Saule o tlotsoa hore e be khosi
1Samuele a nka lenaka la ole, a e tšèla hloohong ea Saule, a mo aka, a re: “Morena o u tlotsa ka ole hore u be khosi ea sechaba sa hae. U tla busa sechaba sa hae, e leng Baiseraele, 'me u se namolele ho lira tsa sona tse se pota-potileng. Hona e tla ba pontšo ea hore Morena o u tlotsitse ho ba khosi ea sechaba sa hae. 2Kajeno, ha u tloha mona ho 'na, u tla fumana banna ba babeli pel'a lebitla la Ragele, naheng ea Benjamine, mane Selesa. Banna bao ba tla re ho uena: ‘Litonki tseo u neng u il'o li batla li fumanoe. Ntat'ao ha a sa tsoteletse litonki tseo, o se a tšoenyehile ka baka la hao, 'me o re: Mora oa ka ke tla mo fumana joang?’
3“Ha u tloha moo u tsoele pele, 'me u tla fihla sefateng sa eike se Tabore. Teng u tla kopana le banna ba bararo, ba nyolohelang Bethele, ho ea khumamela Molimo. E mong o tla be a nkile lipotsanyane tse tharo, e mong a nkile linkhoa tse tharo, e mong a nkile lekuka la veine. 4Ba tla u lumelisa, ba u nee linkhoa tse peli, tseo u tla li nka matsohong a bona.
5“Kamora' moo u tla fihla leralleng la Molimo, moo ho nang le lebōtho la Bafilesita. Etlare ha u se u fihlile motseng u kopane le sehlopha sa baporofeta ba theohang aletareng e leralleng, ba eteletsoe pele ke likatara, le meropa, le makolilo, le liharepa, 'me ba tla be ba ntse ba porofeta. 6Moea oa Morena o tla theohela holim'a hao ka matla, 'me le uena u tla porofeta joaloka bona, u fetohe motho e mong osele. 7Ha lipontšo tsena li phethahala, u etse seo u bonang se lokela, hobane Morena o na le uena.
8“U tla theohela Gilegale u nketeletse pele; le 'na ke tla theohela ho uena, ho tla etsa linyehelo tsa secheso, le ho etsa mahlabelo a linyehelo tsa teboho. U tla nkemela ka matsatsi a supileng, ho fihlela ke fihla ho uena, 'me ke tla u tsebisa seo u tla se etsa.”
Lipontšo lia phethahatsoa
9Ha Saule a furalla Samuele, a tsamaea, Molimo a nea Saule botho bo bocha. Ka lona letsatsi leo, lipontšo tseo tsohle tsa phethahala. 10Ha ba fihla leralleng, ba bona sehlopha sa baporofeta se e-tla ho eena. Moea oa Morena oa theohela holim'a Saule ka matla, 'me le eena a porofeta a le har'a bona. 11Ha bohle ba mo tsebileng pele ba 'mona a porofeta le baporofeta, batho ba botsana, ba re: “Ke eng ee, e etsahalang ho mora oa Kishe? Na Saule le eena ke moporofeta?”
12Monna e mong oa hona moo a re: “Ntat'a bona ke mang?” Ka baka leo, ha e-ba le maele a reng: “Na Saule le eena ke moporofeta?” 13Ha Saule a qetile ho porofeta, a ea aletareng e leralleng.
14Rangoan'a Saule a re ho eena le ho mohlanka oa hae: “Le ne le ile kae?”
Saule a re ho eena: “Re ne re il'o batla litonki, 'me ha re bona re sa li fumane ra ea ho Samuele.”
15Rangoan'a Saule a re: “Kea u kōpa: Ak'u mpolelle seo Samuele a ileng a se bua ho uena.”
16Saule a re ho rangoan'ae: “O ile a re bolella hantle hore litonki li fumanoe.” Empa ha aa ka a 'molella letho ka taba ea 'muso, eo Samuele a e buileng ho eena.
Saule o khethoa ho ba khosi
17Samuele a memela Morena sechaba, mane Misepa. 18A re ho bana ba Iseraele: “Morena Molimo oa Iseraele, o bua tjena: ‘Ke nyolotse Baiseraele Egepeta, ka ba namolela matsohong a Baegepeta, le matsohong a mebuso eohle e neng e le hateletse.’ 19Empa kajeno lōna le furaletse Molimo oa lōna, e leng eena ea ileng a le pholosa bomalimabeng bohle ba lōna, le matšoenyehong 'ohle a lōna. Le itse ho eena: ‘Che, re khethele khosi.’ Ka baka leo, itlhahiseng kapele ho Morena, ka merabe eohle ea lōna, le ka malapa abo lōna.”
20Eaba Samuele o atametsa merabe eohle ea Iseraele, 'me ha khethoa morabe oa Benjamine. 21Morabe oa Benjamine oa atametsoa ka malapa a oona, 'me ha khethoa lelapa la morabe oa Matiri. Joale ha atametsoa banna ba lelapa la Matiri ka bomong, 'me ha khethoa Saule, mora oa Kishe. Ba 'matla, empa ba se ke ba mo fumana. 22Ka baka leo, ba boela ba botsa Morena: “Na ho na le monna e mong ea tlileng moo?”
Morena a araba, a re: “Ke enoa, o ipatile har'a thōtō.”
23Ba matha, ba mo lata hona moo. A ema har'a sechaba, a le molelele, a phahametse batho bohle ka mahetla. 24Samuele a re ho sechaba sohle: “Na le 'mone ea khethiloeng ke Morena? Le hore ha ho le ea mong ea tšoanang le eena har'a sechaba sohle?”
Sechaba sohle sa hōoeletsa, sa re: “Khosi e ke e re phelele!”
25Samuele a hlalosetsa sechaba litokelo tsa khosi, le mesebetsi ea eona, 'me tsena tsohle a li ngola bukeng, a e bea kapele ho Morena. Samuele a qhala sechaba sohle, motho e mong le e mong a ikela ha hae.
26Saule le eena a ea ha hae, Gibea, 'me bahlabani bao Morena a neng a ba kentse moeeng ba tsamaea le eena. 27Empa banna ba bang ba khopo ba re: “Motho eo o tla re namolela joang?” Ba mo nyelisa, 'me ba se ke ba mo nea limpho. Empa Saule a ikhaohanela.
