Ho lokisetsoa ho hahoa ha Tempele
1Hoba Hirame, khosi ea Tire, a utloe hore Solomone o tlotselitsoe ho ba khosi sebakeng sa ntat'ae, a rōma bahlanka ba hae ho Solomone, hobane eena le Davida e ne le metsoalle ka nako eohle ea ho phela ha Davida.
2Solomone a rōmela molaetsa ho Hirame, a re: 3“Ua tseba hore Davida, ntate, o ile a sitoa ho hahela Morena Molimo oa hae ntlo, ka baka la lira tse neng li mo futuhela kamahohle, ho fihlela ha Morena a entse hore a hlōle lira tseo. 4Joale Morena Molimo oa ka o mphile khotso kahohle; ha ho sera, ha ho tsietsi. 5Ka baka leo, ke hopola ho hahela Morena Molimo oa ka, ntlo, joalokaha Morena a ile a bua ho Davida, ntate, a re: ‘Mora oa hao, eo ke tla 'mea teroneng ea hao ho u hlahlama, ke eena ea tla nkhahela ntlo.’
6“Ka hona ak'u laele hore ke rōmeloe lifate tsa likedare tsa Lebanone. Bahlanka ba ka ba tla sebetsa le ba hao. Ke tla lefa bahlanka ba hao kamoo uena u tla bolela kateng. Ua tseba hore har'a batho ba ka ha ho le ea mong ea ka remang lifate hantle joaloka batho ba Sidone.”
7Ha Hirame a utloa mantsoe ana a Solomone, a thaba haholo, a ba a re: “Kajeno ho bokoe Morena, eena ea neileng Davida mora ea bohlale, hore a buse sechabahali sena.”
8Eaba Hirame o rōmela molaetsa ho Solomone, o re: “Ke utloile molaetsa oa hao; ke tla etsa kamoo u lakatsang kateng, ke u rōmele lifate tsa likedare le tsa molutu. 9Bahlanka ba ka ba tla li theola Lebanone, ba li ise leoatle, 'me 'na ke tla li tlamahanya, ke li akhele leoatleng, li sike le lebōpo li phaphametse, li be li e'o fihla moo u tla re li isoe teng. Ha li fihla teng li tla tlamolloa, ebe ua li thōtha. Uena ha u ka fepa lelapa la ka, ke tla khotsofala.”
10Eaba Hirame o nea Solomone lifate tsa likedare le tsa molutu, ho ea kamoo Solomone a neng a laetse kateng. 11Ka selemo se seng le se seng Solomone a nea Hirame likilo tse ka bang limilione tse peli tsa koro, le lilethara tse ka bang likete tse makholo a mane tsa ole e hloekileng ea mohloaare, ho fepa lelapa la hae. 12Morena a nea Solomone bohlale, joalokaha a ne a mo tšepisitse. Ha e-ba le khotso pakeng tsa Hirame le Solomone, ba ba ba etsa selekane.
13Khosi Solomone a bōkella makhoba a likete tse mashome a mararo naheng eohle ea Iseraele. 14Ka khoeli a rōmela makhoba a likete tse leshome Lebanone. A ne a ee a qete khoeli Lebanone, tse peli a li qete a le hae. Adonirame e ne e le eena mookameli oa makhoba ana. 15Solomone o ne a e-na le makhoba a likete tse mashome a supileng, a neng a thōtha thepa, le a likete tse mashome a robeli a neng a betlela majoe koaring. 16Ho ne ho bile ho e-na le balebeli ba likete tse tharo le makholo a moraro, ba neng ba beiloe ke Solomone ho hlokomela mesebetsi e fapakaneng, 'me ba okametse basebetsi. 17Khosi ea laela hore ho chekoe majoe a maholo, a bohlokoa, a betloe ka makhethe, ho tla etsa mothèo oa Tempele. 18Lihahi tsa Solomone, le tsa Hirame, 'moho le Bagebale, tsa thua majoe, tsa betla mapolanka le majoe a ho haha Tempele.
