PESALEME YA 86

₁Jehova, sekeha tsebe ya hao, o nkarabele, hobane ke ya madimabe, ke ya lesitsi. ₂Boloka moya wa ka, hobane ke e mong wa batshepehi ba hao! Thusa mohlanka wa hao ya o tshepang, wena, Modimo wa ka! ₃O nkgauhele, Morena, hobane ke bitsa ho wena tsatsi lohle! ₄O thabise moya wa mohlanka wa hao, hobane ke phahamisetsa moya wa ka ho wena, Morena. ₅Hobane wena, Morena, o molemo, o mosa, o tletse lereko hobohle ba o rapelang. ₆Jehova, sekehela thapelo ya ka tsebe, o ele thapediso tsa ka hloko. ₇Ke o rapela ka letsatsi la ka la matswalo, ka hobane o a nkutlwa.

₈Hara medimo ha ho o tshwanang le wena, Morena; ha ho letho le ka lekanang le mesebetsi ya hao! ₉Ditjhaba tsohle tseo o di entseng di tla tla kgumama pela hao, Morena, di tlotlise lebitso la hao! ₁₀Hobane o moholo, o etsa meeka, o Modimo o nnotshi.

₁₁Jehova, mpontshe tsela ya hao, ke tle ke tsamaye nneteng ya hao! o tlamelle pelo ya ka yohle le tshabo ya lebitso la hao! ₁₂Ke tla o rorisa, Morena, Modimo wa ka, ka pelo ya ka yohle, ke tlotlise lebitso la hao ka ho sa yeng kae! ₁₃Hobane mohau wa hao o moholo ka nqa ho nna, mme o nyolotse moya wa ka tlasetlase nqalong ya bafu.

₁₄Oho Modimo, baikakasi ba mpokanetse, letshwele la batho ba tshabehang le batla bophelo ba ka; ha ba ka ba o bea pela mahlo a bona. ₁₅Empa wena, Morena, o Modimo o lereko, o molemo, o diehang ho halefa, o tletseng mohau le nnete. ₁₆O retelehele ho nna, o nkgauhele, o nee mohlanka wa hao matla a hao, o pholose mora wa lekgabunyane la hao. ₁₇O etse pontsho bakeng sa ka ya hoba o molemo ho nna, e tle e bonwe ke dira tsa ka, di ke di swabe! hobane, Jehova, o a nthusa, o a ntshedisa.