Elia thabeng ea Horebe
1Akabe a tsebisa Jesabele tsohle tseo Elia a li entseng, le kamoo a ileng a bolaea baporofeta ba Baale ka sabole kateng. 2Eaba Jesabele o rōma leqosa ho Elia, o re: “Haeba hosasane, ka eona nako ena, ke sa u bolaea joalokaha u bolaile baporofeta, le 'na melimo e ke e nketse joaloka bona, e be e fetise moo.”
3Ha Elia a bona taba li le mosenekeng, a ema, a baleha hore a tle a pholohe, a ba a ea fihla Beeresheba e naheng ea Juda, 'me a siea mohlanka oa hae hona moo.
4Elia eena a qeta letsatsi a ntse a tsamaea har'a lehoatata. A fihla a lula tlas'a sehlahla sa tšinabele, a ikōpela hore a shoe, a re: “Ho lekane! Oho, Morena, nka moea oa ka joale, hobane ha ke fete bo-ntate ka letho!”
5Ha a ntse a paqame, a khalehile katlas'a sehlahla sa tšinabele, lengeloi la mo sisinya, la re ho eena: “Tsoha, u je!” 6Ha a talima, a bona senkhoa se besitsoeng mollong oa mashala, pel'a hlooho ea hae ho e-na le lekuka la metsi. Eaba oa ja, oa noa, a nt'o khaleha hape.
7Lengeloi la Morena la boela la tla khetlo la bobeli, la mo sisinya, la re: “Tsoha, u je, ho seng joalo leeto lena le tla u imela.” 8Eaba oa tsoha, oa ja, oa noa. Lijo tseo tsa mo matlafatsa, 'me a tsamaea matsatsi a mashome a mane, le masiu a mashome a mane, a ba a ea fihla Horebe, thabeng ea Molimo.
9Ha a fihla teng a fumana lehaha, 'me a robala ka ho lona. Eaba lentsoe la Morena le fihla ho eena, le re: “U etsa'ng moo, Elia?”
10Elia a re: “Ke ka baka la ho boulela Morena Molimo oa mabōtho, ke leng mona. Bana ba Iseraele ba furaletse selekane sa hao, ba helelitse lialetare tsa hao, ba bolaile baporofeta ba hao ka sabole. Ke 'na ke le mong feela ea setseng, 'me joale ba batla ho mpolaea.”
11Lentsoe la re: “Tsamaea, u e'o ema holim'a thaba, kapele ho Morena.” Eaba Morena oa feta.
Moea oa sefefo se matla, o eteletseng Morena pele, oa heletsa lithaba, oa khepholaka mafika, empa Morena o ne a le sieo kahar'a moea oo. Hoba moea oo o fete, ha e-ba le tšisinyeho ea lefatše, empa Morena o ne a le sieo kahar'a tšisinyeho eo. 12Hoba tšisinyeho eo e khaotse, ha e-ba le mollo, empa Morena o ne a le sieo kahar'a mollo oo. Hoba mollo oo o fete, ha utloahala lentsoe le lesesanyane, le hoeshetsang. 13Ha Elia a utloa lentsoe leo, a ikhurumetsa ka kobo ea hae, a tsoa, a ema monyako oa lehaha.
Joale lentsoe la boela la fihla ho eena, la re: “U etsa'ng moo, Elia?”
14Eena a re: “Ke ka baka la ho chesehela ho sebeletsa Morena Molimo oa mabōtho, ke leng mona. Bana ba Iseraele ba furaletse selekane sa hao, ba helelitse lialetare tsa hao, ba bolaile baporofeta ba hao ka sabole. Ke 'na ke le mong feela ea setseng, 'me joale ba batla ho mpolaea.”
15Eaba Morena o re ho eena: “Ikhate mohlala, u ee lehoatateng la Damaseka. Ha u fihla teng, u tlotse Hasaele, e be khosi ea Arame. 16Jehu, mora oa Nimeshi, eena u mo tlotse, e be khosi ea Iseraele; le Elisha, mora oa Shafate oa Abele-Mehola, u mo tlotse, e be moporofeta bakeng sa hao. 17Ea tla phonyoha saboleng sa Hasaele, o tla bolaoa ke Jehu, 'me ea tla phonyoha saboleng ea Jehu, o tla bolaoa ke Elisha. 18Empa ke tla siea ba likete tse supileng naheng ea Iseraele, e leng bohle ba sa kang ba khumamela Baale, le bohle ba sa kang ba mo aka.”
Elisha oa bitsoa
19Eaba Elia oa tsamaea, 'me a fumana Elisha, mora oa Shafate, moo ho ntseng ho lengoa ka lipane tse leshome le metso e 'meli tsa lipholo, eena a lema ka sepane sa leshome le metso e 'meli. Elia a fihla a feta pel'a Elisha, eaba o akhela kobo ea hae holim'a hae. 20Elisha a siea lipholo, a matha kamora' Elia, a re: “Ak'u ntumelle, kea u rapela: Ke mpe ke e'o aka ntate le 'mè, 'me ke tla u latela.”
Eaba Elia o re ho eena: “Tsamaea! Na nkile ka u thibela?”
21Eaba Elisha oa khutla, o nka lipholo tsa hae tsa sepane, oa li hlaba. A besa mollo ka lijoko, a pheha nama ea lipholo, a e fa batho, eaba baa ja. Joale eena a tsamaea, a sala Elia morao, 'me a mo sebeletsa.
