1 SAMUELE 29

₁Bafilesita ba khōbōkanyetsa mabōtho a bona 'ohle Afeke. Baiseraele bona ba hloma haufi le seliba se Jesereele. ₂Mahosana a Bafilesita a 'na a subuhlellana ka makholo le ka likete; Davida le bahlabani ba hae ba e-na le Akishe, ea e-ba ba ho qetela. ₃Eaba mahosana a Bafilesita a re: “Baheberu baa ba batla'ng moo?”

Akishe a re ho mahosana a Bafilesita: “Enoa ke Davida, mohlanka oa Saule, khosi ea Iseraele, eo e seng e le nako a le ho 'na mona. Haesale a fihla mona, ha ke e-s'o fumane phoso ho eena ho fihlela kajeno.”

₄Empa mahosana a Bafilesita a halefela Akishe, a re ho eena: “Mo khutlisetse moo u mo fileng bokhinapere teng, u se ke ua mo lumella a ea le rōna ntoeng, esere a fetoha lehlabaphieo ha thekō li teana. A ka etsa khotso joang le mong'a hae, haese ka lihlooho tsa banna baa ba rōna? ₅Na hase eena Davida eo ba neng ba 'mina metjekong, ba re:

₆Joale Akishe a bitsa Davida, 'me a re ho eena: “Ke hlapanya ka Morena ea phelang, u tšepahetse ho 'na. U ile ua nkhahla ha re ntse re futuha le uena ka mabōtho. Ho tloha mohla u fihlang mona ho 'na, ho fihlela kajeno, ha ke e-s'o fumane bobe ba letho ho uena. Leha ho le joalo, mahosana ha a u amohele. ₇Ka baka lena he, khutla, u ikele ka khotso, u tle u se ke ua khopisa mahosana a Bafilesita.”

₈Eaba Davida o re ho Akishe: “Empa ke entse'ng? Ho tloha ka letsatsi leo ke fihlileng ka lona mona, ho fihlela kajeno, u fumane phoso efe ho mohlanka oa hao, hoo nke keng ka ea loantša lira tsa mong'a ka, khosi ea ka?”

₉Akishe a araba Davida, a re: “Kea tseba hore u tšepahala joaloka lengeloi la Molimo, empa leha ho le joalo, mahosana a Bafilesita a itse: ‘A se ke a ba a ea ntoeng le rōna!’ ₁₀Ka baka lena, u tle u tsohe e sa le ka malungoalungoana le bahlanka ba mong'a hao ba tlileng le uena, 'me hang-hang ha ho qala ho èla, u tsamaee.”

₁₁Kahoo Davida le banna ba hae ba tsoha e sa le ka malungoalungoana, ba tsamaea, ba khutlela naheng ea Bafilesita, 'me Bafilesita bona ba nyolohela Jesereele.