Ho arajoa lipotso tse amanang le lenyalo
1Joale ke kena litabeng tseo le ileng la 'ngolla ka tsona. Ke re: Ho molemo hore monna a se ke a ama mosali. 2Empa ka baka la ho tšaba bohlola, monna ka mong a be le mosali eo e leng oa hae, le mosali ka mong a be le monna eo e leng oa hae. 3Monna a phethe tšoanelo ea hae ho mosali oa hae, 'me le mosali a etse joalo ho monna oa hae. 4Mosali ha a na matla holim'a 'mele oa hae; ea nang le matla holim'a oona ke monna oa hae. Ka mokhoa o joalo, le monna ha a na matla holim'a 'mele oa hae; ea nang le matla holim'a oona ke mosali oa hae. 5Le se ke la timana, haese ka tumellano, ka nakoana, e le hore le iphe nako ea ho rapela. Kamora' moo le boele le kopane, esere Satane a le leka ka baka la ho hloka boitšoaro ha lōna. 6Ke bua tjena ka ho le hauhela e seng ka ho le laela. 7Ke ne nka rata ha batho bohle ba e-ba joaloka 'na, empa motho e mong le e mong o na le nèo ea hae e tsoang ho Molimo, e mong ka mokhoa ona, e mong ka mokhoa oane.
8Ho masoha le basali ba bahlolohali, ke re: Ho molemo ha ba ka itulela joaloka 'na. 9Empa haeba ba sitoa ho itšoara, ba mpe ba nyale, hobane ho molemo ho nyala ho e-na le ho chesoa ke takatso.
10Ha e le ba seng ba nyalane, ke ba nea taelo ena. Ha e tsoe ho 'na, empa e tsoa ho Morena. Ke re: Mosali a se ke a hlala monna oa hae. 11Haeba a etsa joalo a lule a sa nyaloe, kapa a khutlele ho monna oa hae. Monna le eena a se ke a hlala mosali oa hae.
12Ha e le ho ba bang, 'na, e seng Morena, ke re: Ha molumeli a e-na le mosali eo e seng molumeli, a se ke a mo hlala, haeba mosali a khotsofalla ho 'na a phela le eena. 13Le mosali ha a e-na le monna eo e seng molumeli, 'me a khotsofalla ho 'na a phela le eena, a se ke a hlala monna eo. 14Monna eo e seng molumeli o halaletsoa ka mosali oa hae, le mosali eo e seng molumeli o halaletsoa ka monna oa hae. Hoja ha ho joalo bana ba bona ba ka be ba sa hloeka, athe joale baa halalela.
15Haeba eo e seng molumeli a rata ho hlala mohats'a hae oa molumeli, a mo hlale. Molumeli oa monna kapa oa mosali ha a ea tlangoa ke letho tabeng tse joalo. Molimo o le bitselitse hore le phelisane ka khotso. 16Uena mosali, u ka tseba joang haeba u tla pholosa monna oa hao na? Le uena monna, u ka tseba joang haeba u tla pholosa mosali oa hao na?
Bophelo boo Morena a bo abetseng batho
17E mong le e mong a phele ho ea kamoo Morena a mo abetseng kateng, kamoo a neng a le kateng ha Molimo a 'mitsa. Sena ke seo ke se laelang likereke tsohle. 18Ha motho a bitsoa a se a bōlōtse, a se ke a iketsa leqai; ha a bitsoa e le leqai, a se ke a bōlla. 19Ho bōlla kapa ho se bōlle hase letho, empa hoo e leng taba ke ho bōlōka melao ea Molimo. 20E mong le e mong a 'ne a be kamoo a neng a le kateng mohla a neng a bitsoa. 21Ha u bitsitsoe u le lekhoba, u se ke ua itšoenya. Empa leha u ka lokoloha bokhobeng, thabela tokoloho eo. 22Etsoe ea bitsitsoeng ke Morena e le lekhoba, ho Morena o lokolohile. Ka mokhoa o joalo, ea bitsitsoeng ke Kreste a lokolohile, ke lekhoba la Kreste. 23Le rekiloe ka theko e boima, ka hona se iketseng makhoba a batho. 24Bana beso, e mong le e mong a 'ne a phele pel'a Molimo ho ea kamoo a neng a le kateng mohla a bitsoang.
Masoha le bahlolohali
25Tabeng ea baroetsana, ha ke na taelo ea Morena, ke mpa ke fana ka keletso, ke le ea tšepahalang ka mohau oa Morena. 26Ka baka la litsietsi tsa matsatsi ana, ke lekanya hore ho ka ba molemo ha motho a itulela a le joalo. 27Ha u tlamahantsoe le mosali ka lenyalo, u se ke ua itokolla. Ha u sa tlamahanngoa le mosali ka lenyalo, u se ke ua ipatlela mosali. 28Haeba u nyala, ha u etse sebe; le moroetsana ha a nyaloa, ha a etse sebe. Empa ba nyalanang ba tla ba le matšoenyeho bophelong bona, 'me lōna kea le qenehela.
29Bana beso, seo ke se bolelang ke sena: Nako e se e khutsufetse. Ho tloha joale, ba nyetseng e ke ha baa nyala; 30ba llang e ke ha ba lle; ba thabileng e ke ha baa thaba; ba rekang e ke ha ba na letho; 31ba phelang ka tsa lefatše lena e ke ha ba li phelele, hobane mekhoa ea lefatše lena ea feta.
32Ha ke lakatse ha le ka tšoenyeha. Ea sa nyalang o hlokomela tsa Morena, hore na a ka khahlisa Morena joang. 33Empa ea nyetseng o hlokomela tsa lefatše, hore na a ka khahlisa mosali oa hae joang, 34'me kahoo o pelo li peli. Mosali ea sa nyaloang, kapa moroetsana, o hlokomela tsa Morena, hore a tle a halalele 'meleng le moeeng. Empa mosali ea nyetsoeng o hlokomela tsa lefatše, hore na a ka khahlisa monna oa hae joang. 35Ke le bolella tsena ho le thusa, e seng ho le khina, empa e le hore le batle ho lokelang, le ikakhele mosebetsing oa Molimo ka setōtsoana.
36Ha motho a lekanya hore e ka ba ntho e lihlong, ha morali oa hae e le lefetoa, 'me a hopola hore eka khona taba eo e lokisoe, a etse kamoo a ratang kateng. Ha a etse sebe ha a ka mo nyalisa. 37Empa haeba motho a sa tlangoe ke letho e le ka boikhethelo ba hae, a tiile morerong oa hae, 'me haeba a se a qetile ka pelong ea hae hore morali oa hae e 'ne e 'ne e be moroetsana, o tla be a etsa hantle. 38Kahoo ea nyalisang morali oa hae o etsa hantle, empa ea sa mo nyaliseng o etsa hantle ka ho fetisisa.
39Mosali ea nyetsoeng o tlamahantsoe le monna oa hae, ha monna a sa phela. Ha monna a se a shoele, mosali o lokolohile, a ka nyalana le eo a mo ratang, empa e be lenyalo la Sekreste. 40Feela, ho ea ka 'na, a ka ba lehlohonolo haholo ha a ka itulela a sa nyaloa. Kea kholoa hore le 'na ke na le Moea oa Molimo.
