1 SAMUELE 27

₁Davida a bua ka pelo, a re: “Ka letsatsi le leng Saule o tla qetella a mpolaile. Ho molemo hore ke ipalehelle naheng ea Bafilesita, a tle a ntele, a se ke a hlola a mpatla naheng eohle ea Iseraele. Ka mokhoa o joalo ke tla phonyoha.”

₂Davida a tsamaea a e-na le banna ba makholo a tšeletseng, a ea ho Akishe, mora oa Maoke, khosi ea Gate. ₃Davida le banna ba hae ba jaka ha Akishe, naheng ea Gate. Monna e mong le e mong o ne a e-na le ba lelapa la hae. Davida le eena o ne a e-na le basali ba hae ba babeli, e leng Ahinoame oa Jesereele, le Abikaele oa Karamele, eo e neng e le mohats'a mofu Nabale. ₄Ha Saule a utloa hore Davida o balehetse Gate, a se ke a hlola a 'matla.

₅Davida a re ho Akishe: “Haeba u nkhauhetse, ak'u mphe setša ho o mong oa metse ea hao, ke ahe teng, hobane mohlanka oa hao a ke ke a aha le uena motseng oa khosi.”

₆Ke ha Akishe a mo nea Sikelage ka lona letsatsi leo. Ke ka lebaka leo Sikelage e leng motse oa likhosi tsa Juda le kajeno-ea-bokajeno. ₇Davida a lula naheng ea Bafilesita selemo le khoeli tse 'ne.

₈Davida le banna ba hae ba nyoloha, ba futuhela Bageshure, le Bagesere, le Baamaleke. Bao e ne e le bona baahi ba naha eo ba khale, ho tloha Shure ho ea fihla naheng ea Egepeta. ₉Davida a bolaea batho bohle ba naha eo. O ne a ee a se ke a siea monna kapa mosali a ntse a phela; a hape linku, le likhomo, le litonki, le likamele, esita le liaparo, ebe joale o khutlela ho Akishe.

₁₀Ha Akishe a botsa Davida, a re: “U ne u hlasetse kae kajeno?” Davida o ne a ee a re: “Ka boroa ho naha ea Juda,” kapa a re: “Ka boroa ho naha ea Jerahemeele,” kapa a re: “Ka boroa ho naha ea Bakene.” ₁₁Davida o ne a sa ke be a tle Gate le monna kapa mosali ea ntseng a phela, hobane o ne a ee a re: “Ba ka tšoha ba bolela hore Davida o entse tjena le tjena.” Ena ea e-ba tloaelo ea hae ka nako eohle ha a ntse a phela naheng ea Bafilesita. ₁₂Akishe a kholoa Davida, a re: “O entse hore sechaba sa habo sa Baiseraele se mo hloee, 'me kahoo e tla ba mohlanka oa ka kamehla eohle.”