TSHENOLO 7

₁Kamora tseo, ka bona mangeloi a mane a eme dikgutlong tse nne tsa lefatshe, a thibetse meya e mene ya lefatshe, hore ho se ke ha eba moya o fokelang lefatsheng, le lewatleng, leha e le sefateng se le seng. ₂Ka bona lengeloi le leng le nyoloha botjhabatsatsi, le tshwere letshwao la Modimo o phelang; la phahamisa lentswe, le howeletsa mangeloi a mane a neng a neilwe taelo ya ho senya lefatshe le lewatle, ₃la re: Le se ke la senya lefatshe, leha e le lewatle, leha e le difate, re eso ho tshwaye bahlanka ba Modimo wa rona diphatleng tsa bona. ₄Mme ka utlwa palo ya ba tshwailweng e le dikete tse lekgolo le nang le mashome a mane a metse e mene, e leng ba tshwailweng melokong yohle ya bana ba Iseraele. ₅Ba leloko la Juda ba tshwailweng ba ne ba le dikete tse leshome le metso e mmedi; ba leloko la Rubene ba tshwailweng ba ne ba le dikete tse leshome le metso e mmedi; ba leloko la Gade ba tshwailweng ba ne ba le dikete tse leshome le metso e mmedi; ₆ba leloko la Asere ba tshwailweng ba ne ba le dikete tse leshome le metso e mmedi; ba leloko la Nefthali ba tshwailweng ba ne ba le dikete tse leshome le metso e mmedi; ba leloko la Manase ba tshwailweng ba ne ba le dikete tse leshome le metso e mmedi; ₇ba leloko la Simeone ba tshwailweng ba ne ba le dikete tse leshome le metso e mmedi; ba leloko la Levi ba tshwailweng ba ne ba le dikete tse leshome le metso e mmedi; ba leloko la Isakare ba tshwailweng ba ne ba le dikete tse leshome le metso e mmedi; ₈ba leloko la Sabulone ba tshwailweng ba ne ba le dikete tse leshome le metso e mmedi; ba leloko la Josefa ba tshwailweng ba ne ba le dikete tse leshome le metso e mmedi; ba leloko la Benjamine ba tshwailweng ba ne ba le dikete tse leshome le metso e mmedi.

₉Kamora tseo, ka tadima, mme ka bona bongata bo boholo ba batho, bao ho seng motho ya ka tsebang ho ba bala, ba ditjhaba tsohle, le ba mefuta yohle, le ba merabe yohle, le ba dipuo tsohle, ba eme pela terone le pela Konyana, ba apere diaparo tse telele tse tshweu, ba tshwere dipalema matsohong a bona, ₁₀ba ntse ba howa ka mantswe a phahamileng, ba re: Poloko ke ya Modimo wa rona, o dutseng teroneng, le ya Konyana. ₁₁Mme mangeloi kaofela a ne a eme a teetse terone, le baholo, le dibopuwa tse phelang tse nne hare; a ne a wa ka difahleho pela terone, a rapela Modimo, ₁₂a re: Amen! Ho Modimo wa rona e be poko, le kganya, le bohlale, le teboho, le hlompho, le borena, le matla, mehleng le mehla! Amen!

₁₃Yaba e mong wa baholo o ahlamisa molomo wa hae, a re: Bana ba apereng diaparo tse telele tse tshweu ke bomang, mme ba tswa kae? ₁₄Ka re ho yena: Monghadi, ho tseba wena. A re ho nna: Ke ba tswang mahlomoleng a maholo; ba hlatswitse diaparo tse telele tsa bona, ba di sweufaditse mading a Konyana. ₁₅Ke ka lebaka leo ba leng pela terone ya Modimo, mme ba o sebeletsa motshehare le bosiu tempeleng ya wona; mme ya dutseng teroneng o tla ba sireletsa. ₁₆Ha ba sa tla hlola ba lapa, leha e le ho nyorwa; ha ba sa tla hlola ba batwa ke letsatsi, leha e le ke lebatama le leng; ₁₇hobane Konyana e hara terone e tla ba alosa, mme e tla ba isa didibeng tsa metsi a bophelo; mme Modimo o tla hlakola meokgo yohle mahlong a bona.