Ho qōsana ha balumeli makhotleng a bahedene
1Ha e mong oa lōna a e-na le nyeoe le e mong, a ka mo isa joang makhotleng a bahedene, e seng kapele ho balumeli? 2Kapa ha le tsebe hore balumeli ke bona ba tla ahlōla lefatše? Haeba lefatše le tla ahlōloa ke lōna, na ha lea lokela ho ahlōla litaba tse fokolang? 3Na ha le tsebe hore mangeloi re tla a ahlōla? Joale re ka sitoa ke'ng ho ahlōla tsa bophelo boo? 4Ka baka leo, ha le e-na le linyeoe tse amanang le bophelo boo, na le tla re li ahlōloe ke bao e seng letho ka kerekeng na? 5Ke rialo hore le hlajoe ke lihlong! Na ha ho le ea mong ea bohlale har'a lōna, ea ka tsebang ho ahlōla litsekisanong tsa balumeli? 6Empa motho o qōsa ngoan'abo, le hona kapele ho bao e seng balumeli.
7Ka baka lena, le hlōtsoe ho hang, hobane lea qōsana. Ke'ng ha le sa itlohelle ho etsoa hampe? Ke'ng ha le sa itlohelle ho qhekanyetsoa? 8Empa ke lōna le etsang hampe, le qhekanyetsanang le bana babo lōna.
9Kapa na ha le tsebe hore ba khopo ba ke ke ba e-ja lefa la 'Muso oa Molimo? Le se ke la ithetsa: lihlola, le basebeletsi ba melimo ea bohata, le lifebe, le ba janang maotoana, 10le masholu, le litlofa, le matahoa, le ba litlhapa, le linokoane, ba ke ke ba e-ja lefa la 'Muso oa Molimo. 11Ba bang ba lōna le ne le le joalo, empa le ile la hlatsuoa, la halaletsoa, la lokafatsoa ka lebitso la Morena Jesu Kreste, le ka Moea oa Molimo oa rōna.
Tlotlisang Molimo ka 'mele ea lōna
12E mong o re: “Ke lumeletsoe ka lintho tsohle,” empa hase ho re tsohle li na le molemo. E, ke lumeletsoe ka lintho tsohle, empa ha nka ke ka laoloa le ke e le 'ngoe ea tsona. 13E mong hape o re: “Lijo li etselitsoe mpa, le mpa e etselitsoe lijo.” E, feela Molimo o tla li felisa bobeli ba tsona. Empa 'mele hase oa bohlola, ke oa Morena, 'me Morena ke mong'a oona. 14Molimo o tsositse Morena bafung, 'me le rōna o tla re tsosa ka matla a hae. 15Na ha le tsebe hore 'mele ea lōna ke litho tsa Kreste? Na nka nka litho tsa Kreste, ka li etsa litho tsa seotsoa? Le khale! 16Kapa na ha le tsebe hore ea kopanelang likobo le seotsoa, o fetoha ntho e le 'ngoe le sona, hobane Mangolo a re: “Ba babeli ba tla fetoha ntho e le 'ngoe?” 17Empa ea ikopanyang le Morena ke ntho e le 'ngoe le eena ka moea.
18Furallang bohlola! Libe tse ling tsohle tseo motho a li etsang ha li ame 'mele oa hae, empa ea etsang bohlola o siteloa 'mele oa hae. 19Kapa na ha le tsebe hore 'mele ea lōna ke tempele ea Moea o Halalelang o ka ho lōna, oo le o filoeng ke Molimo? Le hore le ba e mong? 20Le rekiloe ka theko e phahameng. Ka baka leo, tlotlisang Molimo ka 'mele ea lōna.
