Davida o pholosa motse oa Keila
1Davida a bolelloa, ha thoe: “Hela! Bafilesita ba futuhetse Keila, ba ntse ba nka lijo liotlong.”
2Eaba Davida o botsa Morena, o re: “Na nka futuhela Bafilesita baa?”
Morena a re ho Davida: “E-ea, u futuhele Bafilesita, 'me u namolele motse oa Keila.”
3Empa banna ba Davida ba re ho eena: “Haesita re tšaba re sa le moo Juda, re tla tšaba ho le hokae ha re e-ea Keila ho loantša mabōtho a Bafilesita?”
4Davida a boela a botsa Morena, 'me Morena a mo araba, a re: “Ema, u theohele Keila, hobane ke tla neelana ka Bafilesita matsohong a hao.” 5Eaba Davida o ea Keila a e-na le banna ba hae. A loantša Bafilesita, a hapa likhomo tsa bona, 'me a ba etsa mofela. Davida a namolela baahi ba Keila ka mokhoa ona.
6Ha Abiatare, mora oa Ahimeleke, a ne a balehela Keila ho Davida, o ne a ile a theoha a nkile setipe.
7Saule a tsebisoa hore Davida o fihlile Keila. Eaba Saule o re: “Molimo o neelane ka Davida matsohong a ka, hobane o ikentse lerabeng ka ho kena motseng o nang le likhoro, le mekoallo.” 8Saule a bitsa bahlabani bohle hore ba ee ntoeng, ba theohele Keila, ba e'o thibella Davida le banna ba hae.
9Davida o ne a tseba hore Saule o ntse a mo rera ka lekunutu; eaba o re ho moprista Abiatare: “Tlisa setipe seo koano!” 10Davida a re: “Oho, Morena Molimo oa Iseraele, mohlanka oa hao o utloile hore Saule o tla Keila ho tla ripitla motse ona ka baka la ka. 11Na baahi ba Keila ba tla neelana ka 'na matsohong a Saule? Na Saule o tla fela a theohele koano joalokaha mohlanka oa hao a utloile? Oho, Morena Molimo oa Iseraele, kea a rapela: Ak'u tsebise mohlanka oa hao.”
Morena a re: “O tla theohela.”
12Eaba Davida o re: “Na baahi ba Keila ba tla neelana ka 'na, le ka banna ba ka, matsohong a Saule?”
Morena a re: “Ba tla neelana ka uena.”
13Eaba Davida le banna ba hae ba ka bang makholo a tšeletseng baa tsamaea, ba tloha Keila, ba 'na ba lelera. Ha Saule a utloa hore Davida o balehile Keila, eaba ha a sa futuha.
Davida o ipata Horeshe
14Davida a phela liqhobosheaneng tse lehoatateng, le naheng e maralla e pel'a Sife. Saule a mo tsoma ka matsatsi 'ohle, empa Molimo ha aa ka a neelana ka Davida matsohong a hae.
15Davida a tseba hore Saule o tsoile hae ho ea mo tsoma, a 'molaee. Davida o ne a le Horeshe, lehoatateng la Sife; 16eaba Jonathane, mora oa Saule, oa tsamaea, o ea ho Davida Horeshe, 'me a mo khothaletsa hore a tšepe Molimo. 17Jonathane a re ho Davida: “Se tšabe, hobane Saule, e leng ntate, a ke ke a u fumana. U tla ba khosi ea Iseraele, 'me 'na ke tla ba letsoho la hao le letona. Le Saule, e leng ntate, o tseba joalo.” 18Bobeli ba bona ba etsa selekane kapele ho Morena; Davida a lula moo Horeshe, Jonathane eena a khutlela ha hae.
Bohlabaphieo ba Basife
19Joale Basife ba nyoloha, ba ea ho Saule ha a le Gibea, ba re: “Davida o ipatile naheng ena ea rōna, liqhobosheaneng tse Horeshe, lerallaneng la Hakila, le ka boroa ho lehoatata. 20Ka baka leo he, khosi ea ka, haeba u rata ho theoha, theoha, 'me rōna re tla neelana ka eena matsohong a hao.”
21Saule a re: “Morena a ke a le hlohonolofatse, hobane lōna le nkutloela bohlōkō. 22Kea le rapela he: Tsamaeang, le e'o batlisisa, le tsebe, le be le bone seforo sa hae. Le tsebe le hore na ke mang ea 'moneng moo, hobane ke boleletsoe hore ke ramaqiti. 23Ka baka leo, hlokomelang, le tsebe liforo tsohle tseo a ipatang ho tsona, ebe le ntsebisa seo e leng 'nete, 'me ke tla ea le lōna. Haeba a ntse a le naheng eo, ke tla 'matla har'a sechaba sohle sa Juda.”
24Basife bao ba tsamaea, ba khutlela Sife, ba etella Saule pele. Davida le banna ba hae ba ne ba le lehoatateng le Maone, phuleng e ka boroa ho lehoatata.
Davida o phōnyōha ho Saule
25Saule le banna ba hae ba tsamaea ho ea batla Davida. Davida a tsebisoa taba ena, 'me a theohela lefikeng, a ea phela lehoatateng la Maone. Ha Saule a utloa taba ena, a phalalisa Davida ho ea fihla lehoatateng la Maone.
26Saule le banna ba hae ba pota thaba ka nq'ena, Davida le banna ba hae bona ba e pota ka nq'ane. Ka baka la ho tšaba Saule, Davida le banna ba hae ba baleha ka potlako, hobane Saule le banna ba hae ba ne ba leka ho kopela Davida le banna ba hae hare, hore ba tle ba ba tšoare. 27Empa leqosa la fihla ho Saule, la re: “Potlaka, u khutle, hobane Bafilesita ba futuhetse naha ena.” 28Eaba Saule o khaotsa ho phalalisa Davida, o futuhela Bafilesita. Ka baka leo, sebaka seo ba se rea lebitso la Lefika la Karohano. 29Davida a tloha moo, a ea aha liqhobosheaneng tsa Ene-Gedi.
