PESALEME YA 89

₁Ke tla bina mehauhelo ya Jehova ka ho sa yeng kae; molomo wa ka o tla tumisa botshepehi ba hao ho isa ditloholwaneng, ₂hobane ke itse: Mohau wa hao o entswe moaho o sa feleng; o theile botshepehi ba hao mahodimong. ₃O itse: Ke entse selekane le mokgethwa wa ka, ke hlapantse ho Davida, mohlanka wa ka, ka re: ₄Ke tla tiisa leloko la hao ka ho sa yeng kae, ke tiise terone ya hao ho isa melokong yohle. (Sela.)

₅Jehova, mahodimo a tumisa mehlolo ya hao, a bolela botshepehi ba hao phuthehong ya bahalaledi. ₆Hobane, phahameng ya mahodimo, ke mang ya ka itekantshang le Jehova? Ke mang ya tshwanang le Jehova hara bara ba Modimo? ₇Modimo o tshabeha mokgatlong o moholo wa bahalaledi, o tshajwa ke bohle ba o teelang hare. ₈Jehova, Modimo wa makgotla, ke mang ya matla jwaloka wena, Jehova? O teetswe hare ke botshepehi ba hao.

₉O laola boikgantsho ba lewatle: ha le emisa maqhubu a lona, wena o a a kokobetsa. ₁₀O thumakantse Egepeta jwaloka motho ya bolailweng, o hasantse dira tsa hao ka letsoho la hao le matla. ₁₁Mahodimo ke a hao, le lefatshe ke la hao; o theile lefatshe le tsohle tsa lona. ₁₂O bopile leboya le borwa; Thabore le Hermone di rorisa lebitso la hao. ₁₃Matla a dutse letsohong la hao, seatla sa hao se tiile, letsoho le letona la hao le phahamile. ₁₄Ho loka le kahlolo ke motheo wa terone ya hao, mohau le nnete di tsamaya pela sefahleho sa hao.

₁₅Ho lehlohonolo setjhaba se tsebang pitso ya terompeta! Se tsamaya leseding la sefahleho sa hao, Jehova, ₁₆se ithabisa kamehla ka lebitso la hao, se ithorisa ka ho loka ha hao. ₁₇Hobane o kganya ya sona le matla a sona, mme lenaka la rona le phahamiswa ke ho rata ha hao. ₁₈Hobane thebe ya rona ke Jehova, morena wa rona ke Mohalaledi wa Iseraele.

₁₉Mohlang oo, o kile wa bua ka pono ho bakgethwa ba hao, wa re: Ke thusitse mohale, ke phahamisitse eo ke mo kgethileng hara setjhaba; ₂₀ke bone Davida, mohlanka wa ka, ke mo tlotsitse ka ole ya ka ya kgalalelo. ₂₁Seatla sa ka se tla mo ahisa, letsoho la ka le mo tiise. ₂₂Sera se ke ke sa mo tsometsa, molotsana a ke ke a mo kokobetsa. ₂₃Bahanyetsi ba hae ke tla ba ripitla pela hae, ke otle dira tsa hae. ₂₄Botshepehi ba ka le mohau wa ka di tla ba le yena, mme lenaka la hae le tla hola lebitsong la ka; ₂₅ke tla bea seatla sa hae hodima lewatle, le letsoho le letona la hae hodima dinoka.

₂₆Yena o tla bitsa ho nna, a re: Ke wena ntate, Modimo wa ka, le lefika la poloko ya ka! ₂₇Mme nna ke tla mmea letsibolo la ka, le ya phahamileng hara marena a lefatshe. ₂₈Ke tla mmolokela mohau wa ka ka ho sa yeng kae; selekane sa ka le yena e tla ba sa mehla le mehla. ₂₉Ke tla etsa moloko wa hae hore e be o sa feleng, mme terone ya hae e ya nne e tiye ha mahodimo a ntse a le teng.

₃₀Ekare ha bara ba hae ba tlohela molao wa ka, ba sa ye ka ditaelo tsa ka, ₃₁ha ba tlola dikeletso tsa ka, ba sa boloke ditaelo tsa ka, ₃₂ke tla otla ditlolo tsa bona ka thupa, le bokgopo ba bona ka phafa; ₃₃empa nke ke ka ba amoha mohau wa ka, mme nke ke ka etsa botshepehi ba ka leshano; ₃₄nke ke ka senya selekane sa ka, mme nke ke ka fetola lentswe le tswileng molomong wa ka. ₃₅Ke hlapantse ho hong kgalalelong ya ka, ka re: Nke ke ka iketsa ya leshano ho Davida! ₃₆Moloko wa hae o tla nne o be teng ka ho sa feleng, terone ya hae e tla nne e be teng pela ka jwaloka letsatsi; ₃₇e tla tiya ka ho sa yeng kae jwaloka kgwedi. Paki e mahodimong e a tshepeha. (Sela.)

₃₈Leha ho le jwalo, o lelekile motlotsuwa wa hao, o mo lahlile, o mo halefetse; ₃₉o nyedisitse selekane seo o neng o se entse le mohlanka wa hao, o silafaditse moqhaka wa hae ka ho o lahlela fatshe. ₄₀O heleditse marako a hae kaofela, o rapaladitse diqhobosheane tsa hae. ₄₁Bafeti kaofela ba mo senyetsa, o entswe sekgobo sa ba mathoko. ₄₂O phahamisitse letsoho le letona la batubi ba hae, o thabisitse dira tsa hae kaofela; ₄₃o thithibantse bohale ba lerumo la hae, mme ha o a ka wa mo tiisa ntweng. ₄₄O fedisitse kganya ya hae, o rapaladitse terone ya hae fatshe; ₄₅o kgutshofaditse matsatsi a botjha ba hae, wa mo kgurumetsa ka dihlong. (Sela.)

₄₆Jehova, o tla nne o ipate ho isa kae? Kgalefo ya hao e tla tuka jwaloka mollo ho isa neneng? ₄₇Hopola hore bophelo ba ka bo bokgutshwanyane, le hore bana bohle ba batho o ba bopetse lefeela! ₄₈Motho ke mang ya phelang, mme a sa tlo ka a bona ho shwa? Ke mang ya ka lopollang moya wa hae matleng a nqalo ya bafu? (Sela.) ₄₉Morena, e kae mehauhelo ya hao ya pele, eo, botshepehing ba hao, o e baletseng Davida ka kano? ₅₀Morena, hopola dihlong tsa bahlanka ba hao; o elellwe kamoo pelong ya ka ke jereng nyatso ya ditjhaba tse ngata kateng; ₅₁o elellwe le ditshomo tsa dira tsa hao, Jehova, e leng ditshomo tse somang mehato ya motlotsuwa wa hao!

₅₂Ho roriswe Jehova ka ho sa feleng! Amen, e, amen.