Davida o hauhela Saule
1Ha Saule a khutla ho tsoa phalalisa Bafilesita, batho ba 'molella, ba re: “Hela! Davida o lehoatateng la Ene-Gedi.” 2Saule a nka mokhetho oa banna ba likete tse tharo sechabeng sohle sa Iseraele, a tsamaea ho ea batla Davida le banna ba hae Mafikeng a Lipōli tsa Naha.
3Eaba Saule o fihla masakeng a linku, a pel'a tsela, moo ho neng ho e-na le lehaha teng; a kena ka lehaheng leo ho ea ithōma. Davida le banna ba hae ba ne ba keneletse khocheletsaneng ea lehaha. 4Joale banna ba Davida ba re ho eena: “Lena ke lona letsatsi leo Morena a neng a bue ka lona ho uena, a re: ‘Bona, ke tla neelana ka sera sa hao matsohong a hao, 'me u tla iketsetsa borata ka sona.’ ” Eaba Davida o ema ka lenyele, o seha qola ea seaparo sa Saule.
5Kamorao ho mona letsoalo la Davida la mo ja, hobane a ne a sehile qola ea seaparo sa Saule. 6Davida a re ho banna ba hae: “Morena a mpe a ntšoare letsoho, ke se ke ka etsa ntho ena ho mong'a ka, motlotsuoa oa Morena. Ke se ke ka ba ka mo isa letsoho, hobane ke motlotsuoa oa Morena.” 7Davida a khalemela banna ba hae ka mantsoe ana, a se ke a ba lumella ho tsohela Saule matla. Eaba Saule oa ema, o tsoa ka lehaheng, o ikela ka tsela ea hae.
8Hamorao Davida le eena a ema, a tsoa ka lehaheng, a hōoeletsa Saule, a re: “Khosi ea ka! Mong'a ka!” Ha Saule a hetla, Davida a obama, a isa hlompho. 9Davida a re ho Saule: “Ke ka baka la'ng ha u mamela batho ba reng: ‘Itlhokomele, Davida o rata ho u ntša kotsi’? 10Kajeno lena u bone kamoo Morena a neng a neelane ka uena matsohong a ka kateng, ha u le ka lehaheng. Ba bang ba ne ba re ke u bolaee, empa ke ile ka u hauhela, ka re: ‘Nke ke ka isa mong'a ka letsoho, hobane ke motlotsuoa oa Morena.’ 11Hape ak'u bone, ntate: Bona qola ea seaparo sa hao ke ena ka letsohong la ka. Ke ile ka seha qola ea seaparo sa hao, empa ha kea ka ka u bolaea. Bona he, u be u tsebe hore ha kea u rerela bobe, kapa ho u fetohela. Ha kea u siteloa, empa uena u ntse u laletse hore u mpolaee. 12Morena a ke a ahlōle pakeng tsa rōna le uena, 'me Morena e be mophetetsi oa ka ho uena. Empa 'na nke ke ka u isa letsoho. 13Joalokaha maele a baholo-holo a bolela: ‘Bokhopo bo etsoa ke ba khopo,’ empa 'na nke ke ka u isa letsoho.
14“Ke mang eo khosi ea Iseraele e tsoileng bosele ka baka la hae? Ke mang eo e mo phalalisang? E phalalisa ntja e shoeleng, kapa letsetse! 15Ka baka leo, Morena e ke e be eena moahlōli, a ahlōle pakeng tsa rōna le uena. A ke a bone, a mpuelle, a 'namolele matsohong a hao.”
16Hoba Davida a bue mantsoe ana ho Saule, eaba Saule o re: “Davida, mora oa ka, na ke uena ea buang?” Saule a lla haholo. 17Joale Saule a re ho Davida: “U lokile ho mpheta, hobane uena u nketselitse tse molemo, athe 'na ke u putsitse ka tse mpe. 18Kajeno lena u mpontšitse kamoo u nkentseng hantle kateng, hobane leha Morena a ne a neelane ka 'na matsohong a hao, uena ha ua ka ua mpolaea. 19Ha motho a fumana sera sa hae, na a ka se tlohela sa ikela se ntse se phela? Morena a ke a u putse ka tse molemo, ka baka la seo u nketselitseng sona kajeno. 20Joale kea tseba hore u tla fela u be khosi, 'me 'muso oa Iseraele o tla theoa ke uena. 21Ka baka leo, ntlhapanyetse ka Morena hore u ke ke ua timetsa litlōhōlō tsa ka, le hore u ke ke ua felisa lebitso la ka tlung ea ntate.”
22Davida a hlapanyetsa Saule; Saule a ikela ha hae, empa Davida eena le banna ba hae ba nyolohela qhobosheaneng.
