1 PETROSE 1

₁'Na Petrose, moapostola oa Jesu Kreste, ke lumelisa bakhethoa, bao e leng bajaki ba qhalakaneng linaheng tsa Pontose, Galatia, Kapadokia, Asia le Bithinia, ₂ba khethiloeng ka morero oa Molimo Ntate, ba halalelitsoeng ke Moea o Halalelang, e le hore ba tle ba mamele Jesu Kreste, 'me ba fokoe ka mali a hae, ke re: Le ke le ekeletsoe mohau le khotso.

₃Ho bokoe Molimo, Ntat'a Morena oa rōna Jesu Kreste. Ka baka la boholo ba mohau oa hae, o re tsoetse bocha ka tsōho ea Jesu Kreste bafung, hore re tle re be le tšepo e phelang, ₄le lefa le se nang ho bola, leha e le ho silafala kapa ho pona. Ke lona lefa leo le le bōlōketsoeng leholimong. ₅Ka baka la tumelo ea lōna, matla a Molimo a le sireletsa ho le isa pholohong, e seng e loketse ho bonahatsoa nakong ea bofelo. ₆Le nyakaletse ke hona, leha hajoale le sa tšoanetse ho hlomoha ka nakoana, ka baka la ho lekoa ka mekhoa e mengata. ₇Kahoo tumelo ea lōna e tla bonahala e le ea sebele, ea bohlokoahali ho feta khauta e senyehang, leha le eona e lekoa ka mollo. Tumelo eo e tla le fumantša thoriso, tlōtla le hlompho, mohla Jesu Kreste a bonahatsoang, ₈eena eo le mo ratang le hoja le sa ka la 'mona, 'me le hona joale le lumelang ho eena le hoja le e-s'o 'mone. Joale le nyakaletse ka thabo e ke keng ea boleloa, e tlōtlehang, ₉hobane le tla amohela moputso oa tumelo ea lōna, e leng pholoho ea lōna.

₁₀Baporofeta, ba ileng ba porofeta tsa mohau oo le tla o neoa, ba ile ba batla tsa pholoho eo, ba li fatisisa. ₁₁Ba ile ba fuputsa hore na Moea oa Kreste, o neng o le ka ho bona, o supa nako efe, e joang, ha o paka e sa le pele tsa ho hlōkōfatsoa ha Kreste le tsa tlōtla e tlang ho ho latela. ₁₂Ba ile ba senoleloa hore ba ne ba sa itšebeletse, empa ba ne ba sebeletsa lōna ka molaetsa oo le o tsebisoang joale ke ba le bolellang oona, ka Moea o Halalelang, o rōmiloeng o e-tsoa leholimong. Ke molaetsa oo le mangeloi a lakatsang ho o utloisisa.

₁₃Ka baka leo, itokisetseng ho sebeletsa, ka ho ba chatsi likelellong, le be le boitšoaro, le ntse le tšepile ka ho tlala ho neoa mohau, mohla Jesu Kreste a bonahatsoang. ₁₄Le le bana ba mamelang, le se ke la latela litakatso tsa lōna tsa khale, ha le ne le sa hloka tsebo. ₁₅Joalokaha ea le bitsitseng a halalela, le lōna le halalele metsamaong eohle ea lōna, ₁₆hobane ho ngotsoe, ho thoe: “Le halalele, hobane le 'na kea halalela.”

₁₇Haeba le rapela Molimo e le Ntat'a lōna, eena ea ahlōlang motho ka mong ka ho ea ka mesebetsi ea hae, a sa ee ka tšobotsi, eka khona le phele ka tšabo nakong ea bojaki ba lōna mona lefatšeng. ₁₈Tsebang hore hase ka lintho tse senyehang, tse kang khauta le silefera, le ileng la lopolloa metsamaong ea lōna ea bosaoana, eo le e nkileng ho bo-ntat'a lōna, ₁₉empa ke ka mali a bohlokoa, a kang a konyana e se nang sekoli, leha e le letheba, e leng a Kreste. ₂₀O ne a khethoe ke Molimo lefatše le e-s'o theoe, feela a bonahatsoa linakong tsena tsa bofelo ka baka la lōna. ₂₁Ke ka eena le lumelang ho Molimo ea mo tsositseng bafung, a ba a mo nea tlōtla, e le hore tumelo le tšepo ea lōna li tle li be ho Molimo.

₂₂Kaha le hloekisitse meea ea lōna ka ho mamela 'nete, 'me le rata bana babo lōna ka lerato le se nang boikaketsi, ratanang ka lipelo tsohle, ka lerato le mofuthu. ₂₃Le tsoetsoe bocha, e seng ka peō e bolang, empa ka e sa boleng, e leng lentsoe la Molimo le phelang, le sa feleng, ₂₄hobane: