Limpho tsa ho haha Tempele
1Khosi Davida a boela a re ho sechaba sohle: “Solomone, mora oa ka, eo e leng eena feela eo Molimo a mo khethileng, o sa le monyenyane, oa tètèma, athe mosebetsi o moholo, hobane Tempele ena hase ea motho, empa ke ea Morena Molimo. 2Ka matla a ka 'ohle ke lokisitse lintho tsa Tempele ea Molimo oa ka: Khauta e tla etsa lintho tsa khauta, le silefera e tla etsa lintho tsa silefera, le lethose le tla etsa lintho tsa lethose, le tšepe e tla etsa lintho tsa tšepe, le mapolanka a tla etsa lintho tsa mapolanka, le majoe a bohlokoa a oniki, le majoe a phatsimang a tla khabisa, a mebala-bala, le mefuta eohle ea majoe a bohlokoa, le mahakoe. 3Ho feta mona, kaha ke rata Tempele ea Molimo oa ka, kaholim'a tsohle tseo ke seng ke li lokiselitse Tempele ena e halalelang, le 'na ke abela Tempele ena ea Molimo oa ka matlotlo a ka a khauta le a silefera: 4Ke khauta ea Ofire, e etsang boima ba lithane tse lekholo, le silefera e hloekisitsoeng, e etsang boima a lithane tse makholo a mabeli le mashome a mane, e tla manehoa maboteng a Tempele; 5e leng khauta e tla etsa lintho tsa khauta, le silefera e tla etsa lintho tsa silefera, le mesebetsi eohle e tla etsoa ke litsebi tsa mesebetsi ea matsoho. Joale ke mang ea ithaopelang ho sebeletsa Morena kajeno?”
6Eaba bao e leng lihlooho tsa malapa abo bona, le mahosana a merabe ea Iseraele, le balaoli ba bahlabani ba sekete, le ba ba lekholo, le baokameli ba mesebetsi ea khosi, baa ithaopa. 7Bakeng sa mesebetsi ea Tempele ea Molimo ba fana ka khauta eo boima ba eona bo fetang lithane tse lekholo le mashome a supileng, le silefera eo boima ba eona bo fetang lithane tse makholo a mararo le mashome a mane, le lethose le etsang boima bo ka bang lithane tse makholo a tšeletseng le mashome a mabeli, le tšepe eo boima ba eona bo fetang lithane tse likete tse tharo le makholo a mane. 8Ba neng ba e-na le majoe a bohlokoa ba a abela letlōle la Tempele ea Morena le neng le hlokomeloa ke Jehiele oa Mogereshone. 9Sechaba sa nyakalla, hobane bao ba ne ba ithaopetse ho fana, 'me ba e-fa Morena ka lipelo tsa bona tsohle. Khosi Davida le eena a thaba haholo.
Davida o rorisa Morena
10Davida a rorisa Morena moo sechaba sohle se leng teng, a re:
“Kamehla le mehla
ho rorisoe uena,
Morena Molimo oa ntat'a rōna,
oa ntat'a rōna Iseraele.
11Boholo, le matla, le tlōtla
ke tsa hao, Morena,
le tlhōlo, le botlotlehi.
Tsohle tse leholimong le lefatšeng
ke tsa hao;
'muso ke oa hao, Morena,
ke uena hlooho,
u phahametse tsohle.
12Maruo le hlompho li tsoa ho uena,
tsohle li busoa ke uena;
tsoho la hao le matla, le sefea,
ho phahamisa le ho matlafatsa bohle.
13Rea u leboha Molimo oa rōna,
re rorisa lebitso la hao
le tlōtlehang.
14“Empa 'na ke mang? Chaba sa ka sona ke eng, hoo re ka ithaopelang ho fana hakaale-kaale? Tsohle ke tsa hao, 'me tseo re faneng ka tsona li tsoa ho uena. 15Mahlong a hao re baeti le bajaki, joaloka bo-ntat'a rōna bohle. Matsatsi a rōna, lefatšeng mona, a joaloka seriti, 'me ha ho ea nang le tšepo. 16Oho, Morena Molimo oa rōna, lintho tsena tsohle, tseo re li lokiselitseng ho u hahela Tempele ka tsona, ho tlōtla lebitso la hao le halalelang, li tsoa ho uena, ke tsa hao. 17Hape kea tseba, Molimo oa ka, hore u leka pelo ea motho, 'me u thabela ho loka. Ha e le 'na ke u nyeheletse ka lintho tsena tsohle ka boithaopo, ka pelo ea ka eohle. Joale ke thabetse le ho bona sechaba sa hao, se teng mona, se u nyehella ka boithaopo. 18Oho, Morena Molimo oa bo-ntat'a rōna Aborahama, le Isaka, le Iseraele, etsa hore maikutlo ana a 'ne a be teng mehopolong ea lipelo tsa sechaba sa hao, se 'ne se tšepahale ho uena. 19Ak'u etse hore Solomone, mora oa ka, a tšepahale, hore a bōlōke melao ea hao, le litemoso tsa hao, le litaelo tsa hao, a phethe lintho tsena tsohle, a hahe Tempele eo ke seng ke lokiselitse hore e hahoe.”
20Eaba Davida o re ho sechaba sohle: “Rorisang Morena Molimo oa lōna!” Sechaba sohle sa rorisa Morena Molimo oa bo-ntat'a sona; sa inamisa lihlooho tsa sona, sa khumamela Morena, sa isa hlompho ho khosi.
Sechaba se ananela khosi Solomone
21Ka letsatsi le hlahlamang leo, sechaba sa etsetsa Morena mahlabelo le linyehelo tsa secheso ka lipohoana tse sekete, le lipheleu tse sekete, le likonyana tse sekete, le linyehelo tsa lino, le mahlabelo a mang a mangata, a etsetsoang Baiseraele bohle. 22Ka lona letsatsi leo ba e-ja, ba e-noa ba nyakaletse haholo, ba le kapele ho Morena.
Ba boela ba bea Solomone, mora oa Davida, khetlo la bobeli, hore e be khosi; ba mo tlotsetsa Morena, hore e be 'musi e moholo, Sadoke eena e be moprista. 23Solomone a lula teroneng ea Morena, ea e-ba khosi sebakeng sa ntat'ae Davida, 'me a atleha. Baiseraele bohle ba mo hlompha. 24Mahosana 'ohle, le bahale, le bara bohle ba khosi, ba ipea tlas'a khosi Solomone.
25Morena a phahamisa Solomone haholo mahlong a Baiseraele bohle; a mo apesa botlotlehi boo ho seng khosi e neng e kile ea e-ba le bona, naheng ea Iseraele, pele ho eena.
Lefu la Davida
26Davida, mora oa Jese, a busa Baiseraele bohle. 27A ba busa ka lilemo tse mashome a mane; ka tse supileng a busa a le Heborone, ka tse mashome a mararo a metso e meraro a le Jerusalema. 28A shoa a se a tsofetse haholo, a phetse lilemo tse ngata, a bile le maruo, 'me a hlompheha. Solomone, mora oa hae, a mo hlahlama.
29Liketso tsa khosi Davida, ho tloha qalong ho isa qetellong, li ngotsoe Bukeng ea Moporofeta Samuele, le Bukeng ea Moporofeta Nathane, le Bukeng ea Moporofeta Gade. 30Li ngotsoe 'moho le tsohle tsa puso ea hae, le tsa bonatla ba hae, le liketsahalo tsohle tse ileng tsa mo hlahela naheng ea Iseraele, le mebusong eohle ea linaha tse ling.
