PESALEME YA 91

₁Ya dutseng sephiring sa Mookamedi ya phahameng, o phomola moriting wa Ya matla wohle. ₂Ke re ho Jehova: O setshabelo sa ka le qhobosheane ya ka, Modimo wa ka oo ke o tshepang! ₃Ke yena ya o tshwasollang lerabeng la setsomi, lefung le akaretsang. ₄O o kgurumetsa ka masiba a hae, o bona tshireletso katlasa mapheo a hae; nnete ya hae ke thebe le thejana. ₅O ke ke wa tshaba letsoso la bosiu, leha e le motsu o bebang motshehare, ₆leha e lefu le kgukgunang lefifing, leha e le tshenyo e bolayang motshehare o moholo. ₇Leha batho ba ka wa ba le sekete lehlakoreng la hao, ba le diketekete letsohong la hao le letona, wena, lefu le ke ke la o atamela. ₈Feela, o tla iponela ka mahlo a hao, o be o bone moputso wa ba bolotsana. ₉Hobane, Jehova, o setshabelo sa ka.

O ikgethetse Mookamedi ya phahameng, hore e be setshabelo sa hao. ₁₀Ka baka leo, tlokotsi e ke ke ya fihla ho wena, kotsi e ke ke ya atamela tente ya hao; ₁₁hobane o tla o laella mangeloi a hae, a tle a o boloke ditseleng tsa hao kaofela. ₁₂A tla o kakasa ka matsoho a wona, esere mohlomong leoto la hao la kgoptjwa ke lejwe. ₁₃O tla hata tau le qowane, o hatakele tawana le noha.

₁₄Erekaha a beile lerato la hae ho nna, ke tla mmoloka, ke mmee qhobosheaneng e phahameng, kahobane a tsebile lebitso la ka. ₁₅O tla bitsa ho nna, mme ke tla mo araba; ke tla ba haufi le yena matswalong, ke mo ntshe ho wona, ke mo tlotlise. ₁₆Ke tla mo kgorisa ka matsatsi a mangatangata, ke mmontshe poloko ya ka.