Ho loantšoa Baameleke
1Samuele a re ho Saule: “Morena o ile a nthōma hore ke u tlotse, u be khosi ea sechaba sa hae sa Iseraele. Joale, ka baka leo, mamela mantsoe a Morena. 2Morena oa mabōtho o bua tjena: ‘Ke hopola seo Baamaleke ba ileng ba se etsa ho Baiseraele, kamoo ba neng ba ba thibele tsela kateng, ha Baiseraele ba ne ba nyoloha Egepeta. 3Tsamaea he, u e'o loantša Baamaleke; u timetse tsohle tseo ba nang le tsona ho hang, 'me u se ke ua ba ua ba qenehela. U bolaee monna le mosali, bana le masea, likhomo le linku, likamele le litonki.’ ”
4Eaba Saule o bitsa sechaba, 'me o se bala se le Telaime. E ne e le banna ba litaaso ba likete tse makholo a mabeli; ba morabe oa Juda e le banna ba likete tse leshome. 5Joale Saule a fihla motseng oa Baamaleke, 'me a fihla a lalla ka khohlong. 6Saule a re ho Bakene: “Tsamaeang, le tlohe mona har'a Baamaleke, esere ka le timetsa 'moho le bona. Lōna le ne le hauhele bana ba Iseraele bohle ha ba ne ba nyoloha Egepeta.” Eaba Bakene ba tloha har'a Baamaleke.
7Saule a hlōla Baamaleke ho tloha Hafila, ho ea fihla Shure, ka bochabela ho Egepeta. 8Saule a tšoara Akake, khosi ea Baamaleke, a ntse a phela. A bolaea sechaba sohle sa Baamaleke ka sabole. 9Empa bo-Saule le sechaba ba hauhela Akake; ba qenehela le linku tse ntle-ntle, le likhomo, le tse hlahlamang tseo ka botle, le likonyana, le tsohle tse ntle, 'me tsena ba se ke ba rata ho li bolaea ho hang. Empa liphoofolo tsohle tse se nang thuso, tse tsiapang, tsona ba li bolaea ho hang.
Morena o furalla Saule
10Morena a bua ho Samuele, a re: 11“Kea itšoabela ha e le mona ke ile ka etsa hore Saule e be khosi, hobane o mphuraletse, ha a ea phetha seo ke mo laetseng sona.” Hona ha halefisa Samuele, 'me a ipiletsa ho Morena bosiu bohle.
12Samuele a tsoha e sa le ka malungoalungoana ho ea kopana le Saule. Samuele a bolelloa, ha thoe: “Saule o fihlile Karamele, 'me o ntse a iketsetsa sefika hona teng. O se a bile a khutlile, a theohetse Gilegale.”
13Samuele a fihla ho Saule, 'me Saule a re ho eena: “Morena a ke a u hlohonolofatse! Ke phethile taelo ea Morena!”
14Samuele a re: “Ho lla hoo ke ho utloang ha linku le ha likhomo, ho bolela'ng?”
15Saule a re: “Banna ba li nkile ho Baamaleke, hobane batho ba ile ba qenehela tse ntle-ntle tsa linku le tsa likhomo, e le hore ba tle ba etsetse Morena Molimo oa bona, sehlabelo. Tse ling tsona re li bolaile ho hang.”
16Eaba Samuele o re ho Saule: “Bea butle, ke tla u bolella seo Morena a se buileng ho 'na bosiung bona.”
Saule a re ho Samuele: “Ak'u bue!”
17Samuele a re: “Ha ke re u hlooho ea merabe ea Iseraele, le hoja uena u italima u le e monyenyane? Morena o u tlotsitse hore u be khosi ea Iseraele. 18Morena o ile a u rōma, a re: ‘Tsamaea, u e'o timetsa baetsalibe bao ho hang, e leng Baamaleke; u ba loantše ho fihlela ba fela tu!’ 19Joale ke hobane'ng u sa kang ua mamela lentsoe la Morena, eaba u se u oela khapo ka mahlo a matšo, 'me ua etsa ho hobe mahlong a Morena?”
20Saule a re ho Samuele: “Ke mametse taelo ea Morena. Ke tsamaile ka tsela eo Morena a ntaetseng hore ke tsamaee ka eona. Ke thōpile Akake, khosi ea Baamaleke. Sechaba se Baamaleke sona ke se timelitse ho hang. 21Empa ho tse hapiloeng, tse neng li tšoanetse ho timetsoa, banna ba ile ba inkela linku le likhomo tse ntle-ntle, ho tla etsetsa Morena Molimo a hao, sehlabelo mona Gilegale.”
22Samuele a re:
“Na Morena o khahloa
ke nyehelo tsa secheso,
na o khahloa
le ke 'ona mahlabelo,
joalokaha a khahloa
ke ho mamela taelo ea hae?
ho ikokobetsa ho molemo
ho feta sehlabelo,
ho mamela ho molemo
ho feta mafura a lipheleu.
23Ho fetohela Morena ke sebe
se kang boloi,
manganga ke sebe
se kang ho rapela melimo esele.
Kahobane u furaletse
taelo ea Morena,
le eena o u furaletse
hore u se be khosi!”
Saule o kōpa tšoarelo
24Saule a re ho Samuele: “Ke sitiloe, hobane ke tlōtse taelo ea Morena, le litaelo tsa hao ke li furaletse. Ke ile ka tšaba sechaba, 'me ka mamela lentsoe la sona. 25Ka baka leo, kea u rapela: Ntšoarele sebe sa ka, 'me u khutle le 'na, ke e'o khumamela Morena.”
26Samuele a re ho Saule: “Nke ke ka khutla le uena, hobane uena u furaletse taelo ea Morena; le Morena o se a u furaletse hore u se be khosi ea Iseraele.”
27Ha Samuele a reteleha, a tsamaea, Saule a tšoara qola ea kobo ea hae, 'me ea taboha. 28Samuele a re ho Saule: “Ka letsatsi lena, Morena o hahotse 'muso oa Iseraele matsohong a hao, 'me o o neile e mong ea lokileng ho u feta. 29Molimo, e leng tlōtla ea Iseraele, a ke ke a bua leshano, kapa a fetola maikutlo a hae. Eena hase motho, hoo a ka fetolang maikutlo a hae.”
30Eaba Saule o re: “Ke sitiloe! Leha ho le joalo kea u rapela: Ak'u ntlōtle moo baholo ba sechaba sa ka ba leng teng, le moo Baiseraele ba leng teng, 'me u khutle le 'na, e le hore ke tle ke e'o khumamela Morena.” 31Eaba Samuele o khutla le Saule, 'me Saule a khumamela Morena.
Akake oa bolaoa
32Eaba Samuele o re: “Ntlisetseng Akake, khosi ea Baamaleke.”
Akake a ea ho Samuele a thabile. Eaba Akake o re: “Ruri bohlōkō ba lefu bo fetile!”
33Samuele a re: “Joalokaha sabole ea hao e ile ea bolaela basali bana ba bona, har'a basali bao, 'm'ao le eena o tla bolaeloa ngoana.” Samuele a khabelaka Akake likotoana, moo Morena a ntseng a bona, a le Gilegale.
34Eaba Samuele o ikela Rama. Saule eena a ikela tlung ea hae e Gibea, motseng oa Saule. 35Samuele a se ke a hlola a ea bona Saule, ho fihlela Saule a be a e-shoa. Empa Samuele a llela Saule, 'me Morena a soaba ha a ile a etsa hore Saule e be khosi ea Iseraele.
