Thapelo ya ho ipea ho Modimo, ha ditjhaba di kopanetse ya o tshepileng.
Sefela. Pesaleme ya Asafe.
1Oho Modimo, o se ke wa thola, o se ke wa thibana ditsebe, o se ke wa dula o ikgutseditse, Modimo. 2Hobane dira tsa hao di a dumaduma, ba o hloyang ba emisa dihlooho; 3ba rera setjhaba sa hao ka ho se lohela mano, ba botsana hodima ba sirelwang ke wena. 4Ba re: Tloong, re ba fedise hara ditjhaba, lebitso la Iseraele le se ke la hlola le bolelwa!
5Ba botsana ba le pelo e le nngwe, ba etsa selekane ho o lwantsha: 6e leng ba ditenteng tsa Edomo, le Baishmaele, Bamoabe, le Bahagarene, 7Gebale, le Ammone, le Amaleke, le Bafilesta hammoho le baahi ba Tire; 8Baassiria le bona ba ikopantse le bona, ba adimile bana ba Lota matsoho a bona. (Sela.)
9O ba etse jwalokaha o entse Midiane, le Sisera, le Jabine, nokaneng ya Kishone, 10ba feletseng Ene-Dore, mme ditopo tsa bona tsa nontsha mobu! 11O etse mahosana a bona a be jwaloka Orebe le Seebe, le marena a bona kaofela a be jwaloka Seba le Tsalmunna; 12hobane ba re: A re inkeleng, re rue meaho ya Modimo!
13Modimo wa ka, ba be pela hao jwaloka setsokotsane, jwaloka mooko o fefolwang ke moya, 14jwaloka mollo ha o qeta moru, le jwaloka lelakabe ha le tjhesa dithaba. 15O ba lelekise jwalo ka sefefo sa hao, o ba tshose ka moya wa hao wa letsukutsuku! 16Apesa difahleho tsa bona ka dihlong, ba tle ba batle lebitso la hao, Jehova. 17A ba ke ba tsielehe, ba shwe motlopo kamehla, ba fele ba hlabilwe ke dihlong! 18Ba tle ba tsebe hore wena, eo lebitso la hao e leng Jehova, o rena o nnotshi lefatsheng lohle.
