Lipolelo tsa Davida tsa ho qetela
1Ha nako ea ho shoa ha Davida e se e atametse, a laea Solomone, mora oa hae, a re: 2“Ke se ke ikela boea-batho. E-ba sebete, u tšoare senna. 3Bōlōka litaelo tsa Morena Molimo oa hao; u tsamaee ka litsela tsa hae, u bōlōke litaelo tsa hae, le melao ea hae, le likahlōlo tsa hae, le litemoso tsa hae, joalokaha ho ngotsoe Molaong oa Moshe, e le hore u tle u atlehe linthong tsohle tseo u li etsang, le hohle moo u eang teng. 4Morena o tla phethahatsa polelo eo a neng a e bue ho 'na, ha a re: ‘Haeba bara ba hao ba ka ba le boitšoaro, metsamao ea bona ea nkhahla, 'me ba tšepahala ka lipelo tsa bona tsohle, le ka moea oa bona oohle, terone ea Iseraele e ke ke ea hloka mohlahlami.’
5“Hape u tseba seo Joabe, mora oa Seruea, a neng a nketse sona; e leng seo a neng a se etse ho balaoli ba babeli ba mabōtho a Iseraele, bo-Abinere, mora oa Nere, le Amasa, mora oa Jetere. O ne a ba bolaee, a tšolla mali nakong ea khotso, joalokaha eka ke ntoeng. Ka hona mali ao a qaphaletsa leqhama le lethekeng la hae, le meqathatso e maotong a hae. 6Ka baka leo, sebetsa ka bohlale ba hao, hore moriri oa hae o moputsoa o se ke oa theohela Qalong ea Bafu ka khotso.
7“Ha e le bana ba Barasilai oa Mogileade, bona u ba etse hantle, e be ba bang ba ba jang le uena, hobane ba ile ba nkhauhela ha ke ne ke baleha ngoan'eno Abosalome.
8“U se ke ua lebala Shimei, mora oa Gera oa Mobenjamine, ea tsoang Bahurime, ea neng a nkhahlanyetse Jorodane. O ne a nkhahlanyetse ka mahlapa a tšabehang, mohla ke neng ke e-ea Mahanaime. Ke ne ke mo hlapanyetse ka lebitso la Morena, ka re: ‘Nke ke ka u bolaea.’ 9Empa u se ke ua ba ua mo tšoarela. Kaha u motho ea bohlale, u s'u tla bona hore na u mo etsa joang, hore moriri oa hae o moputsoa o theohele Qalong ea Bafu o le mali.”
Lefu la Davida
10Davida a shoa, 'me a epeloa Motseng oa Davida. 11Nako eo Davida a ileng a busa Iseraele ka eona e bile lilemo tse supileng a le Heborone, le tse mashome a mararo a metso e meraro a le Jerusalema, kaofela ea e-ba lilemo tse mashome a mane. 12Solomone a lula teroneng ea ntat'ae Davida, 'me 'muso oa hae oa tsitsa.
Adoniea o kōpa ho neoa Abishake
13Adoniea, mora oa Hagite, a ea ho Batesheba, 'm'a Solomone. Batesheba a re ho eena: “Na u tla ka khotso?”
Adoniea a araba, a re: “Ke tla ka khotso.” 14Adoniea a boela a re: “Ke na le puonyana le uena.”
Batesheba a re: “Bua!”
15Adoniea a re: “Ua tseba hore 'muso e ne e le oa ka, 'me Baiseraele bohle ba ne ba lebeletse hore ke buse. Empa 'muso o ile oa mphonyoha, Morena a o nea mor'eso. 16Joale ke kōpa ntho e le 'ngoe: U se ke ua mpa ua ntšoetsa.”
Batesheba a re ho eena: “Bua!”
17Adoniea a re: “Kea u rapela: Ak'u mpuele le khosi Solomone, hobane ha a na ho u soetsa; u re a ke a mphe Abishake oa Moshuneme, e be mosali oa ka.”
18Batesheba a re: “Ho lokile, ke tla u buela le khosi.”
19Eaba Batesheba o ea ho khosi Solomone, ho ea buella Adoniea. Khosi ea ema ho mo amohela, ea mo obamela, ea lula teroneng ea eona, 'm'a khosi a fuoa setulo, 'me a lula ka letsohong le letona ho khosi.
20Batesheba a re: “Ke na le kōponyana e fokolang. Kea u rapela: U se ke ua mpa ua ntšoetsa.”
Khosi ea re ho eena: “Kōpa, 'mè, ha ke na ho u soetsa.”
21Batesheba a re: “Ke kōpa hore Abishake oa Moshuneme a neoe Adoniea, ngoan'eno, e be mosali oa hae.”
22Khosi Solomone a araba, a re ho 'm'ae: “Ke ka lebaka la'ng u kōpang hore Adoniea a neoe Abishake oa Moshuneme? Hoja ua hla ua mo kōpela le oona 'muso, hobane ke moholoane oa ka; e bile le moprista Abiatare, le Joabe, mora oa Seruea, ke ba lehlakore la hae.”
23Khosi Solomone a hlapanya ka lebitso la Morena, a re: “Molimo a nketse tjena le tjena, esitana le ho feta, haeba nke ke ka bolaea Adoniea ka baka la kōpo ena. 24Ka Morena ea phelang, ea mpeileng, a ba a ntsitsisa teroneng ea ntate, ea Davida, ea ntheetseng lelapa, joalokaha a ne a tšepise, hona kajeno lena Adoniea o tla bolaoa.”
