho khapong eo re tlang le eona, haese hore monna ka mong a ka nka mosali oa hae, le bana ba hae, a tsamaea le bona, a itlhèka.”

₂₃Empa Davida a re: “Bana beso, le ke ke la etsa joalo ka seo Morena a re neileng sona. O re sirelelitse, 'me sehlopha se neng se tlil'o re loantša a neelana ka sona matsohong a rōna. ₂₄Ke mang ea ka le mamelang tabeng ee? Joalokaha ea neng a ile ntoeng a e-na le seabo, le ea neng a setse a lebetse thōtō le eena o na le seabo. Ba tla arolelana ka ho tšoana.” ₂₅Ho tloha mohlang oo, eaba Davida o se a etselitse Baiseraele molao le taelo, 'me ho ntse ho le joalo le kajeno-ea-bokajeno.

₂₆Ha Davida a fihla Sikelage, a rōmela khapo e 'ngoe ho baholo ba Juda, e leng metsoalle ea hae, a re: “Mpho ea lōna, ea tse hapiloeng ho lira tsa Morena, ke eo.”

₂₇E ne e le mpho ea ba Bethele, le ba ka boroa ho Ramote, le ba Jatire, ₂₈le ba Arōoere, le ba Sifemoto, le ba Eshetemoa, ₂₉le ba Rakale, le ba metseng ea Bajerahemeele, le ba metseng ea Bakene, ₃₀le ba Horema, le ba Bore-Ashane, le ba Atake, ₃₁le ba Heborone, le ba libaka tsohle tseo Davida le banna ba hae ba kileng ba hloahloaela ho tsona.