1 BAKORINTHE 2

₁Bana beso, 'na ha ke e-tla ho lōna, ho le phatlalletsa sephiri sa Molimo, ke ne ke sa tlisa bokhelekehali kapa bohlale bo boholo. ₂Ha ke ne ke e-na le lōna, ke ne ke ikemiselitse ho lebala tsohle, haese tsa Jesu Kreste feela, eena ea thakhisitsoeng. ₃Ke fihlile ho lōna ke fokola, ke tšaba, 'me ke thōthōmela haholo. ₄Puo ea ka le molaetsa oa ka ha lia ka tsa boleloa ka mantsoe a hapang, a bohlale ba motho, empa e ne e le ka matla a kholisang a Moea o Halalelang. ₅E ne e le hore tumelo ea lōna e se ke ea thèoa holim'a bohlale ba motho, e mpe e thèoe holim'a matla a Molimo.

₆Leha ho le joalo, re bua tsa bohlale har'a ba hōlileng tumelong, empa hase tsa bohlale ba lefatše lena, kapa ba babusi ba lefatše lena ba shoang. ₇Re bua ka tsa bohlale ba Molimo, boo e leng sephiri, bo patehileng, boo Molimo a bo hlotseng le lefatše le e-s'o be teng, hore e be tlōtla ea rōna. ₈Ke boo ho seng le ea mong oa babusi ba lefatše lena ea kileng a bo tseba hobane, hojane ba ne ba bo tsebile, ba ka be ba sa ka ba thakhisa Morena oa tlōtla. ₉Empa joalokaha ho ngotsoe,

₁₀Rōna Molimo o re senoletse tsona ka Moea oa hae, hobane Moea o Halalelang o fuputsa tsohle, esita le tse tebileng tsa Molimo.

₁₁Ana ke mang ea tsebang tse ka pelong ea motho, haese moea oa motho o ka ho eena? Ka mokhoa o joalo, ha ho le ea mong ea tsebang tsa Molimo, haese Moea oa Molimo feela. ₁₂Rōna ha rea amohela moea oa lefatše, empa re amohetse Moea o tsoang ho Molimo, hore re tle re tsebe tseo re li filoeng ke Molimo ka mohau oa hae. ₁₃Tsena ha re li bolele ka mantsoe a rutoang ka bohlale ba motho, empa re li bolela ka mantsoe a rutoang ke Moea o Halalelang, ka ho hlalosetsa ba nang le Moea o Halalelang litaba tsa moea. ₁₄Motho ea busoang ke botho ha a amohele tsa Moea oa Molimo, hobane ho eena tseo ke bothoto. Le ho li tseba a ke ke a li tseba, hobane li hlalohanngoa ka Moea o Halalelang feela. ₁₅Motho ea nang le Moea o Halalelang o hlalohanya tsohle, athe eena ha ho ea ka mo ahlōlang.