SEFELA SA SALOMONE 4

₁Bona, o motle, thatohatsi ya ka! bona, o motle! Mahlo a hao eka a leebakgorwana kamora lesira la hao; moriri wa hao o jwaloka mohlape wa dipodi tse fulang meepeng ya thaba ya Gileade. ₂Meno a hao a jwaloka mohlape wa dinku tse kutilweng, tse tswang ho hlatsuwa; kaofela ha tsona di tswetse mafahla, ha ho e nngwe ho tsona e nyopileng. ₃Melomo ya hao eka tshwele ya karmine; molomo wa hao o a kgahleha; marama a hao eka dipatsolo tse pedi tsa kharanata kamora lesira la hao. ₄Molala wa hao o jwaloka tora ya Davida e haheletsweng polokelo ya dibetsa; dithebe tse sekete di fanyehilwe teng, thebe tsohle tsa diqhenqha. ₅Matswele a hao eka mafahlana a tshephe, a fulanga hara mehaladitwe. ₆Ha ho ntse ho lebeletswe ho phola ha letsatsi le paleho ya meriti, ke tla ya thabeng ya mirra le thoteng ya dibano. ₇Thatohatsi ya ka, botle ba hao bo phethehile, ha ho sekodi ho wena.

₈Molebeletswa wa ka, tloha Lebanone le nna, o eme, o tadime o le hlorong ya Amana, hlorong ya Senire le Hermone, matsabeng a ditau, dithabeng tsa mangau! ₉O hapile pelo ya ka, ngwaneso, molebeletswa wa ka, o hapile pelo ya ka ka tjhadimo e le nngwe ya mahlo a hao, ka serwalo se le seng sa molala wa hao. ₁₀Kgahliso e kakang leratong la hao, ngwaneso, molebeletswa wa ka! Lerato la hao le monate ho fetisa veine hakakang; monko wa menkwane ya hao o fetisa wa menkwane e meng kaofela. ₁₁Melomo ya hao, molebeletswa wa ka, e rotha dinotshi; dinotshi le lebese di katlasa leleme la hao; monko wa diaparo tsa hao eka monko wa Lebanone. ₁₂Ngwaneso, molebeletswa wa ka, o tshimo e haheleditsweng, sediba se sireleditsweng, le mohlodi o tiisitsweng. ₁₃Mahlomela a hao ke tshimo ya difate tsa kharanata tse ditholwana tse monate, le dikiprese le dinareda. ₁₄Ke nareda le saforane, le kalamuse le sinnamone, le difate tsohle tse tswang menkwane, mirra le alwe, le tse fetisang tsohle hara dinonetso. ₁₅O mohlodi wa dirapa, sediba se metsi a kwellang, melapo e phallang e tswang Lebanone.

₁₆Moya wa leboya, tsoha; tloo le wena, moya wa borwa, o fokele serapeng sa me; dinonetso tsa sona di ntshe monko wa tsona! Moratuwa wa me a ke a kene serapeng sa hae, a latswe ditholwana tse monate tsa sona.