Lefu la Adoniea
25Ka taelo ea khosi Solomone, Benaea, mora oa Jehoeada, a hlaba Adoniea, a 'molaea.
Pheletso ea Abiatare le Joabe
26Khosi ea re ho moprista Abiatare: “E-ea Anatote ha hao. U lokela ho bolaoa, empa kajeno u ke ke ua bolaoa, hobane u ne u jara areka ea Morena Molimo, u etella pele ntate, Davida, 'me u jarisana litsietsi tsohle le eena.” 27Eaba Solomone o tlosa Abiatare setulong sa boprista ba Morena, e le hore ho tle ho phethahale polelo ea Morena, e neng e porofetoe Shilo, mabapa le ntlo ea Eli.
28Ha litaba tsena li fihla ho Joabe, ea neng a le ka lehlakoreng la Adoniea, e seng ka ho la Abosalome, a balehela ka Tenteng ea Morena, a fihla a itšoarella ka manaka a aletare. 29Khosi Solomone a tsebisoa, ha thoe: “Joabe o balehetse ka Tenteng ea Morena, ke eane o eme haufi le aletare.”
Eaba Solomone o rōma Benaea, mora oa Jehoeada, o re: “Tsamaea, u e'o 'molaea!”
30Benaea a kena ka Tenteng ea Morena, a fihla a re ho Joabe: “Khosi e re: ‘Tsoa!’ ”
Joabe a re: “Che! Ke tla shoela hona mona!”
Benaea a khutlisetsa karabo ho khosi, a re: “Joabe o buile tjena, 'me o nkarabile tjena.”
31Khosi ea re ho eena: “Etsa joalokaha a u boleletse. U 'molaee, u be u mo epele, Ka tsela ena, 'na le ba lelapa leso, u tla be u re ntšitse molatong oa mali ao Joabe a a tšolotseng ntle ho lebaka. 32Morena o tla be a phetetsa mali ao ka hlooho ea hae, hobane o ne a bolaee banna ba babeli, ba lokileng, ba molemo ho mo feta. O ne a ba bolaee ka sabole, ntate, Davida, a sa tsebe letho. Banna bao ke Abinere, mora oa Nere, molaoli oa mabotho a Iseraele, le Amasa, mora oa Jetere, molaoli oa mabōtho a Juda. 33Mali a bona a tla phetetsoa ka hlooho ea Joabe, le ka litlōhōlō tsa hae kamehla eohle. Empa Morena o tla sitsa Davida, le litlōhōlō tsa hae, le lelapa la hae, le terone ea hae, ka khotso ea kamehla.”
34Eaba Benaea, mora oa Jehoeada, oa ea, o fihla a phehletsa Joabe, a 'molaea. Joabe a epeloa hahabo, pel'a lehoatata. 35Eaba khosi e bea Benaea, mora oa Jehoeada, hore e be molaoli oa mabōtho bakeng sa Joabe; ea bea le moprista Sadoke bakeng sa Abiatare.
Shimei o laeloa ho lula Jerusalema
36Khosi ea rōma leqōsa ho ea bitsa Shimei, 'me ea re ho eena: “Ikhahele ntlo Jerusalema, u lule teng, 'me u se ke ua tloha, ua ea kae kapa kae. 37Mohla u ka tlohang, ua tšela molatsoana oa Kiderone, u tsebe hantle hore u tla shoa, 'me u tla be u ipolaile.”
38Shimei a re ho khosi: “U bua hantle; mohlanka oa hao o tla phethisa joalokaha mong'a ka, khosi ea ka, a laetse.” Shimei a lula Jerusalema nako e telele.
Shimei o tlōla taelo ea khosi
39Kamora' lilemo tse tharo, bahlanka ba babeli ba Shimei ba thobela ho Akishe, mora oa Maaka, khosi ea Gate. Eaba ho bolelloa Shimei, ho thoe: “Hela! ahlanka ba hao ba thobetse Gate!” 40Shimei a ema, a qhaneha tonki ea hae, a ea Gate, ho Akishe, ho ea batla bahlanka ba hae. A tsamaea, a ea lata bahlanka ba hae Gate.
Lefu la Shimei
41Solomone a bolelloa hore Shimei o ile a tloha Jerusalema, a ea Gate, a ba a khutla. 42Khosi ea rōma leqosa ho ea bitsa Shimei, 'me ea re ho eena: “Na ha kea ka ka u hlapantša ka lebitso la Morena, ka ba ka u tiisetsa, ka re: ‘Mohla u ka tlohang Jerusalema, ua ea kae kapa kae, u tsebe hantle hore u tla shoa’? Eaba u re ho 'na: ‘U bua hantle.’ 43Joale ke ka lebaka la'ng u sa kang ua bōlōka kano eo u neng u e etse ka lebitso la Morena, le taelo eo ke u laetseng eona?”
44Khosi ea boela ea re ho Shimei: “U tseba bokhopo bohle bo ka pelong ea hao, boo u neng u bo etsetse Davida, ntate. Joale Morena o u ahlōlela bona. 45Khosi Solomone eena o tla hlohonolofatsoa, 'me Morena o tla tiisa terone ea Davida kamehla eohle.”
46Ka taelo ea khosi, Benaea, mora oa Jehoeada, a rutlōlōhela Shimei, a 'molaea.
Joale 'muso oa Solomone oa tiea.
