Davida o hauhela Saule hape
1Basife ba fihla Gibea, ho Saule, ba re: “Davida o ipatile leralleng la Hakila, le pel'a lehoatata.”
2Saule a tsamaea, a theohela lehoatateng la Sife, a e-na le banna ba likete tse tharo ba mokhetho oa Baiseraele, ho ea batla Davida lehoatateng la Sife. 3Saule a hloma holim'a leralla la Hakila, le pel'a tsela, lehoatateng. Davida o ne a ntse a le lehoatateng, 'me a bona hore Saule o ntse a mo setse morao ho ea fihla lehoatateng leo. 4Davida a rōmela lihloela, 'me tsa 'molella hore ke 'nete, Saule o teng.
5Davida a tsamaea, a ea fihla moo Saule a hlommeng teng. Davida a bona moo bo-Saule, le Abinere mora oa Nere, eo e neng e le molaoli oa mabōtho a Saule, ba robetseng teng. Likariki tsa ntoa li ne li entse sakana-la-nkōpe, Saule a robetse kahar'a lona, 'me bahlabani ba hlomme ho pota-pota Saule.
6Joale Davida a botsa Ahimeleke oa Mohete, le Abishai, mora oa Seruea, ngoan'abo Joabe, a re: “Ke mang ea tla theohela le 'na liahelong tsa Saule?”
Eaba Abishai o re: “Ke tla theohela le uena.”
7Joale bo-Davida le Abishai ba fihla ho bahlabani ba Saule bosiu, 'me ba bona Saule a robetse kahar' a sakana-la-nkōpe le entsoeng ka likariki tsa ntoa, lerumo la hae le hlonngoe fatše pel'a hlooho ea hae, bo-Abinere le bahlabani ba robetse ba mo pota-potile.
8Eaba Abishai o re ho Davida: “Kajeno Molimo o neelane ka sera sa hao matsohong a hao; ka baka lena, kea u rapela: Ntumelle ke mo hlabelle fatše ka lerumo hanngoe feela, 'me a ke ke a hlola a kunya.”
9Empa Davida a re ho Abishai: “U se ke ua 'molaea! Ke mang ea ka phahamisetsang motlotsuoa oa Morena letsoho, eaba ha a fumanoe a le molato?” 10Davida a boela a re: “Ke hlapanya ka Morena ea phelang, u se ke ua leka! Ke Morena ea tla 'molaea. Nako ea ho shoa ha hae e tla fihla, kapa o tla bolaeloa ntoeng. 11Morena a mpe a nthibele, ke se ke ka phahamisetsa motlotsuoa oa hae letsoho. Joale kea u rapela: Nka lerumo le pel'a hlooho ea hae, le lekuka la metsi, re tsamaee.”
12Ka mokhoa o joalo Davida a nka lerumo le lekuka la metsi le pel'a hlooho ea Saule, eaba baa tsamaea. Ha se ke ha e-ba le motho le ea mong ea ileng a bona, kapa a tseba se etsahetseng, kapa ea kileng a phaphama. Bohle ba ne ba khalehile, hobane Morena o ne a ba isitse le sephume sa boroko.
Davida o soma Abinere
13Joale Davida a tšelela ka nq'ane, a hloella holim'a leralla le hōjana, ho e-na le sebaka se seholo pakeng tsa hae le Saule. 14Davida a hōoeletsa bahlabani ba Saule, le Abinere, mora oa Nere, a re: “Ha u arabele ke'ng, Abinere!”
Abinere a arabela, a re: “U mang uena, u hōoeletsang khosi?”
15Davida a re ho Abinere: “Na u mohale? Ke mang ea kang uena moo naheng ee ea Iseraele? Joale ke ka baka la'ng u sa sireletsang mong'a hao, e leng khosi? Motho o sa tsoa tloha mono liahelong tsa lōna, a il'o bolaea khosi, e leng mong'a hao. 16Ntho ena eo u e entseng e mpe! Ke hlapanya ka Morena ea phelang, le lokeloa ke lefu, hobane ha lea ka la sireletsa mong'a lōna, e leng motlotsuoa oa Morena. Bona mona! Lerumo la khosi le kae? Kuka la hae lona le kae?”
Saule o ipona molato
17Saule a tseba lentsoe la Davida, eaba o re: “Davida, mora oa ka, na leo ke lentsoe la hao?”
Davida a re: “Ke lentsoe la ka, mong'a ka, khosi ea ka.” 18Davida a boela a re: “Ke ka baka la'ng, mong'a ka, ha u nts'u phalalisa mohlanka oa hao? Ke entse'ng? Kapa ke na le morero ofe o mobe? 19Ka baka leo, kea u rapela, mong'a ka, khosi ea ka, ak'u mamele mantsoe a mohlanka oa hao. Haeba ke Morena ea u susumelitseng hore u ntoantše, ha a mpe a amohele nyehelo. Empa haeba ke batho, ba ke ba rōhakehe mahlong a Morena, hobane kajeno ba ntelekile naheng eo e leng ea Morena, ba re: ‘Tsamaea, u e'o sebeletsa melimo e meng.’ 20Ka baka lena, u se ke ua etsa hore mali a ka a tšolohele naheng esele, hōle le Morena, hobane khosi ea Iseraele e tlil'o batla letsetse, joalokaha motho a tsoma khoale har'a lithaba.”
21Eaba Saule o re: “Ke entse sebe; khutla Davida, mora oa ka; ha ke sa tla hlola ke u etsa letho, hobane ka letsatsi lena bophelo ba ka e bile ntho ea bohlokoa mahlong a hao. Kea bona hore ke sebelitse ka bothoto, 'me ke entse phoso e kholo.”
22Davida a araba, a re: “Bona lerumo la khosi! Rōmela e mong oa bahlankana a tl'o le lata. 23Morena o putsa bohle ba lokileng, ba tšepahalang. Kajeno lena Morena o ne a neelane ka uena matsohong a ka, empa ha kea ka ka phahamisetsa motlotsuoa oa Morena letsoho. 24Joalokaha kajeno ke ile ka u qenehela, le 'na Morena a ke a nqenehele, a 'namolele matšoenyehong ana 'ohle.”
25Eaba Saule o re ho Davida: “Davida, mora oa ka, u ke u hlohonolofale! Ke hona u sa tla etsa likhōlō, 'me u tla atleha.”
Davida a ikela ka tsela ea hae, le Saule a khutlela ha hae.
