PESALEME YA 96

₁Binelang Jehova sefela se setjha; binelang Jehova, lona, baahi bohle ba lefatshe! ₂Binelang Jehova, le rorise lebitso la hae, le bolele poloko ya hae ka matsatsitsatsi. ₃Le bolele kganya ya hae hara ditjhaba, le mehlolo ya hae hara mefuta yohle! ₄Hobane Jehova o moholo, o lokelwa ke ho roriswa ka ho fetisisa; o tshabeha ho fetisa medimo kaofela; ₅hobane medimo yohle ya ditjhaba ke ditshwantsho feela, empa Jehova o entse mahodimo. ₆Kganya le letlotlo di pela hae, matla le botle di sehalalelong sa hae.

₇Lona, mefuta ya ditjhaba, busetsang ho Jehova, busetsang ho Jehova kganya le matla. ₈Busetsang ho Jehova kganya e tshwanelang lebitso la hae; tlisang dinyehelo, le kene mabaleng a hae! ₉Kgumamang pela Jehova ka bokgabane bo halalelang. Le thothomele pela hae, lona baahi bohle ba lefatshe! ₁₀Ereng hara ditjhaba: Jehova o a busa! lefatshe le tiya ke hona, ha le sisinyehe; o ahlola ditjhaba ka ho loka.

₁₁Mahodimo a ke a thabe, mme lefatshe le hlasimolohe; lewatle a le ke le dume le tsohle tse ho lona; ₁₂dithota di ke di nyakalle le tse ho tsona kaofela; difate tsohle tsa meru di etse ditlatse tsa thabo pela Jehova! ₁₃Hobane o ya tla ho ahlola lefatshe. O tla ahlola lefatshe ka ho loka, le ditjhaba ka nnete ya hae.