Saule o hlōla Baamone
1Nahashe oa Moamone a nyoloha, a hloma malebana le Jabeshe-Gileade. Banna bohle ba Jabeshe ba re ho Nahashe: “Etsa selekane le rōna, 'me re tla u sebeletsa.”
2Nahashe oa Moamone a re ho bona: “Ke tla etsa selekane le lōna ha feela re lumellana hore ke honye leihlo la letsoho le letona la e mong le e mong oa lōna, e le hore ke tle ke tlontlolle Baiseraele bohle.”
3Baholo ba Jabeshe ba re ho eena: “Ak'u re nee matsatsi a supileng, e le hore re ke re rōmele maqosa naheng eohle ea Iseraele. Haeba ho se ea re namolelang, re tla ineela ho uena.”
4Maqosa a fihla Gibea, motseng oa Saule, 'me a bolela mantsoe ana moo sechaba sohle se ntseng se utloa. Sechaba sohle sa phahamisa mantsoe, sa lla. 5Bonang, Saule o ne a e-tsoa masimong, a khanna lipholo, 'me a re: “Sechaba se jeoa ke'ng, ha se lla tjee?” Eaba sechaba se 'molella litaba tsa banna ba Jabeshe.
6Ha Saule a utloa mantsoe ana, Moea oa Molimo oa theohela holim'a hae ka matla, 'me khalefo ea hae ea tlōkōma haholo. 7Saule a nka lipholo tse peli, a li khaola likotoana, a li rōmela hohle naheng ea Baiseraele ka maqosa, a re: “Mang kapa mang ea sa lateleng Saule, lipholo tsa hae li tla etsoa tjena!” Morena a kenya sechaba letsoalo, 'me sa tsoa joalokaha eka ke motho a le mong. 8Saule a ba bala ha ba le Beseke; bana ba Iseraele ba etsa likete tse makholo a mararo, 'me banna ba Juda ba etsa likete tse mashome a mararo.
9Ba re ho maqosa a tsoang Jabeshe: “Le tle le re ho banna ba Jabeshe-Gileade: ‘Hosasane, ha letsatsi le le hloohong tsa mengala, le tla namoleloa.’ ” Maqosa a khutla, a bolella banna ba Jabeshe, 'me bao ba thaba. 10Banna ba Jabeshe ba re ho Nahashe: “Hosasane re tla tla ho uena, 'me uena u tla re etsa sohle seo u bonang se lokile.”
11Ka la hosasane Saule a arola sechaba lihlopha tse tharo. Sechaba sa fihla sa ikakhela kahar'a liahelo tsa Baamone e sa le ka malungoalungoana. Sa bolaea Baamone ho fihlela ha tsatsi le le hloohong tsa mengala. Masalla a Baamone a phasaphasa, ha se ke ha e-ba le ba babeli ba balehang ba le 'moho.
12Sechaba sa re ho Samuele: “Ke mang ea ileng a re: ‘Na Saule a ka fela a re busa?’ Tlisang banna bao re ba bolaee!”
13Empa Saule a re: “Ka letsatsi lena ha ho monna ea tla bolaoa, hobane kajeno Morena o namoletse Baiseraele.”
14Eaba Samuele o re ho sechaba: “Tloong, re eeng Gilegale, re e'o phatlalatsa hape hore Saule ke khosi.” 15Sechaba sohle sa ea Gilegale, 'me moo Morena a ntseng a bona, sa bea Saule hore e be khosi. Sa etsetsa Morena mahlabelo a nyehelo ea teboho hona moo. Saule le banna bohle ba Iseraele ba nyakalla haholo.
