PESALEME YA 88

₁Jehova, Modimo wa poloko ya ka, ke howa pela hao motshehare le bosiu. ₂Thapelo ya ka a e ke e fihle ho wena; o sekehele mohoweletso wa ka tsebe! ₃Hobane moya wa ka o kgotse ditlokotsi, mme bophelo ba ka bo sekamela nqalong ya bafu.

₄Ke badilwe le ba theohelang lebitleng; ke jwaloka motho ya feletsweng ke matla; ₅ke ya lahlilweng hara bafu; ke jwaloka babolauwa ba robetseng lebitleng, bao o sa hloleng o ba hopola, ba kgaohaneng le wena. ₆O ntahletse lemeneng le sekoti, lefifing, botebong, tlasetlase.

₇Kgalefo ya hao e nkimetse, maqhubu a hao kaofela a nkgateletse. (Sela.) ₈O suthiseditse hole le nna ba tsebanang le nna, o nkentse ntho e manyala ho bona; ke kwalletswe moo ho se nang ho tsuwa. ₉Mahlo a ka a monyela ke tlokotsi. Jehova, ke o rapela ka ditshiu tsohle, ke otlollela matsoho a ka ho wena.

₁₀Na o tla etsetsa bafu mehlolo? Na ba shweleng ba tla tsoha ho tla o rorisa na? (Sela.) ₁₁Hleka mohau wa hao o ya bolelwa lebitleng, le nnete ya hao moahong wa lefu na? ₁₂Kapa mehlolo ya hao a e tla lemohuwa lefifing, le ho loka ha hao fatsheng la tebalo na?

₁₃Ke howeletsa ho wena ke hona, Jehova, mme thapelo ya ka e hlaha pela hao e sa le kameso. ₁₄Jehova, o lahlelang moya wa ka? O mpatela sefahleho sa hao keng? ₁₅Ke madimabe, ke ntse ke eshwa esale le botjheng ba ka, ke tshoswa ke matshabeho a hao, mme ke tsielehile.

₁₆Kgalefo ya hao e tukang e nkwetse hodimo; ke fediswa ke matsoso a hao; ₁₇a nkopetse jwaloka metsi ka letsatsi le leng le le leng, a kopane hammoho ho ntika kahohle. ₁₈O suthiseditse hole le nna metswalle ya ka le dithaka tsa ka; tseo ke tsebanang le tsona ke nqalo tsa lefifi.