Litōkelo tsa moapostola
1Na ha ke motho ea lokolohileng? Na ha ke moapostola? Ana ha kea ka ka bona Jesu, Morena oa rōna? Na lōna ha le tholoana ea mosebetsi oa ka ho Morena? 2Leha ho ba bang ke se moapostola, ho lōna bonyane ke eena, hobane ho Morena bopaki bo tiisang hore ke moapostola ke lōna ka sebele.
3Ho ba nqōsang, boikarabello ba ka ke bona: 4Na ha re na tokelo ea ho ja le ho noa? 5Na ha re na tokelo ea ho felehetsoa kahohle ke mosali oa Mokreste joaloka baapostola ba bang, le bana babo Morena, le Kefase? 6Kapa na ke rōna le Baranabase feela ba tlamehileng ho sebetsa hore re iphelise?
7Na ho kile ha e-ba teng mohlabani ea sa fumaneng moputso oa hae? Kapa molemi ea sa kheng morara oa tšimo ea hae? Kapa molisana ea sa jeng lebese la mohlape oa hae? 8Lipolelo tsena hase tsa botho feela, Molao le oona o rialo. 9Molaong oa Moshe ho ngotsoe, ho thoe: “E pōlang ha e tlangoe molomo.” Na Molimo o tsotella likhomo feela? 10Na ha hoa tōtōbala hore o bua ka rōna, ha a rialo? E, ho hlile ho ngoletsoe rōna: ea lemang, kapa ea pōlang, o tšoanetse ho lema, kapa ho pōla, ka tšepo ea hore o tla ba le kabelo lijong. 11Ha e le mona re le jaletse tsa moea, na e ka ba mohlolo ho kotula tsa lōna tsa lefatše? 12Haeba ba bang ba e-na le tokelo eo ho lōna, na tokelo ea rōna e ke ke ea e-ba kholo ho feta ea bona?
Leha ho le joalo, ha rea ka ra sebelisa tokelo eo, empa re iphapanyelitse tsohle, e le hore re se ke ra khina molaetsa o molemo oa Kreste. 13Na ha le tsebe hore ba sebetsang ka Tempeleng ba ja tseo e leng tsa Tempele, le hore ba nyehelang mahlabelo aletareng ba abeloa tsa mahlabelo ao? 14Ka mokhoa o joalo, Morena le eena o laetse hore ba phatlalatsang molaetsa o molemo, ba iphelise ka hona.
15Empa 'na, ha ke e-s'o sebelise le e 'ngoe ea litokelo tsena, ebile ha ke ngole tjena hore le 'na ke li fumane. Nka mpa ka shoa, ho e-na le hore motho a nkamohe lebaka lena la ka la ho ithorisa. 16Ha ke na tokelo ea ho ithorisa hobane feela ke bolela molaetsa o molemo; etsoe ke tlameha ho etsa joalo. Nka ba malimabe haeba ke sa phatlalatse molaetsa o molemo. 17Hoja ke etsa mosebetsi ona ka boithaopo, ke ne ke tla lebella moputso, empa kaha e se ka boithaopo, ke phetha feela mosebetsi oo ke o abetsoeng. 18Joale moputso oa ka ke ofe? Ke hore ke bolele molaetsa o molemo ke sa lefuoe, ka ho se sebelise tokelo eo ke nang le eona ka baka la mosebetsi oa ho phatlalatsa molaetsa oo.
19Ke motho ea lokolohileng, ea seng taolong ea mang kapa mang, empa ke ikentse lekhoba la bohle, hore ke tle ke hape ba bangata. 20Ho Bajuda ke bile joaloka Mojuda, hore ke tle ke hape Bajuda. Leha 'na ke se tlas'a Molao oa Moshe, ho ba leng tlas'a Molao oo ke bile joaloka ea tlas'a Molao, hore ke tle ke hape ba tlas'a oona. 21Hape, ho balichaba ba seng tlas'a Molao oa Moshe, ke bile joaloka ea seng tlas'a Molao oo, hore ke tle ke hape ba seng tlas'a oona. Hase ho re ha ke tlas'a Molao oa Molimo, ke mpa ke le taolong ea molao oa Kreste. 22Ho ba fokolang ke bile joaloka ea fokolang, hore ke tle ke hape ba fokolang. Ke bile tsohle ho bohle, hore bonyane ke tle ke pholose ba bang. 23Tsena tsohle ke li etsa ka baka la molaetsa o molemo, hore ke tle ke be le kabelo melemong ea oona.
24Ha ke re lea tseba hore ba kenang lipapaling tsa lebelo ba matha kaofela, empa moputso o fumanoa ke a le mong feela? Le lōna mathang, le tle le iphumanele moputso. 25Bohle ba kenang tlhōlisanong ba thapisa 'mele ea bona. Empa bona ba etsa joalo hore ba tle ba fumane mofapahlooho o senyehang; athe rōna re etsa joalo hore re tle re fumane o sa senyeheng. 26Ha e le 'na, ha ke mathe feela joaloka hoja ha ke na sepheo; ha ke loane ka litebele joaloka hoja ke fuphula moea feela. 27Empa ke hlōkōfatsa 'mele oa ka, 'me kea o thapisa, esere mohlomong, ha ke se ke phatlallelitse ba bang molaetsa o molemo, eaba 'na kea lahloa.
